ଭଦ୍ରକ,୨୫/୪ : ଭଦ୍ରକ ଜିଲ୍ଲା ମୁଖ୍ୟ ମେଡ଼ିକାଲରେ ଲିଫ୍ଟରେ ଚାପି ହୋଇ ରୋଗୀ ମୃତ୍ୟୁ ଘଟଣାରେ ମେଡ଼ିକାଲ କର୍ତ୍ତୃପକ୍ଷ ଓ ଜିଲ୍ଲା ପ୍ରଶାସନକୁ ଘେରିଲା ବିଜେଡି। ଗତକାଲି ଭଦ୍ରକ ଜିଲ୍ଲା ମୁଖ୍ୟ ମେଡିକାଲରେ ମିନତି ପରିଡ଼ା ନାମକ ମହିଳା ରୋଗୀଙ୍କୁ ୱାର୍ଡ଼କୁ ଲିଫ୍ଟରେ ନେଉଥିବାବେଳେ ଲିଫ୍ଟରେ ଚାପି ହୋଇ ମୃତ୍ୟୁ ହୋଇଥିଲା । ଏହି ଘଟଣା ପରେ ଉତ୍ତେଜନା ଦେଖା ଦେଇଥିଲା । ୫ ଘଣ୍ଟା ପରେ ମୃତଦେହ ଉଦ୍ଧାର ହୋଇଥିଲା ।
ଏହି ଘଟଣାକୁ ନେଇ ଭଦ୍ରକ ଜିଲ୍ଲା ବିଜେଡି ପକ୍ଷରୁ ଭଣ୍ଡାରିପୋଖରୀ ବିଧାୟକ ସଞ୍ଜୀବ ମଲ୍ଲିକ, ଚାନ୍ଦବାଲି ବିଧାୟକ ବ୍ୟୋମକେଶ ରାୟ, ବରିଷ୍ଠ ନେତା ପ୍ରଫୁଲ୍ଲ ସାମଲଙ୍କ ସମେତ ଜିଲ୍ଲାର ସମସ୍ତ ବରିଷ୍ଠ ନେତା ଉପସ୍ଥିତ ରହିଥିଲେ । ସିଡିଏମଓଙ୍କ ଉପସ୍ଥିତିରେ ଲିଫ୍ଟ ନିକଟରେ ସମୀକ୍ଷା ପରେ ଭଦ୍ରକ ଜିଲ୍ଲାପାଳ ଓ ଉପ ଜିଲ୍ଲାପାଳଙ୍କୁ ଭେଟି ଆଲୋଚନା କରିଛନ୍ତି । ତେବେ ଦିଶା ମିଟିଂରେ ମେଡ଼ିକାଲ ଲିଫ୍ଟ ବିଷୟରେ ଆଲୋଚନା ହୋଇଥିଲା, କିନ୍ତୁ ପ୍ରଶାସନ ଚୁପ୍ ରହିବା ଯୋଗୁଁ ଅଘଟଣ ଘଟିଥିବା ଅଭିଯୋଗ ଆଣିଛି ବିଜେଡି । ତେବେ ନୂଆ ଜିଲ୍ଲା ମେଡ଼ିକାଲ କାର୍ଯ୍ୟ ସମ୍ପୂର୍ଣ୍ଣ ହୋଇଥିବା ବେଳେ କ’ଣ ପାଇଁ ମେଡ଼ିକାଲକୁ କାର୍ଯ୍ୟକ୍ଷମ କରାଯାଉ ନାହିଁ ସେ ନେଇ ମଧ୍ୟ ଜିଲ୍ଲାପାଳଙ୍କୁ ପ୍ରଶ୍ନ କରିଛନ୍ତି । ମେଡିକାଲରେ ସମସ୍ତ ଉପକରଣ ଥାଇ ମଧ୍ୟ କାର୍ଯ୍ୟକ୍ଷମ ନ ହେବାରୁ ରୋଗୀ ହନ୍ତସନ୍ତ ହେଉଥିବା କହିଛି ବିଜେଡି । ତେବେ ଲୋକଙ୍କ ସ୍ବାର୍ଥ ପାଇଁ ବିଜେଡି ମୁଖ୍ୟମନ୍ତ୍ରୀଙ୍କୁ ଭେଟିବ, ଯଦି ନୂତନ ମେଡ଼ିକାଲ କାର୍ଯ୍ୟକ୍ଷମ ନ ହୁଏ ରାଜରାସ୍ତାକୁ ଓହ୍ଲାଇବା ନେଇ ଚେତାବନୀ ଦେଇଛି ବିଜେଡି ।
