କୋଣାର୍କ,୦୯/୦୧: ଗୁରୁବାର ଚନ୍ଦ୍ରଭାଗାରେ ରାଜ୍ୟ ଶାକଦ୍ୱୀପ ଦୈବଜ୍ଞ ବ୍ରାହ୍ମଣ ମହାସଙ୍ଘ ପକ୍ଷରୁ ପବିତ୍ର ଶାମ୍ବ ଦଶମୀରେ ବିଶ୍ଵର ଶାନ୍ତି, ମୈତ୍ରୀ, ପ୍ରଗତି ଏବଂ କଲ୍ୟାଣ ନିମନ୍ତେ ତ୍ରିଦିବସୀୟ ବିଶ୍ଵଶାନ୍ତି ନବଗ୍ରହ ମହାଯଜ୍ଞ ଅନୁଷ୍ଠିତ ହୋଇଛି । ଓଡ଼ିଶାର ବହୁ ସ୍ଥାନରୁ ଶ୍ରଦ୍ଧାଳୁମାନେ ଏଥିରେ ଯୋଗଦାନ କରିଥିଲେ । ଅର୍କକ୍ଷେତ୍ର ଚନ୍ଦ୍ରଭାଗାଠାରେ ଶ୍ରୀକୃଷ୍ଣଙ୍କ ପୁତ୍ର ଶାମ୍ବ ଶାପଗ୍ରସ୍ତ ହୋଇ ଦୂରାରୋଗ୍ୟ କୋଷ୍ଠ ବ୍ୟାଧିରେ ପୀଡିତ ଥିଲେ। କୃଷ୍ଣ, ନାରଦ ତଥା ଦେବଗଣଙ୍କ ପରାମର୍ଶ କ୍ରମେ ଶାକଦ୍ବୀପରୁ ନୈଷ୍ଠିକ ସୌରାଂଶୀ ବ୍ରାହ୍ମଣ(ଦୈବଜ୍ଞ) ମାନଙ୍କୁ ଅଣାଇ ବିଶେଷ ସୌର ଉପଚାର ଓ ସୌର ପୂଜନରେ ବ୍ୟାଧି ମୁକ୍ତ କରାଇଥିଲେ। ସେବେଠାରୁ ସକଳଶକ୍ତିର ଆଧାର ସୂର୍ଯ୍ୟ ନାରାୟଣଙ୍କ ଉଦ୍ଦେଶ୍ୟରେ ଶାମ୍ବ ଦଶମୀ ତିଥିରେ ଅର୍କ କ୍ଷେତ୍ରରେ ଶାକଦ୍ବୀପ ବ୍ରାହ୍ମଣ ମାନଙ୍କ ଦ୍ବାରା ବିଶେଷ ସୂର୍ଯ୍ୟ ପୂଜନ କରାଯାଉଛି।
ଏଥିରେ ସଭାପତି ପଣ୍ଡିତ ଗୋପାଳ ଚନ୍ଦ୍ର ଦାଶ, ସମ୍ପାଦକ ରମାକାନ୍ତ ମହାପାତ୍ର, ସନ୍ତୋଷ କୁମାର ମିଶ୍ର, ପ୍ରେମାନନ୍ଦ ସେନାପତି, ରଙ୍ଗାଧର ମହାପାତ୍ର, ପଶ୍ଚିମ ଓଡ଼ିଶାରୁ ପଣ୍ଡିତ ଦୟାନିଧି ଖଡ଼ିରତ୍ନ, କାଳନ୍ଦୀ ଚରଣ ମହାପାତ୍ର, ଶଶିଭୂଷଣ ନାୟକ, ବିଶିଷ୍ଟ କର୍ମକର୍ତ୍ତା ଓ ସଦସ୍ୟ ସଦସ୍ୟା ପ୍ରମୁଖ ପରିଚାଳନା କରିଥିଲେ ।
