ବରଗଡ଼,୧୩/୧୨: ବାର୍ଥ ଡେ ପାର୍ଟି କରିବା ନାଁରେ ବୁକ୍ ହୋଇଥିଲା ରୁମ୍ । ହେଲେ ଭିତରେ ବେଧଡ଼କ ଭାବେ ଚାଲିଥିଲା ଜୁଆ ଖେଳ । ବରଗଡ଼ର ହୋଟେଲ ମଙ୍ଗଳମ ପ୍ୟାଲେସରେ ଛତିଶଗଡ ସାରଙ୍ଗଗଡ ଅଞ୍ଚଳର ୨୫ ଜଣ ଜୁଆଡ଼ି ଏବଂ ହୋଟେଲର ମ୍ୟାନେଜରଙ୍କୁ ଗିରଫ କରିଛି ପୋଲିସ । ସେମାନଙ୍କ ପାଖରୁ ୫ଟି ଚାରିଚକିଆ ଗାଡି, ୬ ଲକ୍ଷ ୪୦ ହଜାର ନଗଦ ଟଙ୍କା, ୨୪ଟି ମୋବାଇଲ ସହ ୬ ପ୍ୟାକେଟ ତାସ୍ ଜବତ କରାଯାଇଛି । ଗୋଟିଏ ଜବତ କାରରେ କଂଗ୍ରେସର ଚିହ୍ନ ଥିବାବେଳେ ଅଧ୍ୟକ୍ଷ ଲେଖା ହୋଇଛି । ବରଗଡ଼ ଜିଲ୍ଲାରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ବାର୍ଥ ଡେ ପାର୍ଟି ପାଇଁ ହୋଟେଲ ମଙ୍ଗଳମ ପ୍ୟାଲେସରେ ୨ଟି ରୁମ୍ ବୁକ୍ କରାଯାଇଥିଲା । ଉକ୍ତ ରୁମ୍ରେ ଚାଲିଥିଲା ଜୁଆ ଖେଳ । ଏନେଇ ପୋଲିସ ଏକ ବିଶେଷ ସୂତ୍ରରୁ ଖବର ପାଇଥିଲା । ଖବର ପାଇ ହଠାତ୍ ଉକ୍ତ ହୋଟେଲରେ ଚଢାଉ କରିଥିଲା ପୋଲିସ । ଏହି ଚଢାଉରେ ୫ଟି ଚାରିଚକିଆ ଗାଡି, ୬ ଲକ୍ଷ ୪୦ ହଜାର ନଗଦ ଟଙ୍କା, ୨୪ଟି ମୋବାଇଲ ସହ ୬ ପ୍ୟାକେଟ ତାସ୍ ଜବତ ହୋଇଛି । କେବଳ ସେତିକି ନୁହେଁ, ଏହି ଘଟଣାରେ ସମ୍ପୃକ୍ତ ଥିବା ୨୫ ଜଣ ଜୁଆଡିଙ୍କ ସହ ହୋଟେଲ ମ୍ୟାନେଜରଙ୍କୁ ମଧ୍ୟ ଗିରଫ କରାଯାଇଛି । ସମସ୍ତ ଅଭିଯୁକ୍ତଙ୍କୁ ଶୁକ୍ରବାର କୋର୍ଟ ଚାଲାଣ କରାଯିବ ବୋଲି ସୂଚନା ଦେଇଛନ୍ତି ବରଗଡ଼ ଏସ୍ଡିପିଓ । ତେବେ ବରଗଡ଼ ସହରରେ ଏଭଳି ବେଧଡକ ଜୁଆ ଖେଳ ଚାଲିଥିବା ବେଳେ ପୋଲିସର କାର୍ଯ୍ୟକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
