ଭଞ୍ଜନଗର,୨୮/୩(ଆପ୍ର) ରାଜ୍ୟ ପରିବହନ ବିଭାଗ ପକ୍ଷରୁ ନିର୍ଦ୍ଦେଶନାମା ଜାରି ପରେ ସାରା ରାଜ୍ୟରେ ଆଜି ଦିନକୁ ଜିରୋ ଟଲେରାନ୍ସ ଡେ ଭାବେ ପାଳନ କରାଯାଇଛି। ଗଞ୍ଜାମ ଜିଲ୍ଲାରେ ମଧ୍ୟ ଏହାକୁ ଆଜିଠାରୁ କଡାକଡି ଭାବେ ପାଳନ କରାଯାଇଛି। ଜିଲ୍ଲାର ଛତ୍ରପୁର ଆଞ୍ଚଳିକ ପରିବହନ କାର୍ଯ୍ୟାଳୟ ପକ୍ଷରୁ ଆଜି ୧୨ଟି ଏ ସଂପର୍କିତ ମାମଲା ରୁଜୁ କରାଯାଇଥିବା ବେଳେ ଭଞ୍ଜନଗର ଆଞ୍ଚଳିକ ପରିବହନ କାର୍ଯ୍ୟାଳୟ ପକ୍ଷରୁ ୨ ଟି ମାମଲା ରୁଜୁ କରାଯାଇଛି।
ମଙ୍ଗଳବାର ଖୋଦ ଆଞ୍ଚଳିକ ପରିବହନ ଅଧିକାରୀ ଶୁଭେନ୍ଦୁ ରଞ୍ଜନ ରାୟ ଭଞ୍ଜନଗର ସହରର ବିଭିନ୍ନ ରାସ୍ତାରେ ଚଳପ୍ରଚଳ କରୁଥିବା ଯାନ ବାହାନ ଉପରେ ତୀକ୍ଷ୍ମ ନଜର ରଖିଥିବା ବେଳେ ପ୍ରଥମ ଦିବସରେ ୨ ଜଣ ନାବାଳକ ଗାଡି ଚାଳକଙ୍କୁ ଧରିଥିବା ଜଣାପଡିଛି। ଆଞ୍ଚଳିକ ପରିବହନ ଅଧିକାରୀ ରାୟ ଏସଂପର୍କରେ ଦେଇଥିବା ସୂଚନା ପ୍ରକାରେ ମଙ୍ଗଳବାର ସାରା ରାଜ୍ୟରେ ଗୋଟିଏ ଦିନରେ ଏହି ଜିରା ଟଲେରାନ୍ସ ଡେ ପାଳିତ ହୋଇଛି। ଭଞ୍ଜନଗର ସହରରେ ମଧ୍ୟ ଏଥିପାଇଁ କଡା ନଜର ରଖାଯାଇ ଯାଞ୍ଚ କରାଯାଇଥିବା ବେଳେ ୨ ଜଣ ନାବାଳକ ବାଇକ୍ ଚାଳକ ଧରାପଡି ତଣ୍ଡ ଗଣିଛନ୍ତି। ଏଥିନେଇ ୨ଟି ମାମଲା ରୁଜୁ କରାଯାଇ ପ୍ରତ୍ୟେକ ନାବାଳକଙ୍କୁ ୨୫ ହଜାର ଟଙ୍କା ଲେଖାଏଁ ଜୋରିମାନା ପକା ଯାଇଛି। ସେହିପରି ଧରାପଡ଼ିଥିବା ୨ ଜଣ ନାବାଳକଙ୍କୁ ୨୫ ବର୍ଷ ଯାଏଁ ସର୍ବ ଭାରତୀୟ ସ୍ତରରେ କେଉଁଠି ବି ଡ୍ରାଇଭି° ଲାଇସେନ୍ସ ମିଳିପାରିବ ନାହିଁ ବୋଲି ଆଞ୍ଚଳିକ ପରିବହନ ଅଧିକାରୀ ଶୁଭେନ୍ଦୁ ରଞ୍ଜନ ରାୟ ନିଜ ପ୍ରତିକ୍ରିୟାରେ ଉଲ୍ଲେଖ କରିଛନ୍ତି।
ଆରଟିଓ ଙ୍କ ସୂଚନା ପ୍ରକାରେ ଏଣିକି ଏହି ନିୟମ ରାଜ୍ୟରେ କଡାକଡି ଭାବେ ପାଳନ ହେବ। । ଧରାପଡିବା ନାବାଳକ/ନାବାଳିକା ଙ୍କୁ ୨୫ ବର୍ଷ ଯାଏଁ ଲାଇସେନ୍ସ ମିଳିବ ନାହିଁ। ପରିବାର ର ମୁଖ୍ୟ ଙ୍କୁ ୩ ବର୍ଷ ଜେଲ ଦଣ୍ଡାଦେଶ ହେବ। ପ୍ରତ୍ୟେକ ନାବାଳକ ବାଇକ୍ ଚଳାଉଥିବା ବେଳେ ଧରାପଡିଲେ ୨୫ ହଜାର ଟଙ୍କା ର ଜୋରିମାନା ଦେବାକୁ ବାଧ୍ୟ ହେବେ। ଏଣୁ ପ୍ରତ୍ୟେକ ବ୍ୟକ୍ତି ବିଶେଷ ଏଥିପାଇଁ ସଜାଗ ରହିବା ନିହାତି ଆବଶ୍ୟକ ବୋଲି ସେ ନିଜ ପ୍ରତିକ୍ରିୟାରେ ଉଲ୍ଲେଖ କରିଛନ୍ତି। ଅନ୍ୟ ପକ୍ଷରେ ମୋଟର ଯାନ ଚଳାଚଳ ଅଧିନିୟମ ପ୍ରକାରେ ବିନା ହେଲମେଟ ରେ ଯାତ୍ରା କରିବା, ବିନା ଲାଇସେନ୍ସରେ ଯାତ୍ରା, ଗାଡି ର ସମସ୍ତ କାଗଜପତ୍ର ଠିକ୍ ନଥିଲେ ଧରାପଡି ଅର୍ଥ ଦଣ୍ଡ ରେ ଦଣ୍ଡିତ ହେବ। ଏଣୁ ନାଗରିକ ମାନେ ଏଥିପ୍ରତି ସଜାଗ ଓ ସଚେତନ ରହିବା ଜରୁରୀ ବୋଲି ସେ ଉଲ୍ଲେଖ କରିଛନ୍ତି।
