ଦଶପଲ୍ଲା ୩୦/୦୭: ଅଙ୍ଗନୱାଡ଼ି କେନ୍ଦ୍ରରେ ରୋଷେଇ ବେଳେ ଗ୍ୟାସ୍‌ ଲିକ୍। ହଠାତ୍‌ ହୁତୁହୁତୁ ହୋଇ ଜଳି ଉଠିଥିଲା ଗ୍ୟାସ୍ ପାଇପ୍। ତେବେ ବଡ଼ ଅଘଟଣରୁ ଅଳ୍ପକେ ବର୍ତ୍ତିଗଲେ କୋମଳମତି ଶିଶୁ। ଉପସ୍ଥିତ ବୁଦ୍ଧି ଖଟାଇ ସମସ୍ତ ଶିଶୁଙ୍କୁ ଶ୍ରେଣୀ ଗୃହରୁ ବାହାର କରିବାରେ ସକ୍ଷମ ହେଲେ ଅଙ୍ଗନୱାଡ଼ି କର୍ମୀ ଏବଂ ପାଚିକା। ଏଭଳି ଅଭାବନୀୟ ଘଟଣା ଦଶପଲ୍ଳା ବ୍ଲକ୍‌ର ଟାକରା ଗ୍ରାମନ୍ତର୍ଗତ ତିଳାବାଡି ଅଙ୍ଗନୱାଡ଼ି କେନ୍ଦ୍ର ଘଟିଛି।

ସୂଚନା ମୁତାବିକ, ଆଜି ସକାଳ ପ୍ରାୟ ୯ଟା ସମୟରେ  ତିଳାବାଡି ଅଙ୍ଗନୱାଡ଼ି କେନ୍ଦ୍ରରେ ପାଚିକା ରୋଷେଇ କରିବା ପାଇଁ ଗ୍ୟାସ୍ ଅନ୍ କରିବା ସମୟରେ ଗ୍ୟାସ୍ ଲିକ୍ ଯୋଗୁ ହଠାତ୍ ନିଆଁ ଲାଗିଯାଇଥିଲା  ହଠାତ୍ ନିଆଁ ଲାଗିଯିବାଯୋଗୁଁ  କେହି କିଛି ବୁଝିପାରି ନ ଥିଲେ । ନିଆଁର ପ୍ରକୋପ ଏତେ ଥିଲା ଯେ ରୋଷେଇଘରୁ କ୍ଲାସ୍ ରୁମ୍ ପର୍ଯ୍ୟନ୍ତ ନିଆଁ କ୍ଷଣକ ମଧ୍ୟରେ ବ୍ୟାପିଯାଇଥିଲା । ଆକସ୍ମିକ ଦୁର୍ଘଟଣାକୁ ଏଡାଇବା ପାଇଁ ଅଙ୍ଗନୱାଡ଼ି କର୍ମୀ ସବିତା ନାୟକ ଓ ପାଚିକା ରିତା ବେହେରା  ନିଜ ଜୀବନକୁ ବିପନ୍ନ କରିବା ସହିତ ଉପସ୍ଥିତ ବୁଦ୍ଧି ପ୍ରୟୋଗ କରି ଶିଶୁ ମାନଙ୍କୁ ଶ୍ରେଣୀ ଗୃହ ବାହାର ଖୋଲା ପଡିଆକୁ ନେଇଆସିଥିଲେ । ନିଆଁର କରାଳତାକୁ ଦେଖି ଛୋଟଛୋଟ କୋମଳମତି ଶିଶୁମାନେ ଭୟଭୀତ ହୋଇଯାଇଥିଲେ। ସଙ୍ଗେ ସଙ୍ଗେ ଘଟଣାସ୍ଥଳରେ ଥିବା ଗ୍ରାମବାସୀମାନେ ,ଅଙ୍ଗନୱାଡ଼ି କେନ୍ଦ୍ରରେ ପହଞ୍ଚି ନିଆଁକୁ ଆୟତ କରିଥିଲେ । ତେବେ ଅଙ୍ଗନୱାଡ଼ି କର୍ମୀ, ପାଚିକା ସହାୟିକା ଓ ଗ୍ରାମବାସୀଙ୍କ ଉପସ୍ଥିତ ବୁଦ୍ଧି ଓ ସାହାସିକତା ଯୋଗୁଁ ଆଜି ଅନେକ କୋମଳମତି ଶିଶୁ ବଡ଼ ଦୁର୍ଘଟଣାରୁ ଅଳ୍ପକେ ରକ୍ଷା ପାଇଯାଇଛନ୍ତି ।