ଭୁବନେଶ୍ୱର,୧୨/୧୦ : ରେଳଷ୍ଟେସନରୁ ବାଣୀବିହାର ମାତ୍ର ୫ କିମି ରାସ୍ତା । ଅଟୋରେ ରିଜର୍ଭ କଲେ ୫୦୦ ଟଙ୍କାରୁ କମ୍ ନେଉନାହାନ୍ତି ଅଟୋ ଚାଳକ । ରସୁଲଗଡ଼ରୁ ଲକ୍ଷ୍ମୀସାଗର ମଧ୍ୟ ସମାନ ଦୂରତା। କଟକ ରୋଡରେ ଏତିକି ବାଟ ଗଲେ ଅଟୋ ଭଡ଼ା ୭୦୦ ଟଙ୍କା । ଦୁର୍ଗାପୂଜା ଭିଡ଼ରେ ରାଜଧାନୀରେ ଯାତ୍ରୀଙ୍କୁ ଏମିତି ଲୁଟୁଛନ୍ତି ଅଟୋ ଚାଳକ । ଅପରାହ୍ଣ ୨ଟାରୁ ସିଟି ବସ ବନ୍ଦ ହେବା ପରେ ଅଟୋଚାଳକଙ୍କ କଚେ ପୁଅ ବାର୍ । ସିଟି ବସ୍ ନାହିଁ, ରାସ୍ତାରେ ଟ୍ରାଫିକ୍ ଭିଡ଼ର ବାହାନା ଦେଖାଇ ମନଇଚ୍ଛା ଦର କଷୁଛନ୍ତି। ଏମାନଙ୍କ ଆକାଶଛୁଆଁ ଦର ଦେଖି ଯାତ୍ରୀମାନେ ଚାଲିକି ଯିବାକୁ ପସନ୍ଦ କରୁଛନ୍ତି ।
କମିଶନରେଟ ପୁଲିସ୍ ଦୁର୍ଗାପୂଜା ପାଇଁ ସହର ଭିତରକୁ ଭାରୀଯାନ ନିଷେଧ କରିଛି । ଭାରୀଯାନ ବର୍ଗରେ ‘ସିଟି ବସ୍’ ଯାଉଥିବାରୁ ସକାଳୁ ଅପରାହ୍ଣ ୨ଟା ଯାଏଁ ସିଟି ବସ୍ ଗଡୁଛି । ତା’ ପରଠୁ ସିଟି ବସ ସେବା ବନ୍ଦ । ଏମିତିକି ଏନ୍ଏଚ୍ ୧୬ରେ ଖଣ୍ଡଗିରିଠାରୁ ରସୁଲଗଡ଼ ଯାଏଁ ବି ସିଟି ବସ ଯାତାୟତ କରୁନି । ଯାହାର ଫାଇଦା ଉଠାଉଛନ୍ତି ଅଟୋ ଚାଳକ । ଲାଇନ୍ ଅଟୋଚାଳକମାନେ ୧୦ ଟଙ୍କା ବଦଳରେ ୧୫ ଟଙ୍କା ନେଉଛନ୍ତି । କେହି ରିଜର୍ଭ ପାଇଁ କହିଲେ ତ, କଥା ସରିଲା । ଯାହା ପାଟିକୁ ଆସିଲା, ସେଭଳି ଦର କଷୁଛନ୍ତି । ପ୍ରତିଦିନ କର୍ମସ୍ଥଳକୁ ଯାଉଥିବା ଲୋକେ ସବୁଠାରୁ ବେଶୀ ହଇରାଣ ହେଉଛନ୍ତି । ସନ୍ଧ୍ୟାରେ ଦଶହରା ପେଣ୍ଡାଲ ବୁଲିବାକୁ ବାହାରିଥିବା ଭକ୍ତ ମଧ୍ୟ ଢ଼େର୍ ଖର୍ଚ୍ଚାନ୍ତ ହେଉଛନ୍ତି ।
