ନୂଆଦିଲ୍ଲୀ,୩୦।୩:  ମଣିପୁରର ସୁରକ୍ଷା ଏବଂ ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି କେନ୍ଦ୍ର ସରକାର ସଶସ୍ତ୍ର ବାହିନୀ ସ୍ୱତନ୍ତ୍ର କ୍ଷମତା ଆଇନ (AFSPA)କୁ ଛଅ ମାସ ପାଇଁ ବୃଦ୍ଧି କରିଛନ୍ତି। ଗୃହ ମନ୍ତ୍ରଣାଳୟର ସଦ୍ୟତମ ବିଜ୍ଞପ୍ତି ଅନୁଯାୟୀ, ମଣିପୁରକୁ ୧ ଏପ୍ରିଲ୍, ୨୦୨୫ ରୁ ଛଅ ମାସ ପାଇଁ ପୁଣି ଥରେ 'ଅଶାନ୍ତ ଅଞ୍ଚଳ' ଭାବରେ ଘୋଷଣା କରାଯାଇଛି। ଯଦିଓ ୫ଟି ଜିଲ୍ଲାର ୧୩ଟି ପୋଲିସ ଷ୍ଟେସନ ଅଧୀନରେ ଆସୁଥିବା ଅଞ୍ଚଳଗୁଡ଼ିକୁ ଏଥିରୁ ବାଦ ଦିଆଯାଇଛି। 

ଗୃହ ମନ୍ତ୍ରଣାଳୟ ଦ୍ୱାରା ଜାରି ବିଜ୍ଞପ୍ତିରେ କୁହାଯାଇଛି ଯେ,ମଣିପୁରର କିଛି ଅଞ୍ଚଳରେ ଅଶାନ୍ତି ଏବଂ ହିଂସାର ପରିସ୍ଥିତିକୁ ଦୃଷ୍ଟିରେ ରଖି ଏହି ପଦକ୍ଷେପ ନିଆଯାଇଛି। AFSPA ଅନୁଯାୟୀ, ସଶସ୍ତ୍ର ବାହିନୀକୁ ଯେକୌଣସି ସନ୍ଦିଗ୍ଧ ବ୍ୟକ୍ତିଙ୍କୁ ଗିରଫ କରିବା, ଖୋଜାଖୋଜି କରିବାର ଏବଂ ଆବଶ୍ୟକ ହେଲେ ଗୁଳି ଚଳାଇବାର ଅଧିକାର ଅଛି। ରାଜ୍ୟରେ ଆଇନ ଶୃଙ୍ଖଳା ବଜାୟ ରଖିବା ଏବଂ ଶାନ୍ତି ସୁନିଶ୍ଚିତ କରିବା ପାଇଁ ଏହି ଶକ୍ତିଗୁଡ଼ିକୁ ଗୁରୁତ୍ୱପୂର୍ଣ୍ଣ ବୋଲି ମନେକରାଯାଏ। ବିଶେଷକରି ଏଭଳି ସମୟରେ ଯେତେବେଳେ ରାଜ୍ୟରେ ବିଭିନ୍ନ ଆତଙ୍କବାଦୀ ଗୋଷ୍ଠୀ ଏବଂ ବିଚ୍ଛିନ୍ନତାବାଦୀ ଗିତିବିଧିର ସମ୍ମୁଖୀନ ହୋଇଥାଏ। ତଥାପି, ଏଥର ମଣିପୁରର କିଛି ନିର୍ଦ୍ଦିଷ୍ଟ ଅଞ୍ଚଳ, ଯେଉଁଥିରେ ୧୩ଟି ପୋଲିସ ଷ୍ଟେସନ ଅଞ୍ଚଳ ଅନ୍ତର୍ଭୁକ୍ତ, AFSPAରୁ ମୁକ୍ତ କରାଯାଇଛି। ଏହା ସୂଚାଇ ଦିଏ ଯେ ପରିସ୍ଥିତିରେ କିଛିଟା ଉନ୍ନତି ହୋଇଛି। କେନ୍ଦ୍ର ସରକାର ସେହି ଅଞ୍ଚଳଗୁଡ଼ିକରେ ସୁରକ୍ଷା ସ୍ଥିତିକୁ ସ୍ୱାଭାବିକ ବୋଲି ମାନୁଛନ୍ତି।

ମଣିପୁର ବ୍ୟତୀତ, କେନ୍ଦ୍ର ସରକାର ନାଗାଲାଣ୍ଡ ଏବଂ ଅରୁଣାଚଳ ପ୍ରଦେଶର କିଛି ଅଞ୍ଚଳରେ AFSPA ଅବଧିକୁ ଛଅ ମାସ ବୃଦ୍ଧି କରିଛନ୍ତି। ଏହି ଉଭୟ ରାଜ୍ୟର ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ଏହି ପଦକ୍ଷେପ ନିଆଯାଇଛି। ନାଗାଲାଣ୍ଡର ଦିମାପୁର, ନିଉଲାଣ୍ଡ ଏବଂ ମୋନ୍ ଭଳି ଜିଲ୍ଲାରେ AFSPA ବଳବତ୍ତର ରହିବ। ସେଭଳି ଅରୁଣାଚଳ ପ୍ରଦେଶର କିଛି ସ୍ଥାନରେ ମଧ୍ୟ ଏହି ନିୟମ ଜାରି ରହିବ। ଏହି ରାଜ୍ୟଗୁଡ଼ିକରେ ଆତଙ୍କବାଦୀ କାର୍ଯ୍ୟକଳାପ ଏବଂ ବିଚ୍ଛିନ୍ନତାବାଦୀ ପ୍ରବୃତ୍ତି ଯୋଗୁଁ ସଶସ୍ତ୍ର ବାହିନୀକୁ ଅତିରିକ୍ତ କ୍ଷମତା ଦିଆଯାଇଛି।

AFSPA (ସଶସ୍ତ୍ର ବାହିନୀ ସ୍ୱତନ୍ତ୍ର କ୍ଷମତା ଆଇନ) ଏକ ଆଇନ ଯାହା ଭାରତୀୟ ସେନା ଏବଂ ଅନ୍ୟାନ୍ୟ ସୁରକ୍ଷା ବାହିନୀକୁ ବିଦ୍ରୋହ କିମ୍ବା ଆତଙ୍କବାଦ ଦ୍ୱାରା ପ୍ରଭାବିତ ଅଞ୍ଚଳରେ ଶାନ୍ତି ଏବଂ ସୁରକ୍ଷା ବଜାୟ ରଖିବା ପାଇଁ ବିଶେଷ କ୍ଷମତା ପ୍ରଦାନ କରେ। ଏହି ଆଇନ ଅନୁଯାୟୀ, ସେନାକୁ କୌଣସି କୋର୍ଟଙ୍କ ନିର୍ଦ୍ଦେଶ ବିନା ସନ୍ଦିଗ୍ଧ ବ୍ୟକ୍ତିଙ୍କୁ ଗିରଫ କରିବା, ତଦନ୍ତ କରିବା ଏବଂ ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାର କ୍ଷମତା ମିଳିଥାଏ। ତଥାପି, ଏହି ଆଇନ ବିବାଦୀୟ ମଧ୍ୟ କାରଣ ଏହା ସୁରକ୍ଷା ବାହିନୀକୁ ଅଧିକ କ୍ଷମତା ପ୍ରଦାନ କରେ, ଯାହା କିଛି କ୍ଷେତ୍ରରେ ମାନବାଧିକାର ଉଲ୍ଲଂଘନ ହୋଇପାରେ।