ଆନନ୍ଦପୁର,୧୯/୦୬: ୨୦ ନଂ ଜାତୀୟ ରାଜପଥ ଘଷିପୁରା ଥାନା ଅନ୍ତର୍ଗତ ଶାଳପଡା ନିକଟରେ ସ୍ଥାନୀୟ ଦୋକାନୀ ଏବଂ ଜନସାଧାରଣଙ୍କ ଦ୍ୱାରା ରାସ୍ତାରୋକ କରାଯାଇଛି । ଫଳରେ ରାସ୍ତାରେ ଯାନବାହାନ ଚଳାଚଳ ବାଧାପ୍ରାପ୍ତ ହୋଇଛି। ଉଭୟ ପାର୍ଶ୍ୱରେ ଶହଶହ ଗାଡି ଅଟକି ରହିଛି।
ସୂଚନା ମୁତାବକ, ୨୦ ନଂ ଜାତୀୟ ରାଜପଥ ଶାଳପଡା ନିକଟରେ ଦୀର୍ଘଦିନ ଧରି ରାସ୍ତାକାମ ଅସମ୍ପୂର୍ଣ୍ଣ ରହିଛି । ଫଳରେ ସର୍ଭିସ୍ ରୋଡ୍ରେ ବର୍ଷେରୁ ଅଧିକ ଦିନ ହେବ ଆଇରନ୍ ବୋଝେଇ ଟ୍ରକ୍ ସହ ଯାତ୍ରୀବାହୀ ବସ୍ ଏବଂ ଅନେକ ଗାଡି ଯାତାୟାତ କରୁଛି । ଠିକା ସଂସ୍ଥା ପକ୍ଷରୁ ଧୀମା କାମ କରିବା ସହ ସର୍ଭିସ୍ ରୋଡ୍ ମରାମତି ହେଉନାହିଁ । ଫଳରେ ଖରାଦିନେ ଧୂଳି ଧୂଆଁ ଏବଂ ବର୍ଷାଦିନେ ରାସ୍ତାରେ ଜମୁଛି ଆଣ୍ଠୁଏ ପାଣି । ଯାହା ଫଳରେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ କରିଛନ୍ତି ସ୍ଥାନୀୟ ଦୋକାନୀ ଏବଂ ଜନସାଧାରଣ । ତେଣୁ ତୁରନ୍ତ ଜାତୀୟ ରାଜପଥ କାମ ସମ୍ପୂର୍ଣ୍ଣ କରି ସର୍ଭିସ୍ ରୋଡ୍ ମରାମତି ଦାବିରେ ସ୍ଥାନୀୟ ଦୋକାନୀ ଏବଂ ଜନସାଧାରଣ ରାସ୍ତାରୋକ କରିଛନ୍ତି । ତୁରନ୍ତ ଜାତୀୟ ରାଜପଥ ସମ୍ପୂର୍ଣ୍ଣ କରିବା ସହ ସର୍ଭିସ୍ ରୋଡ୍ ମରାମତି ଦାବି କରିଛନ୍ତି ସ୍ଥାନୀୟ ଦୋକାନୀ ଏବଂ ଜନସାଧାରଣ।
