ଭୁବନେଶ୍ୱର,୧୪/୦୧: ରାଜସ୍ୱ ଆୟ କମିଗଲା । ଯାହା ଟଙ୍କା ଥିଲା ସରିଗଲାଣି । ସରକାର ଟଙ୍କାଟିଏ ଦେଇନାହାନ୍ତି । ବିଏମ୍ସି ଭଣ୍ଡାର ଖାଲି । ୨୦୨୫-୨୬ ଆର୍ଥିକ ବର୍ଷ ବଜେଟ୍କୁ ନେଇ ବିଏମ୍ସି ଏବେ ଚିନ୍ତାରେ । ଏହାରି ଭିତରେ ଟାଣିଟୁଣି ୮୫୦ କୋଟି ଟଙ୍କାର ଚିଠା ବଜେଟ୍ ପ୍ରସ୍ତୁତ ହୋଇଛି । ବୁଧବାର କର୍ପୋରେସନ ବୈଠକରେ ବଜେଟ୍ ଉପସ୍ଥାପନା ହୋଇପାରେ । ଏହା ସହ ଅନେକ ଗୁଡ଼ିଏ ପ୍ରସଙ୍ଗ ଉପରେ ଆଲୋଚନା ହେବାର ସମ୍ଭାବନା ରହିଛି ।
ଡିସେମ୍ବର ୨୭ ତାରିଖରେ ବିଏମ୍ସିର କର୍ପୋରେସନ ବୈଠକ ବସିବାର ଥିଲା । ହେଲେ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କ ବିୟୋଗ ଯୋଗୁଁ ଏହାକୁ ସ୍ଥଗିତ ରଖାଯାଥିଲା । ଏହି ବୈଠକ ୧୫ ତାରିଖକୁ ଧାର୍ଯ୍ୟ ହୋଇଛି । ତେବେ ଏଥର ବିଏମ୍ସି ବୈଠକ ବେଶ ସରଗରମ ହେବ ବୋଲି ଜଣାପଡ଼ିଛି । ନୂଆ ସରକାର ଆସିବା ପରେ ବିଏମ୍ସି ଭାଗ ଟଙ୍କା ନ ମିଳିବା ପ୍ରସଙ୍ଗ ଉଠାଇବେ ବିଏମ୍ସିର ଶାସକ ଦଳ ବିଜେଡି ।
ନିର୍ବାଚନ ପୂର୍ବରୁ କଚ୍ଚାପକ୍କା ରାସ୍ତାରେ ସିଂହ ଭାଗ ଟଙ୍କା ଖର୍ଚ୍ଚ ହେଲା । ସେହିପରି ମୁକ୍ତା ଯୋଜନାରେ ୧୪୦ କୋଟି ଗଲା । ନିର୍ବାଚନ ପରେ ସରକାର ବଦଳିଲା । ଏହି ଟଙ୍କା ଏବେ ବିଏମ୍ସିକୁ ଦିଆଯାଇନି । ଫଳରେ ବିଏମ୍ସି ପାଣ୍ଠି ଖାଲି ହୋଇଯାଇଛି । ତେବେ ଏହାରି ଭିତରେ ୮୫୦ କୋଟି ଟଙ୍କାର ଚିଠା ବଜେଟ୍ ପ୍ରସ୍ତୁତ ହୋଇଛି । କେଉଁ ଯୋଜନାରେ କେତେ ଟଙ୍କା ରଖିବେ ତାକୁ ନେଇ ଭାଗ ଛିଣ୍ଡୁନି । ସେପଟେ ବିଏମ୍ସି ମୁଖ୍ୟ ବିତ୍ତ ଅଧିକାରୀଙ୍କ ବଦଳି ହୋଇଛି । ନୂଆ ବିତ୍ତ ଅଧିକାରୀ ଆସିନାହାନ୍ତି । ତେଣୁ ବିଦାୟୀ ବିତ୍ତ ଅଧିକାରୀଙ୍କୁ ବିଏମ୍ସି ଛାଡୁନାହିଁ । ବିଏମ୍ସି ବୈଠକ ପୂର୍ବରୁ ଆଜି ବିଭାଗ ସ୍ତରରେ ଅବଦଳବଦଳ ହୋଇଛି । ଭେହିକିଲ ବିଭାଗ ଅଧିକାରୀ ବଦଳିଛନ୍ତି। ନୂଆ କରି ଯୋଗ ଦେଇଥିବା ବିଏମ୍ସି ଡେପୁଟି କମିଶନର ରଶ୍ମି ପ୍ରଧାନଙ୍କୁ ଏବିସି ଦାୟିତ୍ୱ ପ୍ରଦାନ କରାଯାଇଛି । ଆସନ୍ତା ବୈଠକରେ ମଶା ପ୍ରସଙ୍ଗ ମଧ୍ୟ ଉଠାଇବେ କିଛି କର୍ପୋରେଟର । ଏହା ସହ ପ୍ରବାସୀ ଭାରତୀୟ ଦିବସରେ ଖର୍ଚ୍ଚ ହୋଇଥିବା ଟଙ୍କା ପ୍ରସଙ୍ଗ ମଧ୍ୟ ଉଠିବ ବୋଲି ଜଣାପଡ଼ିଛି ।
