ନୂଆଦିଲ୍ଲୀ,୦୧/୦୪: ଏପ୍ରିଲ ୨ ତାରିଖ ମଧ୍ୟାହ୍ନ ୧୨ ଟା ବେଳେ ଲୋକସଭାରେ ଉପସ୍ଥାପିତ ହେବ ୱାକଫ ସଂଶୋଧନ ବିଲ୍। ଏହି ବିଲ୍ ଉପରେ ଆଲୋଚନା ପାଇଁ ଲୋକସଭା ବାଚସ୍ପତି ଓମ୍ ବିର୍ଲା ଆଠ ଘଣ୍ଟା ସମୟ ନିର୍ଦ୍ଧାରଣ କରିଛନ୍ତି। ତେବେ ବିରୋଧୀ ଦଳ ଏନେଇ ୧୨ ଘଣ୍ଟା ଆଲୋଚନା କରିବାକୁ ଦାବି କରୁଛନ୍ତି। ଏହାକୁ ଦୃଷ୍ଟିରେ ରଖି ଆଲୋଚନା ସରଗରମ ହେବାର ସମ୍ଭାବନା ରହିଛି। ବର୍ତ୍ତମାନ ସରକାର ଫ୍ଳୋର୍ ମ୍ୟାନେଜେଣ୍ଟରେ ଲାଗିପଡ଼ିଛନ୍ତି। ଉଭୟ ଗୃହରେ ଏହି ବିଲ୍ ପାରିତ ହେବାରେ ସରକାର ଯେପରି କୌଣସି ଅସୁବିଧାର ସମ୍ମୁଖୀନ ନହେବେ, ସେନେଇ ଶାସକ ଓ ମେଣ୍ଟ ମାନସମନ୍ଥନ କରିଛନ୍ତି। ତେବେ ଆସନ୍ତୁ ଜାଣିବା କେଉଁ ଦଳ ଏହି ବିଲ୍କୁ ସମର୍ଥନ କରୁଛନ୍ତି ଏବଂ କେଉଁ ଦଳ ଏହାକୁ ବିରୋଧ କରୁଛନ୍ତି।
ଓ୍ବାକଫ ବିଲ୍ର ଯାତ୍ରା:
ସଂସଦୀୟ ବ୍ୟାପାର ଏବଂ ସଂଖ୍ୟାଲଘୁ କଲ୍ୟାଣ ମନ୍ତ୍ରୀ କିରେନ ରିଜିଜୁ ଗତ ବର୍ଷ ଅଗଷ୍ଟ ୮ ତାରିଖରେ ଲୋକସଭାରେ ଏହି ବିଲ୍ ଆଗତ କରିଥିଲେ। ସେତେବେଳେ ବିରୋଧୀମାନେ ଏହି ବିଲ୍କୁ ନେଇ ଅନେକ ସମାଲୋଚନା ଏବଂ ଘମାଘୋଟ ପରିସ୍ଥିତି ସୃଷ୍ଟି କରିଥିଲେ। ଏହା ପରେ ଲୋକସଭା ବାଚସ୍ପତି ଏହି ବିଲକୁ ମିଳିତ ସଂସଦୀୟ କମିଟି (ଜେପିସି) କୁ ପଠାଇଥିଲେ। ଏହି ଜେପିସିର ମୁଖ୍ୟ ଅଛନ୍ତି ବିଜେପି ସାଂସଦ ଜଗଦମ୍ବିକା ପାଲ। ଏହି କମିଟି ଏନଡିଏର ସହଯୋଗୀ ଦଳଙ୍କ ଦ୍ବାରା ଉପସ୍ଥାପିତ ୧୪ ଟି ସଂଶୋଧନ ସହିତ ସଂସଦରେ ଏହାର ରିପୋର୍ଟ ଉପସ୍ଥାପନ କରିଥିଲା। ସେପଟେ ବିରୋଧୀଦଳଙ୍କ ଦ୍ବାରା ୪୪ ଟି ସଂଶୋଧନକୁ ପ୍ରତ୍ୟାଖ୍ୟାନ କରାଯାଇଛି। ଜେପିସି ରିପୋର୍ଟକୁ ଆଧାର କରି କ୍ୟାବିନେଟ ସଂଶୋଧିତ ବିଲକୁ ଅନୁମୋଦନ କରିଛି।
ଓ୍ବାକଫ୍ ସଂଶୋଧନ ବିଲ୍କୁ ନେଇ ବିରୋଧିଙ୍କ ବିରୋଧ ପ୍ରଦର୍ଶନଅଧିକ ପଢ଼ନ୍ତୁ: ‘ସମସ୍ତ ସାଂସଦ ଉପସ୍ଥିତ ରୁହନ୍ତୁ’, ସଂସଦରେ ଓ୍ବାକଫ୍ ସଂଶୋଧନ ବିଲ୍ ପାଇଁ ବିଜେପି ଜାରି କଲା ହ୍ବିପ୍
ଲୋକସଭାର ଗଣିତ:
ବର୍ତ୍ତମାନ ଲୋକସଭାରେ ୫୪୨ ଜଣ ସଦସ୍ୟ ଅଛନ୍ତି। ଲୋକସଭାରେ ବିଜେପି ହେଉଛି ସବୁଠାରୁ ସଂଖ୍ୟାଗରିଷ୍ଠ ଦଳ। ଏହାର ୨୪୦ ସଦସ୍ୟ ଅଛନ୍ତି। ଏଥିରେ ନ୍ୟାସନାଲ ଡେମୋକ୍ରାଟିକ୍ ଆଲାଇନ୍ସ (ଏନ୍ଡିଏ)ରେ ସାମିଲ ଦଳଗୁଡିକର ସମର୍ଥନ ରହିଛି। ବର୍ତ୍ତମାନ ଏନଡିଏରେ ସାମିଲ ଦଳଗୁଡ଼ିକର ଲୋକସଭାରେ ମୋଟ ୨୯୩ ସଦସ୍ୟ ଅଛନ୍ତି। ସେମାନଙ୍କ ମଧ୍ୟରେ ଟିଡିପି ଏବଂ ଜେଡିୟୁ ଭଳି ଦଳ ଅଛନ୍ତି, ଯାହାର ସଦସ୍ୟ ସଂଖ୍ୟା ଦୁଇ ଅଙ୍କରେ ଅଛି। ଏନଡିଏରେ ସାମିଲ ଦଳଗୁଡ଼ିକର ଲୋକସଭାରେ ମୋଟ ୨୯୩ ସଦସ୍ୟ ଅଛନ୍ତି।
ସେହିଭଳି ୱାକଫ ସଂଶୋଧନ ବିଲକୁ ବିରୋଧ କରୁଥିବା ଦଳର ସଦସ୍ୟଙ୍କ ସଂଖ୍ୟା ପ୍ରାୟ ୨୪୫ ଅଟେ। ଏହି ଦଳଗୁଡିକ ମଧ୍ୟରେ ମୁଖ୍ୟତଃ ଇଣ୍ଡି ମେଣ୍ଟରେ ସାମିଲ ଥିବା ଦଳ ରହିଛନ୍ତି। ଏହି ମିଳିତ ମେଣ୍ଟରେ କଂଗ୍ରେସ ହେଉଛି ସବୁଠାରୁ ବଡ଼ ଦଳ। ଲୋକସଭାରେ କଂଗ୍ରେସର ୯୯ ସଦସ୍ୟ ଅଛନ୍ତି। କଂଗ୍ରେସ ବ୍ୟତୀତ କେବଳ ସପା ଏବଂ ତୃଣମୁଳ କଂଗ୍ରେସର ଦୁଇ ଅଙ୍କ ବିଶିଷ୍ଟ ସଦସ୍ୟ ଅଛନ୍ତି। ଲୋକସଭାରେ ସପାର ୩୭ ଜଣ ସଦସ୍ୟ ରହିଥିବା ବେଳେ ତୃଣମୁଳ କଂଗ୍ରେସର ୨୮ ଜଣ ସଦସ୍ୟ ଅଛନ୍ତି। ବିରୋଧୀ ଦଳରେ ଉଦ୍ଧବ ଠାକରେଙ୍କ ଶିବସେନା ଏବଂ ଶରଦ ପାୱାରଙ୍କ ଏନସିପି ମଧ୍ୟ ରହିଛି। ଉଦ୍ଧବ ଠାକରେଙ୍କ ଶିବସେନାର ନଅ ଜଣ ସଦସ୍ୟ ଏବଂ ଶରଦ ପାୱାରଙ୍କ ଏନସିପିରେ ୮ ଜଣ ସଦସ୍ୟ ଅଛନ୍ତି। ତେଣୁ ବିରୋଧୀ ଶିବିରରେ ସର୍ବମୋଟ ୨୪୫ ସଦସ୍ୟ ଅଛନ୍ତି।
ଏମାନଙ୍କ ବ୍ୟତୀତ କିଛି ସ୍ବଧୀନ ସାଂସଦ ମଧ୍ୟ ଅଛନ୍ତି, ଯେଉଁମାନେ ଶାସକ ଏନଡିଏ କିମ୍ବା ବିରୋଧୀ ଇଣ୍ଡି ମେଣ୍ଟରେ ସାମିଲ ନାହାନ୍ତି। ଏମାନେ ଏହି ବିଲ୍କୁ ସମର୍ଥନ କରୁଛନ୍ତି ନା ବିରୋଧ କରୁଛନ୍ତି ତାହା ଏପର୍ଯ୍ୟନ୍ତ ସ୍ପଷ୍ଟ କରି ନାହାଁନ୍ତି। ଏଭଳି ପରିସ୍ଥିତିରେ ବିଜେପି ନେତୃତ୍ୱାଧୀନ ଏନଡିଏର ୨୯୩ ସଦସ୍ୟଙ୍କ ସମର୍ଥନ ରହିଛି, ଯାହା ସଂଖ୍ୟାଗରିଷ୍ଠତା ୨୭୨ ଠାରୁ ଅଧିକ ଅଟେ।
You can also read: ରାଜ୍ୟସଭାରେ ଓ୍ବାକଫ ବୋର୍ଡ ଜେପିସି ରିପୋର୍ଟ ଉପସ୍ଥାପିତ, ଗୃହରେ ବିରୋଧୀଙ୍କ ହଟ୍ଟଗୋଳ
