ଭୁବନେଶ୍ୱର,୦୧/୦୯: ରାଜଧାନୀର ରାଜରାସ୍ତାରେ ଅମାନିଆଙ୍କ ରାଜ୍ । କାମ ଦେଉନି ବାରିକେଡ କି କାମ ଦେଉନି କମାରଶାଳ କଣ୍ଟା । ବିଳମ୍ବିତ ରାତିରେ କରୁଛନ୍ତି ଡ୍ରଙ୍କ ଆଣ୍ଡ ଡ୍ରାଇଭ । ପୋଲିସ କମିଶନର ଏବଂ ଡିସିପିଙ୍କ ଉପସ୍ଥିତିରେ କରିଲେ ରିଭର୍ସ ରାଇଡିଂ। ବ୍ୟାରିକେଡ଼ ଭାଙ୍ଗି ଟ୍ରାଫିକ ପୋଲିସ ଉପରେ ଚଢ଼ାଇଲେ ଗାଡ଼ି । ଏକାଧିକ ଟ୍ରାଫିକ କର୍ମୀ ଆହତ । ରାଜଧାନୀ ଭୁବନେଶ୍ୱରରେ ଏଭଳି ଘଟଣା ଘଟିଛି ।
ସୂଚନା ଅନୁଯାୟୀ, ଶତଚେଷ୍ଟା ପରେ ମଧ୍ୟ ଅମାନିଆଙ୍କୁ କାବୁ କରିବା ସମ୍ଭବପର ହେଉନାହିଁ । ପୁଣି ଅମାନିଆ ମଦ୍ୟପ ଚାଳକ ଭିଆଇଲେ କାଣ୍ଡ । ଶନିବାର ରାତିରେ ପୋଲିସ କମିଶନର ଏବଂ ଡିସିପିଙ୍କ ଉପସ୍ଥିତିରେ ବ୍ଲକିଂଚେକିଂ କରାଯାଇଥିଲା । ଏହି ସମୟରେ କିଛି ଅମାନିଆ ପୋଲିସ କମିଶନର ଏବଂ ଡିସିପିଙ୍କ ସାମ୍ନାରେ ରିଭର୍ସ ରାଇଡିଂ କରିଥିଲେ । ବ୍ୟାରିକେଡ଼ ଭାଙ୍ଗି ଟ୍ରାଫିକ ପୋଲିସଙ୍କ ଉପରେ ଗାଡ଼ି ଚଢାଇଥିଲେ । ଏଥିରେ ଏକାଧିକ ଟ୍ରାଫିକ କର୍ମୀ ଆହତ ହୋଇଥିବା ବେଳେ ଦୁର୍ଘଟଣା ଘଟାଇ ଖସି ଯିବାକୁ ଚେଷ୍ଟା କରିଥିଲେ ଅମାନିଆ ଚାଳକ । ଏହି ସମୟରେ ଚାଳକଙ୍କୁ ଗୋଡ଼େଇ ଗୋଡ଼େଇ ଗିରଫ କଲା ପୋଲିସ । ଅମନିଆଙ୍କୁ କାବୁ କରିବା ପାଇଁ ଆଗକୁ ଟୁଇନ୍ ସିଟିରେ ଆହୁରି ଅଧିକ ବ୍ୟାରିକେଡ଼ ଓ କମାରଶାଳ କଣ୍ଟା ପକାଇ କଡା ବ୍ଲକିଂଚେକିଂ କରାଯିବ । ଏଥି ସହିତ ଅନ୍ଧାର ରାସ୍ତାରେ ଲାଇଟ୍ ପାଇଁ ବିଏମସିକୁ ଜଣାଇବା ନେଇ ସୂଚନା ଦେଲେ ଟୁଇନ୍ ସିଟି ପୋଲିସ କମିଶନର ସଞ୍ଜୀବ ପଣ୍ଡା ।
