ବାଙ୍ଗିରିପୋଷି,୦୮/୧୧: ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ଦେଇ ଯାଇଥିବା ୪୯ ନମ୍ୱର ଜାତୀୟ ରାଜପଥର ଦ୍ଵାରଶୁଣି ଘାଟି ରାସ୍ତା ପଥଚାରୀଙ୍କ ପାଇଁ ପାଲଟିଛି ମରଣଯନ୍ତା । ରାସ୍ତା ମରାମତି ଅଭାବରୁ ଜାତୀୟ ରାଜପଥ ଉପରେ ଆଣ୍ଠୁଏ ଖାଲ ହେଇଛି । ଧୂଳି ଉଡି ମୁହଁକୁ ମୁହଁ ଦିଶୁନି । ଦିନବେଳେ ବି ଗାଡି ଚାଳକଙ୍କୁ ଲାଇଟ ଦେଇ ଯିବାକୁ ପଡୁଛି । 

ରାସ୍ତା ସମ୍ପ୍ରସାରଣ ଓ ମରାମତି କାର୍ଯ୍ୟ ନେଇ ଥିବା ଠିକା କମ୍ପାନୀର ମନମୁଖୀ ଏବଂ ମନ୍ଥର ଗତିରେ କାର୍ଯ୍ୟ ଯୋଗୁଁ ମାସ ମାସ ବିତି ଯାଇଥିଲେ ସୁଦ୍ଧା ଘାଟି ରାସ୍ତା ଅଧିକାଂଶ ସମୟରେ ଜାମ୍‌ ରହିବା ସହ ଛୋଟ ବଡ ଦୁର୍ଘଟଣା ଘଟୁଛି । ଏଥିପ୍ରତି ରାଜ୍ୟ ସରକାର, ପ୍ରଶାସନ କିମ୍ୱା ଜାତୀୟ ରାଜପଥ ବିଭାଗ ପକ୍ଷରୁ କୌଣସି ଆଖି ଦୃଷ୍ଟିଆ ପଦକ୍ଷେପ ମଧ୍ୟ ଗ୍ରହଣ କରାଯାଉ ନାହିଁ। 

ଏହାକୁ ଦେଖି ବିଜେଡି ତରଫରୁ ତୀବ୍ର ଅସନ୍ତୋଷ ପ୍ରକାଶ ପାଇଛି । ଏଥିନେଇ ପୂର୍ବତନ ମନ୍ତ୍ରୀ ସୁଦାମ ମାର୍ଣ୍ଡୀ ନିଜ ପ୍ରତିକ୍ରିୟାରେ ମୟୂରଭଞ୍ଜ ଜିଲ୍ଲା ପ୍ରତି ଡବଲ ଇଞ୍ଜିନ ସରକାରଙ୍କ ଡବଲ ପ୍ରତାରଣା ବୋଲି କହିଛନ୍ତି । ଅନ୍ୟପକ୍ଷେ ଏଥିନେଇ ପ୍ରାକ୍ତନ ଏସଡିସି ଅଧ୍ୟକ୍ଷ ଡ଼ା ଦେବାଶିଷ ମାର୍ଣ୍ଡୀ ଓ ପ୍ରାକ୍ତନ ଜିଲ୍ଲା ବିଜେଡି ସଭାପତି ଦେବାଶିଷ ମହାନ୍ତି ବାଙ୍ଗିରିପୋଷି ଘାଟି ରାସ୍ତା ସ୍ଥିତି ଅନୁଧ୍ୟାନ କରିଛନ୍ତି । ଏହା ସହ ବହୁ ବିଜେଡି କାର୍ଯ୍ୟକର୍ତ୍ତାଙ୍କ ସହିତ ଜିଲ୍ଲାପାଳଙ୍କୁ ଭେଟି ସମସ୍ୟା ବିଷୟରେ ଆଲୋଚନା କରି ଏକ ଦାବିପତ୍ର ପ୍ରଦାନ କରିଛନ୍ତି । ଯଦି ଆଗକୁ ଏଥିପ୍ରତି ଏନଏଚଏଆଇ କିମ୍ଵା ସରକାରଙ୍କ ତରଫରୁ କୌଣସୀ ପଦକ୍ଷେପ ଗ୍ରହଣ ନକରାଯାଏ, ତେବେ ବିଜେଡି ତରଫରୁ ଆନ୍ଦୋଳନ ପନ୍ଥା ଗ୍ରହଣ କରି ଆସନ୍ତା ୨୨ ତାରିଖରୁ ଅନିର୍ଦ୍ଦିଷ୍ଟ ସମୟ ପର୍ଯ୍ୟନ୍ତ ରାସ୍ତା ଅବରୋଧ କରାଯିବ ବୋଲି ଉଭୟ ନେତା ଚେତାବନୀ ଦେଇଛନ୍ତି।