ଝୁମ୍ପୁରା,୦୨/୧୧: ଜଗଦଳା ଡ୍ୟାମ କେନାଲରେ ଖସି ପଡିବା ପରେ ହାତୀପଲ ସହିତ ଗୋଟିଏ ମା ହାତୀ ତା ଛୁଆକୁ ଛାଡ଼ି ଚାଲି ଯାଇଥିଲା । କେନାଲରୁ ବାହାରି ନିକଟସ୍ଥ ଏକ ଘର ଭିତରକୁ ପଶି ଯାଇଛି ହାତୀ ଛୁଆ । ହାତୀ ଛୁଆକୁ ଉଦ୍ଧାର କରି ଜଙ୍ଗଲରେ ଛାଡ଼ିବାକୁ ପ୍ରୟାସ କରୁଛି ବନ ବିଭାଗ । କେନ୍ଦୁଝର ବନଖଣ୍ଡ ଚମ୍ପୁଆ ରେଞ୍ଜ ମଲଦା ଫରେଷ୍ଟବିଟ ଅନ୍ତର୍ଗତ ଜଗଦଳା ଡ୍ୟାମ ନିକଟରେ ଶନିବାର ଦେଖିବାକୁ ମିଳିଛି ଏହି ଅଭାବନୀୟ ଦୃଶ୍ୟ । 

ସୂଚନା ମୁତାବକ, ଶନିବାର ଭୋର ସମୟରେ ଏକ ୧୩ ଟିକିଆ ହାତୀପଲ ଗୋଡୁଆଟୋପା ମହାନ୍ତ ସାହି ଆଡୁ ଜଗଦଳା ଡ୍ୟାମ ନାଳ ପାର କରି ନିକଟସ୍ଥ ଜଙ୍ଗଲକୁ ବହୁଡୁଥିଲେ । ଏହି ସମୟରେ ଗୋଟିଏ ହାତୀ ଛୁଆ କେନାଲ ଭିତରେ ଖସି ପଡ଼ିଥିଲା । ଫଳରେ ମା ହାତୀ ଏବଂ ହାତୀପଲ ତାକୁ ସେଠାରେ ଛାଡି ଜଙ୍ଗଲକୁ ଚାଲିଯାଇଥିଲେ । ପରେ ହାତୀ ଛୁଆଟି ସେଠାରୁ ଉଠି ନିକଟସ୍ଥ ଏକ ଘରେ ପଶି ଯାଇଥିଲା । ଏହା ଦେଖି ସ୍ଥାନୀୟଲୋକେ ତୁରନ୍ତ ବନ ବିଭାଗକୁ ଖବର ଦେଇଥିଲେ । ଖବର ପାଇ ବନ ବିଭାଗର ଏକ ଟିମ୍‌ ଗାଁରେ ପହଞ୍ଚିଛି । ବନ ବିଭାଗ କର୍ମଚାରୀମାନେ ରାତିରୁ ହାତୀ ପଲଙ୍କ ଗତି ବିଧି ନିରୀକ୍ଷଣ କରୁଥିବାବେଳେ ଘର ଭିତରୁ ହାତୀ ଛୁଆକୁ ଉଦ୍ଧାର କରିଥିଲେ । ଘଟଣାସ୍ଥଳରେ ବନ ବିଭାଗର ଉଚ୍ଚ ପଦସ୍ଥ ଅଧିକାରୀ ମାନେ ପହଞ୍ଚିବାପରେ ତାକୁ ନିକଟସ୍ଥ ଜଙ୍ଗଲକୁ ନେଇ ମା ହାତୀ ସହିତ ମିଶେଇବା ପାଇଁ ପ୍ରୟାସ କରାଯିବ ବୋଲି ବନ ବିଭାଗ ପକ୍ଷରୁ କୁହାଯାଇଛି ।