ଟାଙ୍ଗୀ,୩୦/୦୮: ଖୋର୍ଦ୍ଧା ବନଖଣ୍ଡ ରେଞ୍ଜ ଅଞ୍ଚଳରେ ଆଉ ଏକ ଦନ୍ତାହାତୀ ମୃତ । ହାତୀଟିର ମୃତ୍ୟୁର କାରଣ ଅସ୍ପଷ୍ଟ ରହିଥିବା ବେଳେ ଟାଙ୍ଗୀ ରେଞ୍ଜ ଡମଣଭୂଇଁ ଅଞ୍ଚଳର ଭଣ୍ଡାରୀଝର ନିକଟରେ ଦନ୍ତାହାତୀର ମୃତ୍ୟୁ ହୋଇଛି । 

ସୂଚନା ଅନୁଯାୟୀ, ପ୍ରଥମେ ରାମୁ, ତାପରେ ମାମା ହାତୀର ମୃତ୍ୟୁ ଘଟିବା ପରେ ଏବେ ଆଉ ଏକ ଅଘଟଣ । ଖୋର୍ଦ୍ଧା ବନଖଣ୍ଡ ରେଞ୍ଜ ଅଞ୍ଚଳରେ ପ୍ରାଣ ହରାଇଲା ଆଉ ଏକ ଦନ୍ତା ହାତୀ । ହାତୀଟିର ମୃତ୍ୟୁର କାରଣ ମଧ୍ୟ ଅସ୍ପଷ୍ଟ ରହିଛି । ଦନ୍ତା ହାତୀର ମୃତଦେହ ଟାଙ୍ଗୀ ରେଞ୍ଜ ଡମଣଭୂଇଁ ଅଞ୍ଚଳର ଭଣ୍ଡାରୀଝର ନିକଟରେ ପଡ଼ି ରହିଥିଲା । ଘଟଣାସ୍ଥଳରେ ବନବିଭାଗର କର୍ମଚାରୀ ପହଞ୍ଚି ହାତୀଟିର ମୃତଦେହ ଉଦ୍ଧାର କରିବା ସହ ଘଟଣାର ତଦନ୍ତ ଆରମ୍ଭ କରିଛି । ହାତୀ ଆକ୍ରମଣରୁ ରକ୍ଷା ପାଇବା ପାଇଁ ଇଲେକ୍ଟ୍ରି ତାର ବିଛାଇ ଦିଆଯାଇଥିଲା ନା' ବିଷ ପ୍ରୟୋଗ ଦ୍ୱାରା ହାତୀର ମୃତ୍ୟୁ ହୋଇଛି, ତାହା ମୃତ ଦନ୍ତାହାତୀର ବ୍ୟବଛେଦ ପରେ ସ୍ପଷ୍ଟ ହେବ ବୋଲି ବନବିଭାଗ ପକ୍ଷରୁ କୁହାଯାଇଛି । ଅନ୍ୟପଟରେ ଟାଙ୍ଗୀ ବନବିଭାଗ ରେଞ୍ଜ ଇଲାକାରେ ଏବେ ୪୦ରୁ ଉର୍ଦ୍ଧ୍ୱ ହାତୀ ଅଛନ୍ତି ବୋଲି ବନ ବିଭାଗ ପକ୍ଷରୁ କୁହାଯାଇଛି । ଟାଙ୍ଗୀ ବନବିଭାଗ ରେଞ୍ଜ ଅଞ୍ଚଳରେ ହାତୀଙ୍କୁ ସୁରକ୍ଷା ଦେବାରେ ଟାଙ୍ଗୀ ବନବିଭାଗ ଫେଲ ହୋଇଛି  ।