ନୂଆଦିଲ୍ଲୀ,୧୭/୦୮: ନିକଟରେ କ୍ରିକେଟ୍ କିମ୍ବଦନ୍ତୀ ସଚିନ୍ ତେନ୍ଦୁଲକରଙ୍କ ପୁଅ ଅର୍ଜୁନ ତେନ୍ଦୁଲକରଙ୍କ ନିର୍ବନ୍ଧ ସରିଛି । ତାଙ୍କ ନିର୍ବନ୍ଧକୁ ନେଇ ଏବେ ଚର୍ଚ୍ଚା ଜୋର୍ । ବାପା ସଚିନ୍ଙ୍କ ପରି ଭାରତୀୟ କ୍ରିକେଟରେ ସେଭଳି ନାଁ କମାଇ ପାରିନାହାନ୍ତି ଅର୍ଜୁନ ତେନ୍ଦୁଲକର ହେଲେ ବିବାହ ମାମଲାରେ ବାପାଙ୍କ ପଥ ଅନୁସରଣ କରିଛନ୍ତି । ଏପରି କହିବାର ଅର୍ଥ, ସଚିନ୍ଙ୍କଠାରୁ ତାଙ୍କ ପତ୍ନୀ ଅଞ୍ଜଳୀ ୫ ବର୍ଷ ବଡ଼ । ଠିକ୍ ସେହିପରି ଅର୍ଜୁନଙ୍କ ଭାବି ପତ୍ନୀ ମଧ୍ୟ ତାଙ୍କଠୁ ମଧ୍ୟ ବୟସରେ ବଡ଼ । ୨୫ ବର୍ଷୀୟ ଅର୍ଜୁନ ତେନ୍ଦୁଲକର ୨୬ ବର୍ଷୀୟ ସାନିଆ ଚାଣ୍ଡୋକଙ୍କୁ ବିବାହ କରିବେ । ଅଗଷ୍ଟ ୧୩ରେ ଦୁହିଁଙ୍କର ନିର୍ବନ୍ଧ ହୋଇଥିଲା ।
ଅର୍ଜୁନ ଓ ସାନିଆଙ୍କ ମଧ୍ୟରେ ଗୋଟିଏ ବର୍ଷରୁ ଅଧିକ ବୟସ ଗ୍ୟାପ୍ ରହିଛି । ଅର୍ଜନ ତାଙ୍କ ଭାବି ପତ୍ନୀ ସାନିଆଙ୍କଠୁ ବର୍ଷେ ସାନ । ଠିକ୍ ତାଙ୍କ ବାପା ସଚିନ୍ ତେନ୍ଦୁଲକରଙ୍କ ପରି । ସଚିନ୍ଙ୍କ ପତ୍ନୀ ଅଞ୍ଜଳି ତାଙ୍କଠୁ ୫ ବର୍ଷ ବଡ଼ । ୧୯୭୩ରେ ସଚିନ୍ ତେନ୍ଦୁଲକରଙ୍କ ଜନ୍ମ । ପତ୍ନୀ ଅଞ୍ଜଳିଙ୍କ ଜନ୍ମ ୧୯୬୭ରେ । ଦୁହିଁଙ୍କ ମଧ୍ୟରେ ୫ ବର୍ଷର ଫରକ୍ । ୧୯୯୫ରେ ଯେବେ ସଚିନ୍ ବିବାହ କଲେ ତାଙ୍କ ବୟସ ୨୨ ବର୍ଷ ଥିଲା । ଅଞ୍ଜଳିଙ୍କୁ ୨୭ ବର୍ଷ ହୋଇଥିଲା । ଏତେ ବର୍ଷ ତାରତମ୍ୟ ଥାଇ ବି ଦୁହିଁଙ୍କ ମଧ୍ୟରେ ଉତ୍ତର ବୁଝାମଣା ରହିଛି । ଦୁହିଁଙ୍କ ବୈବାହିକ ଜୀବନର କୌଣସି ସମସ୍ୟା ଆସିନାହିଁ ।
ସେହିପରି ଅଗଷ୍ଟ ୧୩ରେ ସାନିଆ ଚଣ୍ଡୋକଙ୍କ ସହ ସଚିନ୍ଙ୍କ ପୁଅ ଅର୍ଜୁନଙ୍କ ନିର୍ବନ୍ଧ ସରିଛି । ୧୯୯୯ ସେପ୍ଟେମ୍ବର ୨୪ରେ ଅର୍ଜୁନଙ୍କ ଜନ୍ମ । ୧୯୯୮ ଜୁନ୍ ୨୩ରେ ସାନିଆଙ୍କ ଜନ୍ମ । ଅର୍ଥାତ୍ ଅର୍ଜୁନଙ୍କଠୁ ସାନିଆ ପ୍ରାୟ ଦେଢ ବର୍ଷ ବଡ଼ । ଭଉଣୀ ସାରାଙ୍କଠୁ ଅର୍ଜୁନ ୨ ବର୍ଷ ସାନ । ବଡ଼ ଉଭଣୀଙ୍କ ବିବାହ ହୋଇନଥିବା ବେଳେ ଅଚାନକ୍ ଅର୍ଜୁନଙ୍କ ନିର୍ବନ୍ଧ ହେବା ସମସ୍ତଙ୍କୁ ଚକିତ କରିଛି ।
