ବଲାଙ୍ଗୀର,୦୪/୧୨: ୨୬ ନମ୍ୱର ଜାତୀୟ ରାଜପଥ ମହଗାଁ ବ୍ରିଜ ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା । ଘଟଣାସ୍ଥଳରେ ୨ ଜଣ ବାଇକ ଆରୋହୀଙ୍କ ମୃତ୍ୟୁ ଘଟିଛି । ମୃତକ ଟିଟିଲାଗଡ଼ ଥାନା ଭୁସଲାଟ ଗ୍ରାମର ଲୋଚନ ରତେଇଙ୍କ ପୁଅ ରାଜେନ୍ଦ୍ର ରତେଇ (୩୪) ଏବଂ ଉଦ୍ଧବ ବନଛୋରଙ୍କ ପୁଅ ମାନସ ବନଛୋର (୧୭)ବୋଲି ଜଣାପଡିଛି । ବଲାଙ୍ଗୀର ଜିଲ୍ଲା ୨୬ ନମ୍ୱର ଜାତୀୟ ରାଜପଥ ମହଗାଁ ବ୍ରିଜ ନିକଟରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ମଙ୍ଗଳବାର ରାତ୍ର ୧୦ ଟା ସମୟରେ ଯୁବକ ଦ୍ୱୟ ବାଇକ ଯୋଗେ ସଇନ୍ତଳା ପଟୁ ଟିଟିଲାଗଡ଼ ପଟକୁ ଯାଉଥିଲେ । ଏହି ସମୟରେ ବରଗାଁ ପଟୁ ସଇନ୍ତଳାକୁ ଆସୁଥିବା ଏକ କାର୍ ବାଇକ୍କୁ ଧକ୍କା ଦେଇଥିଲା । ଫଳରେ ଯୁବକ ଦ୍ୱୟଙ୍କ ମୃତ୍ୟୁ ଘଟିଥିଲା । ଏହା ଦେଖି କାର୍ ଚାଳକ ଗାଡ଼ି ଛାଡ଼ି ଫେରାର ହୋଇଥିଲା । ଦୁର୍ଘଟଣା ହୋଇଥିବା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ସଇନ୍ତଳା ଥାନା ପୋଲିସ ଘଟଣାସ୍ଥଳରେ ପହଞ୍ଚିଥିଲା । ସେଠାରେ ପହଞ୍ଚି ମୃତଦେହ ଦ୍ୱୟ ଜବତ କରି ବ୍ୟବଚ୍ଛେଦ ପାଇଁ ଟିଟିଲାଗଡ଼ ପଠାଇଥିବା ପୋଲିସ ସୂତ୍ରରୁ ଜଣାପଡିଛି । ଏନେଇ ପୋଲିସ ଏକ ମାମଲା ରୁଜୁକରି ଅଧିକ ତଦନ୍ତ କରୁଥିବା ଜଣାପଡିଛି ।
