ନୂଆଦିଲ୍ଲୀ,୦୪/୦୮: ୟେମେନର ଅବୟାନ୍ ପ୍ରଦେଶର ଉପକୂଳରେ ପ୍ରବାସୀ ଭର୍ତ୍ତି ଏକ ଡଙ୍ଗା ବୁଡ଼ି ଯାଇଛି । ଡଙ୍ଗାରେ ୧୫୪ ଜଣ ଥିଲେ । ସେମାନଙ୍କ ମଧ୍ୟରୁ ୬୮ ଜଣଙ୍କର ମୃତ୍ୟୁ ଘଟିଛି ଏବଂ ୭୪ ଜଣ ନିଖୋଜ ଅଛନ୍ତି । ସ୍ଥାନୀୟ ଅଧିକାରୀଙ୍କ ଅନୁଯାୟୀ, ଡଙ୍ଗାରେ ଥିବା ସମସ୍ତ ପ୍ରବାସୀ ଇଥିଓପିଆର ଥିଲେ । ସେମାନେ ୟେମେନ୍ ଦେଇ ରୋଜଗାର ଆଶାରେ ସାଉଦି ଆରବକୁ ବାହାରିଥିଲେ । ଦୁର୍ଘଟଣାରେ କେବଳ ୧୦ ଜଣଙ୍କୁ ଉଦ୍ଧାର କରାଯାଇଛି । ଯେଉଁଥିରେ ନଅ ଜଣ ଇଥିଓପିଆନ୍ ଏବଂ ଜଣେ ୟେମେନ୍ ନାଗରିକ ଅଛନ୍ତି ।
ସ୍ଥାନୀୟ ଗଣମାଧ୍ୟମ ରିପୋର୍ଟ ଏବଂ ଆନ୍ତର୍ଜାତୀୟ ପ୍ରବାସ ସଂଗଠନ ଘଟଣାକୁ ସବୁଠୁ ଦୁଃଖଦ ଘଟଣା ମଧ୍ୟରୁ ଗୋଟିଏ ବୋଲି କହିଛି। ଉଦ୍ଧାରକାରୀ ଟିମ୍ ନିଖୋଜ ୭୪ ଜଣଙ୍କୁ ଖୋଜା ଖୋଜି ଜାରି ରଖିଛନ୍ତି । ଏଠି ପ୍ରଶ୍ନ ଉଠୁଛି ଯେ ଆଫ୍ରିକାର ଲୋକମାନେ ୟେମେନ୍ ଭଳି ସଂଘର୍ଷପୂର୍ଣ୍ଣ ଦେଶର ପଥ କାହିଁକି ବାଛନ୍ତି ? ଏହାର ଉତ୍ତର କେବଳ ଆର୍ଥିକ ନୁହେଁ ବରଂ ସାମାଜିକ ଏବଂ ରାଜନୈତିକ ମଧ୍ୟ ।
ଦାରିଦ୍ର୍ୟ ଏବଂ ବେରୋଜଗାର ସହ ସଂଘର୍ଷ କରୁଛି ଦେଶ- ଇଥିଓପିଆ ଏବଂ ସୋମାଲିଆ ଭଳି ଦେଶରେ, ଦାରିଦ୍ର୍ୟ, ବେକାରୀ ଏବଂ ଅସ୍ଥିରତା ଲୋକଙ୍କୁ ବିପଦପୂର୍ଣ୍ଣ ସମୁଦ୍ର ଯାତ୍ରା କରିବାକୁ ବାଧ୍ୟ କରୁଛି । ୟେମେନ ଗୃହଯୁଦ୍ଧ ସହିତ ସଂଘର୍ଷ କରୁଥିବା ସତ୍ତ୍ୱେ, ପ୍ରବାସୀମାନଙ୍କ ପାଇଁ ଉପସାଗରୀୟ ଦେଶଗୁଡ଼ିକରେ ପହଞ୍ଚିବା ପାଇଁ ଏକ ପଥ ହୋଇଛି । ଆନ୍ତର୍ଜାତୀୟ ପ୍ରବାସୀ ସଂଗଠନ ଅନୁଯାୟୀ, ୨୦୨୪ରେ ଏଯାବତ୍ ୬୦,୦୦୦ ରୁ ଅଧିକ ପ୍ରବାସୀ ୟେମେନ ଦେଇ ଯାତ୍ରା କରିଛନ୍ତି, ୨୦୨୩ରେ ଏହି ସଂଖ୍ୟା ୯୭,୨୦୦ ଥିଲା। ସମୁଦ୍ର ପଥରେ ସୁରକ୍ଷା ପାଟ୍ରୋଲିଂ ବୃଦ୍ଧି ଯୋଗୁଁ ଏହି ହ୍ରାସ ହୋଇଛି ।
ପ୍ରବାସୀଙ୍କ ସୁରକ୍ଷା- ଆନ୍ତର୍ଜାତୀୟ ପ୍ରବାସୀ ସଂଗଠନର ସଂଖ୍ୟା ଚକିତ କରିଛି । ୨୦୨୩ ରେ, ଏହି ପଥରେ ୫୫୮ ଜଣଙ୍କ ମୃତ୍ୟୁ ହୋଇଥିଲା । ଗତ ୧୦ ବର୍ଷରେ ୨,୦୮୨ ରୁ ଅଧିକ ପ୍ରବାସୀ ନିଖୋଜ ହୋଇଛନ୍ତି । ଡଙ୍ଗା ବୁଡ଼ି ଯିବା ଯୋଗୁଁ ୬୯୩ ଜଣଙ୍କ ମୃତ୍ୟୁ ହୋଇଛି। ପ୍ରବାସୀମାନଙ୍କୁ କେବଳ ସମୁଦ୍ରର ଲହରୀ ସାମ୍ନା କରିବାକୁ ପଡ଼େ ନାହିଁ, ବରଂ ୟେମେନରେ ପହଞ୍ଚିବା ପରେ, ସେମାନଙ୍କୁ ଅଟକ, ଏବଂ ଅମାନବୀୟ ପରିସ୍ଥିତିରେ ବଞ୍ଚିବାକୁ ପଡ଼େ । ଆଇଓଏମ୍ ପୂର୍ବରୁ ସତର୍କ କରାଇ ଦେଇଥିଲା ଯେ, ୟେମେନ ଦେଇ ଯାଉଥିବା ଏହି ରାସ୍ତା ବିଶ୍ୱର ସବୁଠାରୁ ବିପଜ୍ଜନକ ପ୍ରବାସ ପଥ ମଧ୍ୟରୁ ଗୋଟିଏ । ଏହା ସତ୍ତ୍ୱେ ବି ପ୍ରବାସୀମାନେ ଏହି ରାସ୍ତା ବାଛୁଛନ୍ତି ।
ୟେମେନରେ ମାନବିକ ସଙ୍କଟ ଏବଂ ରାଜନୈତିକ ପୃଷ୍ଠଭୂମି- ୨୦୧୪ ମସିହାରୁ ଗୃହଯୁଦ୍ଧ କବଳରେ ରହିଛି ୟେମେନ। ହୁଥି ବିଦ୍ରୋହୀ ଏବଂ ୟେମେନର ଆନ୍ତର୍ଜାତୀୟ ସ୍ତରରେ ସ୍ୱୀକୃତିପ୍ରାପ୍ତ ସରକାରଙ୍କ ମଧ୍ୟରେ ଯୁଦ୍ଧ ଦେଶକୁ ଧ୍ୱଂସର ଦ୍ୱାରଦେଶରେ ପହଞ୍ଚାଇଛି । ଯଦିଓ ଏପ୍ରିଲ ୨୦୨୨ ରେ ଏକ ଯୁଦ୍ଧବିରତି ଚୁକ୍ତି ହୋଇଥିଲା, ଯାହା ହିଂସାକୁ କିଛିଟା ହ୍ରାସ କରିଛି । ଦେଶ ଏବେ ବି ସାମାଜିକ, ଆର୍ଥିକ ଏବଂ ରାଜନୈତିକ ଅସ୍ଥିରତା ଦେଇ ଗତି କରୁଛି । ଜାତିସଂଘର ଏକ ରିପୋର୍ଟ ଅନୁଯାୟୀ, ୟେମେନରେ ବର୍ତ୍ତମାନ ପ୍ରାୟ ୩୮୦,୦୦୦ ପ୍ରବାସୀ ଏବଂ ଶରଣାର୍ଥୀ ଅଛନ୍ତି ।
