ମୁମ୍ବାଇ ୧୪/୧୧: ତେଲୁଗୁ ଫିଲ୍ମ ‘ମଟ୍କା’ରେ ବରୁଣ ତେଜ୍ଙ୍କ ସହ ସ୍କ୍ରିନ୍ ସେୟାର କରିବେ ନୋରା ଫତେହି । ଏକ ଗଣମାଧ୍ୟମ ସହ ବାର୍ତ୍ତାଳାପରେ ସେ ଫିଲ୍ମ ବିଷୟରେ ଅନେକ କଥା ଶେୟାର କରିଛନ୍ତି । ସୁଟିଂ ସମୟରେ ସେ ଆହତ ହୋଇଥିଲେ । ତଥାପି ସୁଟିଂ ଜାରି ରଖିଥିଲେ ।
ଏ ବିଷୟରେ ନୋରା କହନ୍ତି, ଦୀର୍ଘ ୭ ବର୍ଷ ପରେ ତେଲୁଗୁ ଫିଲ୍ମରେ ଅଭିନୟର ସୁଯୋଗ ମିଳିଛି । ତେଣୁ ଆହତ ଯୋଗୁ ସୁଟିଂ ଅଟକାଇବାକୁ ଚାହୁଁନଥିଲେ । ଫିଲ୍ମଟି ତେଲୁଗୁ ସମେତ ହିନ୍ଦୀ, ତାମିଲ, କନ୍ନଡ଼ ଓ ମାଲାୟାଲମ୍ରେ ମୁକ୍ତିଲାଭ କରିବ ।
‘ମଟ୍କା’ରେ ନୋରା ସୋଫିଆ ଭୂମିକାରେ ଅଭିନୟ କରିଛନ୍ତି, ଯିଏକି ଜଣେ କ୍ୟାବ୍ରେ ଡ୍ୟାନ୍ସର । ବାସୁ(ବରୁଣ)ଙ୍କ ଜୀବନରେ ଏଣ୍ଟ୍ରି କରିବା ପରେ ତାଙ୍କ ଜୀବନରେ ବହୁତ ପରିବର୍ତ୍ତନ ହୋଇଛି । ଫିଲ୍ମରେ ନୋରାଙ୍କର ଅଲଗା ଲୁକ୍ ଦେଖିବାକୁ ମିଳିବ । ତେଲୁଗୁ ଭାଷାରେ କଥା ହେବା ତାଙ୍କ ପାଇଁ ସବୁଠୁ ମୁସ୍କିଲ ଥିଲା । ନିର୍ଦ୍ଦେଶକ ତାଙ୍କ ଚରିତ୍ର ଓ ଭାଷା ଉପରେ ବହୁତ କାମ କରିଛନ୍ତି । ପ୍ରଥମ ଦିନ ବରୁଣଙ୍କ ସହ ତାଙ୍କର ସୁଟିଂ ଥିଲା । ଡାଇଲଗ୍ ଏତେ ଲମ୍ବା ଥିଲା ଯେ ସେ ରାତିସାରା ଶୋଇପାରି ନ ଥିଲେ । ଏକ ଗୀତ ଜରିଆରେ ଫିଲ୍ମରେ ନୋରାଙ୍କ ଏଣ୍ଟ୍ରି ହୋଇଛି । ସେଇ ଗୀତ ସୁଟିଂ ସମୟରେ ସେ ଆହତ ହୋଇଥିଲେ । କିନ୍ତୁ ଫିଲ୍ମର ସୁଟିଂ ୫ ଦିନରେ ଶେଷ କରିବାର ଥିଲା । ତେଣୁ ଯନ୍ତ୍ରଣାକୁ ଖାତିର ନ କରି ସେ ସୁଟିଂ ଜାରି ରଖିଲେ । ଜଣେ ଅଭିନେତ୍ରୀ ଭାବେ ଫିଲ୍ମରେ କାମ କରିବା ତାଙ୍କ ପାଇଁ ଏକ ଭିନ୍ନ ଯାତ୍ରା ବୋଲି ନୋରା କହିଛନ୍ତି । ଦୀର୍ଘ ୭ ବର୍ଷ ହେଲା ନୋରା ତେଲୁଗୁ ଇଣ୍ଡଷ୍ଟ୍ରିରେ କାମ କରିଆସୁଛନ୍ତି । ଅନେକ ଗୀତରେ ସେ ନୃତ୍ୟ ପ୍ରଦର୍ଶନ କରିଛନ୍ତି । ପ୍ରଥମ ଥର ଜୁନିୟର ଏନ୍ଟିଆରଙ୍କ ଫିଲ୍ମ ‘ଟେମ୍ପର୍’ର ଗୀତରେ ସେ ନଜର ଆସିଥିଲେ । ପୂର୍ବରୁ ବରୁଣ ତେଜଙ୍କ ଫିଲ୍ମରେ ଏକ ଗୀତରେ ପ୍ରଦର୍ଶନ କରିଥିଲେ । ଏବେ ତାଙ୍କ ସହ ଫିଲ୍ମରେ କାମ କରିବାର ସୁଯୋଗ ପାଇଁ ନୋରା ଖୁବ୍ ଖୁସି ।
