ନୟାଗଡ଼, ୨୯/୦୭ : ଭାରସାମ୍ୟ ହରାଇ ଓଲଟିଲା ଶ୍ରମିକଙ୍କୁ ନେଇ ଯାଉଥିବା ଡାଲା ଅଟୋ। ନୟାଗଡ଼ ଜିଲ୍ଲା ଜାକଡ଼ା ନିକଟରେ ଏହି ଦୁର୍ଘଟଣା ଘଟିଛି। ଫଳରେ ଜଣେ ମହିଳା ଶ୍ରମିକଙ୍କ ମୃତ୍ୟୁ ହୋଇଥିବା ବେଳେ ୧୦ ଜଣ ଗୁରୁତର ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ୩ ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି। ସେମାନଙ୍କୁ ଭୁବନେଶ୍ଵର ସ୍ଥାନାନ୍ତର କରାଯାଇଛି। 

ସୂଚନାନୁଯାୟୀ, ନୂଆଗାଁ ଥାନା ଦୁରୁଙ୍ଗି ଗାଁର ୧୭ ଜଣ ମହିଳା ଶ୍ରମିକ ଏକ ଡାଲା ଅଟୋରେ ନିଜ ଗାଁରୁ ମହିତମାକୁ ଧାନ ତଳିପକା କାମରେ ଯାଉଥିଲେ। ଡାଲା ଅଟୋଟି ଦ୍ରୁତ ଗତିରେ ଯାଉଥିବା ଯୋଗୁଁ ଭାରସାମ୍ୟ ହରାଇ ଜାକଡ଼ା ନିକଟରେ ଓଲଟି ପଡିଥିଲା। ଫଳରେ ସମସ୍ତ ମହିଳା ଅଟୋ ଡାଲା ଭିତରେ ଚାପି ହୋଇଯାଇଥିଲେ। ସେମାନଙ୍କ ମଧ୍ୟରୁ ଜଣେ ମହିଳା ଶ୍ରମିକଙ୍କ ମୃତ୍ୟୁ ହୋଇଥିବା ବେଳେ ୧୦ ଜଣ ଗୁରୁତର ଆହତ ହୋଇଛନ୍ତି। ସ୍ଥାନୀୟ ଲୋକମାନେ ଆହତମାନଙ୍କୁ ଉଦ୍ଧାର କରି ମହିପୁର ଏବଂ ନୟାଗଡ ଡାକ୍ତରଖାନାକୁ ପଠାଇଛନ୍ତି। ସେମାନଙ୍କ ମଧ୍ୟରୁ ୩ ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି। ସେମାନଙ୍କୁ ଭୁବନେଶ୍ଵର ସ୍ଥାନାନ୍ତର କରାଯାଇଛି। ଦୁର୍ଘଟଣା ପରେ ଡ୍ରାଇଭର୍ ଫେରାର୍ ହୋଇଯାଇଛି। ନୂଆଗାଁ ପୋଲିସ ଅଟୋକୁ ଥାନାକୁ ଆଣି ତଦନ୍ତ ଆରମ୍ଭ କରିଛି।