ଭୁବନେଶ୍ୱର, ୦୩/୧୨: ଦକ୍ଷିଣପଶ୍ଚିମ ବଙ୍ଗୋପସାଗରରେ ଗଭୀର ଅବପାତ, ବାତ୍ୟାରେ ପରିଣତ ହୋଇଛି । ବାତ୍ୟାର ନାଁ ରହିଛି ‘ମିଗଜାଉମ୍’ । ଏହି ନାଁ ଦେଇଛି ମିଆଁମାର । ବାତ୍ୟା ନେଇ ଆନ୍ଧ୍ରପ୍ରଦେଶ ସଂଲଗ୍ନ ଉତ୍ତର ତାମିଲନାଡ଼ୁ-ପୁଡୁଚେରୀ ଉପକୂଳକୁ ଅରେଞ୍ଜ ଆଲର୍ଟ ଜାରି କରିଛି ପାଣିପାଗ ବିଭାଗ ।
ଏବେ ବାତ୍ୟା ‘ମିଗଜାଉମ୍’ ଦକ୍ଷିଣ ପଶ୍ଚିମ ବଙ୍ଗୋପସାଗରରେ ଉତ୍ତରପଶ୍ଚିମ ଦିଗକୁ ଘଣ୍ଟାପ୍ରତି ୫ କିଲୋମିଟର ବେଗରେ ସମୁଦ୍ରରେ ଗତି କରି ବଳ ଗୋଟାଉଛି । ପୁଡୁଚେରୀ ଠାରୁ ବାତ୍ୟା ପୂର୍ବ-ଦକ୍ଷିଣପୂର୍ବ ଦିଗରେ ୩୦୦ କିଲୋମିଟର ଦୂରରେ ରହିଥିବା ବେଳେ ଚେନ୍ନାଇ ଠାରୁ ଦକ୍ଷିଣ ପୂର୍ବ ଦିଗରେ ୩୧୦ କିଲୋମିଟର ଦୂରରେ ରହିଛି ।
ନେଲ୍ଲୋର ଠାରୁ ବାତ୍ୟା ‘ମିଗଜାଉମ୍’ ଦକ୍ଷିଣପୂର୍ବରେ ୪୪୦ କିଲୋମିଟର ଦୂରରେ ରହିଥିବା ବେଳେ ବାପଟଲା ଓ ମଛଲିପାଟଣମ୍ ଠାରୁ ଦକ୍ଷିଣ-ଦକ୍ଷିଣପୂର୍ବରେ ୫୫୦ କିଲୋମିଟର ଦୂରରେ ରହିଛି । ଏହା କ୍ରମଶଃ ଉତ୍ତରପଶ୍ଚିମ ଦିଗକୁ ଗତି କରି ପଶ୍ଚିମ କେନ୍ଦ୍ରୀୟ ବଙ୍ଗୋପସାଗରରେ ପହଞ୍ଚିବ ।
ମାଡ଼ି ଆସୁଛି ବାତ୍ୟା: ବର୍ଷା ଧରି ଓଡ଼ିଶାରେ ପଶିବ, ଉଜାଡ଼ି ଦେବ ଅମଳ ମୁହାଁ ଫସଲ, ୧୩ ଜିଲ୍ଲାକୁ ବର୍ଷା ଆଲର୍ଟ
୪ ତାରିଖ ଅପରାହ୍ଣରେ ବାତ୍ୟା ‘ମିଗଜାଉମ୍’ ଦକ୍ଷିଣ ଆନ୍ଧ୍ରପ୍ରଦେଶ ସଂଲଗ୍ନ ଉତ୍ତର ତାମିଲନାଡ଼ୁ ଉପକୂଳ ପହଞ୍ଚିବ । ଏହା ସମାନ୍ତରଳ ଭାବେ ଦକ୍ଷିଣ ଆନ୍ଧ୍ରପ୍ରଦେଶ ଉପକୂଳ ଦେଇ ନେଲ୍ଲୋରରୁ ମଛଲିପାଟଣମ୍ ମଧ୍ୟରେ ଡିସେମ୍ବର ୫ ତାରିଖରେ ଅତିକ୍ରମ କରିବ । ବାତ୍ୟା ଉପକୂଳ ଅତିକ୍ରମ କରିବା ବେଳେ ଘଣ୍ଟାପ୍ରତି ପବନର ବେଗ ୮୦ରୁ ୯୦ କିଲୋମିଟର ଏବଂ ଘଣ୍ଟାପ୍ରତି ୧୦୦ କିଲୋମିଟର ବେଗର ଝଟକା ପବନ ବହିବ । ଏନେଇ ଭାରତୀୟ ପାଣିପାଗ ବିଭାଗ ସୂଚନା ଦେଇଛି ।
ବାତ୍ୟା ଓଡ଼ିଶାରେ ସିଧା ମାଡ଼ ହେବନି । ହେଲେ ଯେତିକି ପବନ, ବର୍ଷା ଧରି ଓଡ଼ିଶାରେ ପଶିବ, ସେଥିରେ ଉଜାଡ଼ି ଦେବ ଅମଳ ମୁହାଁ ଫସଲ। ବରବାଦ୍ କରିଦେବ ଧାନ, କପା, ମାଣ୍ଡିଆ, କୋବି, ଆଳୁ ଓ ଅନ୍ୟାନ୍ୟ ପନିପରିବା ଫସଲକୁ । ବିଶେଷ କରି ଦକ୍ଷିଣ ଓଡ଼ିଶା ଓ ଉପକୂଳବର୍ତ୍ତୀ ଅଞ୍ଚଳକୁ ବର୍ଷା ଆଶଙ୍କା ଘାରିଲାଣି । ଦକ୍ଷିଣରେ ପ୍ରବଳରୁ ପ୍ରବଳତର ବର୍ଷା ହେବ । ପବନ ବି ୬୦ କିମି ପର୍ଯ୍ୟନ୍ତ ଯାଇପାରେ ।
୩ରୁ ବର୍ଷା ଆରମ୍ଭ ହେବ । ୪ରୁ ବଢ଼ିବ । ଆସନ୍ତା ୫ ଓ ୬ରେ ପ୍ରବଳରୁ ପ୍ରବଳତର ବର୍ଷା ହୋଇପାରେ । ୧୧ ଜିଲ୍ଲାରେ ବର୍ଷା ସମ୍ଭାବନା ଥିବାବେଳେ ଦକ୍ଷିଣର ଅନେକ ସ୍ଥାନରେ ନିର୍ଧୁମ ବର୍ଷା ଆଶଙ୍କା ଅଛି । ଏ ବର୍ଷ ଆରମ୍ଭରୁ ବର୍ଷା ହେଲାନି । ଡେରିରେ ବୁଣାବୁଣି ହେଲା । ଏବେ ଅମଳ ମୁହାଁ ଫସଲ । ଧାନ ପ୍ରାୟତଃ ପାଚି ଯାଇଛି । ଏତିକିବେଳେ ମାଡି ଆସୁଛି ଲଗାଣ ବର୍ଷା ଆଉ ପବନ ।