ପାଟନା,୧୯/୧୧: ଅନ୍ତିମ ପର୍ଯ୍ୟାୟରେ ପହଞ୍ଚିଛି ମହିଳା ଏସିଆନ ଚମ୍ପିଆନ୍ସ ଟ୍ରଫି ୨୦୨୪ । ଆଜି ଏହି ଟୁର୍ଣ୍ଣାମେଣ୍ଟର ସେମିଫାଇନାଲ ଖେଳାଯିବ । ପ୍ରଥମ ସେମି ଫାଇନାଲ ଚୀନ ଓ ମାଲେସିଆ ମଧ୍ୟରେ ହେବ । ଦ୍ବିତୀୟ ସେମିରେ ଜାପାନ ଓ ଭାରତ ପରସ୍ପରକୁ ଭେଟିବେ । ଆରମ୍ଭରୁ ଅପରାଜେୟ ଥିବା ମହିଳା ହକି ଦଳ ଆଜି ସେମିଫାଇନାଲରେ ଜାପାନକୁ ହରାଇ ଫାଇନାଲରେ ପ୍ରବେଶ କରିବାକୁ ଲକ୍ଷ୍ୟ ରଖିଛି ।
ବିହାରର ରାଜଗିରିରେ ଚାଲିଥିବା ଏସୀୟ ଚମ୍ପିଆନ୍ସ ଟ୍ରଫି ମହିଳା ହକି ପ୍ରତିଯୋଗିତାରେ ଆୟୋଜକ ଭାରତ ଆଜି ସେମିଫାଇନାଲରେ ଜାପାନକୁ ଭେଟିବ । ଅପରାହ୍ନ ୪.୪୫ରେ ଏହି ମ୍ୟାଚ ଖେଳାଯିବ। ସେହିପରି ପ୍ରଥମ ସେମି ମ୍ୟାଚରେ ଚୀନ-ମାଲେସିଆ ମୁହାଁମୁହିଁ ହେବେ । ଏହା ୨ଟା୧୫ରେ ଖେଳାଯିବ । ଦୁଇ ବିଜୟୀ ଦଳ ଫାଇନାଲ ଟିକେଟ ହାସଲ କରିବେ । ଆସନ୍ତାକାଲି (ବୁଧବାର) ଫାଇନାଲ ମ୍ୟାଚ ଖେଳାଯିବ।
ଗ୍ରୁପ ପର୍ଯ୍ୟାୟରେ ଭାରତ ଅପରାଜେୟ ରହିଥିଲା । ଏହି ପ୍ରତିଯୋଗିତାରେ ଭାରତ ୫ଟି ମ୍ୟାଚ ଖେଳି ୨୬ ଗୋଲ କରିଛି । ଶେଷ ଲିଗ ମ୍ୟାଚରେ ଜାପାନକୁ ୩-୦ ଗୋଲରେ ପରାସ୍ତ କରିଥିଲା । ତେଣୁ ଆଜି ସେମି ମୁକାବିଲାରେ ଭାରତର ପଲ୍ଲା ଭାରି ରହିଛି । ଘରୋଇ ଦଳ ନିଶ୍ଚିନ୍ତ ଭାବେ ଜାପାନ ଉପରେ ଚାପ ପକାଇବ । ଅନ୍ୟ ପଟେ ଲିଗ୍ ପର୍ଯ୍ୟାୟରେ ପରାଜୟ ପ୍ରତିଶୋଧ ନେବାକୁ ପ୍ରୟାସ କରିବ ଜାପାନ । ପୂର୍ବ ତ୍ରୁଟିକୁ ସୁଧାରି କମବ୍ୟାକ କରିବାକୁ ଲକ୍ଷ୍ୟ ରଖିଛି ଦଳ ।
