ମାଲକାନଗିରି/ଚିତ୍ରକୋଣ୍ଡା,୨୧/୯ : ମାଲକାନଗିରି ଜିଲ୍ଲା ଚିତ୍ରକୋଣ୍ଡା ବ୍ଲକସ୍ଥ ସ୍ୱାଭିମାନ ଅଞ୍ଚଳର ଝିଅ ଡାକ୍ତରୀ ପାଠ ପଢିବା ପାଇଁ ମନୋନୀତ ହୋଇଛନ୍ତି । ଦୃଢ ମନୋବଳ  ଓ କଠିନ ପରିଶ୍ରମ ଯୋଗୁଁ  ଡାକ୍ତର ହେବାର ସ୍ୱପ୍ନକୁ ସାକାର କରିପାରିଛନ୍ତି ଦୁର୍ଗମ ସ୍ବାଭିମାନ ଅଞ୍ଚଳର ଝିଅ ଅଙ୍କିତା ବେହେରା। ସେ ଅଲ ଇଣ୍ଡିଆ ନିଟ ପରୀକ୍ଷାରେ ରାଙ୍କ ୯୫୪୨୧ ଏବଂ ଷ୍ଟେଟ ରାଙ୍କରେ ୨୭୬୫ ପାଇଛନ୍ତି। ବର୍ତ୍ତମାନ ସେ ଦ୍ୱିତୀୟ ସିଲେକ୍ସନରେ ଶହୀଦ ଲକ୍ଷ୍ମଣ ନାୟକ ମେଡିକାଲ କଲେଜ କୋରାପୁଟରେ ଡାକ୍ତରୀରେ ପାଠ ପଢିବେ। 

ମାଲକାନଗିରି ଜିଲ୍ଲା ଚିତ୍ରକୋଣ୍ଡା ବ୍ଲକ ସ୍ଵାଭିମାନ ଅଞ୍ଚଳର  ରବୀନ୍ଦ୍ର କୁମାର ବେହେରା ଓ ସୁମତି ବେହେରାଙ୍କ ତୃତୀୟ କନ୍ୟା ଅଙ୍କିତା । ବାପା ରବିନ୍ଦ୍ର ସ୍ୱାଭିମାନ ଅଞ୍ଚଳ ଦୁର୍ଗମ ଅପହଞ୍ଚ ଧୂଳିପୁଟ ଉଚ୍ଚପ୍ରାଥମିକ ବିଦ୍ୟାଳୟ ରେ ଶିକ୍ଷକତା କରନ୍ତି । ମାଆ ଜଣେ ଗୃହଣୀ। ତୁଳସୀ ଦୁଇ ପତ୍ରରୁ ବାସିଲା ପରି ଅଙ୍କିତାଙ୍କ ପାଠ ପଢା ପ୍ରତି ଆଗ୍ରହ ପିଲାଟି ଦିନରୁ ଜଣାପଡିଥିଲା।  

ଅଙ୍କିତା ପ୍ରାଥମିକ ଶିକ୍ଷା ଚିତ୍ରକୋଣ୍ଡା ସରସ୍ବତୀ ଶିଶୁ ବିଦ୍ୟାମନ୍ଦିର ପ୍ରଥମରୁ ପଞ୍ଚମ ଯାଏଁ ପଢିଥିଲେ। ପରେ ନବୋଦୟ ବିଦ୍ୟାଳୟରେ ଷଷ୍ଠରୁ ଯୁକ୍ତ ଦୁଇ ଯାଏଁ ପଢିଥିଲେ। ତା’ପରେ ଦ୍ଵିତୀୟ ଥର ସିଲେକସନରେ ନିଟ ରେ କୃତିତ୍ଵ ହାସଲ କରିଥିଲେ। ସ୍ଵାସ୍ଥ୍ୟ କ୍ଷେତ୍ରରେ ଦୁର୍ଗମ ପାହାଡ଼ିଆ ଅଂଚଳରେ ବିଶେଷ ସୁବିଧା ନଥିବାରୁ ଡାକ୍ତରୀ ହେବାକୁ ଇଚ୍ଛା  କରିଥିଲେ । ସେ ଡାକ୍ତର ହେବା ପରେ ଦୁର୍ଗମ ଅଞ୍ଚଳର ଗରିବ ଲୋକଙ୍କ ସେବା କରିବେ ବୋଲି କହିଛନ୍ତି।