ନୂଆଦିଲ୍ଲୀ,୨୫/୧୦: ଇଣ୍ଟରନେଟରେ ଏଭଳି ଅନେକ ଘର ଭାଇରାଲ ହୋଇଥାଏ ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଥାଏ। ବିହାରର ସେହିଭଳି ଏକ ଘର ବର୍ତ୍ତମାନ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ବିହାର ସ୍ଥିତ ସହରସା ବାସିନ୍ଦା ଅମିତ ଯାଦବ ଏଭଳି ଏକ କୋଠା ନିର୍ମାଣ କରିଛନ୍ତି ।ତେବେ କଠିନ ପରିଶ୍ରମ ଓ ନିଆରା ପାସନ୍ ପାଇଁ ସେ ସ୍ଥାନୀୟ ଅଞ୍ଚଳବାସୀଙ୍କ ଧ୍ୟାନ ଆକର୍ଷଣ କରିଛନ୍ତି । ମାତ୍ର ୫ ଫୁଟ ଚଉଡ଼ା ଓ ୮୦ ଫୁଟ ଲମ୍ବା ଜାଗାରେ ଅମିତ ଏକ ୬ ମହଲା ବିଶିଷ୍ଟ ଅଟ୍ଟାଳିକା ନିର୍ମାଣ କରିଛନ୍ତି । ଯାହା ଏବେ ମୁଖ୍ୟ ଆକର୍ଷଣ ହୋଇଛି ।
ତେବେ ଅମିତ ବ୍ୟବସାୟ ଉଦ୍ଦେଶ୍ୟରେ ଏହି ଅଟ୍ଟାଳିକା ନିର୍ମାଣ କରିଛନ୍ତି । ଏଥିରେ ଏକ କପଡ଼ା ଶୋ’ରୁମ୍ ମଧ୍ୟ ଖୋଲିଛନ୍ତି । ବୈଜନାଥପୁର ସ୍ଥିତ ସାବେଲା ଗାଁରେ ଏହି ଅଟ୍ଟାଳିକା ରହିଛି । ନିଆରା ଢାଞ୍ଚା ଲାଗି ଲୋକେ ଏହାକୁ ଆଇଫିଲ ଟାୱାର ନାମରେ ସମ୍ବୋଧନ କରୁଛନ୍ତି । ଆଖପାଖ ଅଞ୍ଚଳର ଲୋକ ଅଟ୍ଟାଳିକାକୁ ଦେଖିବାକୁ ଆସୁଛନ୍ତି ଏବଂ ଏହା ସହ ସେଲ୍ଫି ନେଉଛନ୍ତି । ଅମିତଙ୍କ ଅଟ୍ଟାଳିକା ଏବେ ସେଲ୍ଫି ପଏଣ୍ଟ୍ ହୋଇଛି । ମାତ୍ର ୫ ଫୁଟ ଚଉଡ଼ା ଜାଗାରେ ଏଭଳି ଅଟ୍ଟାଳିକା କେମିତି ନିର୍ମାଣ ହେଲା, ଲୋକଙ୍କୁ ତାହା ଚକିତ କରୁଛି । ଅଟ୍ଟାଳିକା ନିର୍ମାଣ ଲାଗି ଅମିତ କୌଣସି ପେସାଦାର ଇଞ୍ଜିନିୟରଙ୍କ ସାହାଯ୍ୟ ନେଇନାହାନ୍ତି । ନିଜେ ଘରର ନକ୍ସା ପ୍ରସ୍ତୁତ କରି ସ୍ଥାନୀୟ ଶ୍ରମିକଙ୍କ ସାହାଯ୍ୟରେ ୬ ମହଲା ଘର ଠିଆ କରିଥିବା ସେ କହିଛନ୍ତି । ଏହି ନିଆରା ଅଟ୍ଟାଳିକା ନିର୍ମାଣରେ ତାଙ୍କର ୯୦ ଲକ୍ଷ ଟଙ୍କା ଖର୍ଚ୍ଚ ହୋଇଛି । କରୋନା ମହାମାରୀ ସମୟରେ ସେ ଅଟ୍ଟାଳିକା ନିର୍ମାଣ ଆରମ୍ଭ କରିଥିଲେ, ଯାହା ଗୋଟିଏ ବର୍ଷରେ ଶେଷ ହୋଇଥିଲା ।