ପଦ୍ମପୁର, ୨୮/୧୧: ନିଆଁରେ ଭଷ୍ମିଭୂତ ହେଲା ଦଶ ଏକର ଜମିର ଧାନ ଫସଲ । ବିରଜାମ୍ ଗାଁର ଚାଷୀ ନିର ମେହେରଙ୍କ ଚାଷଜମିରେ ନିଆଁ ଲାଗି ବ୍ୟାପକ କ୍ଷୟକ୍ଷତି ହୋଇଛି । ଏହି ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଛି । ବରଗଡ ଜିଲ୍ଲା ପଦ୍ମପୁର ଉପଖଣ୍ଡ ମେଲଛାମୁଣ୍ଡା ଥାନା ଅର୍ନ୍ତଗତ ବିରଜାମ୍ ଗାଁରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ନିଜ ଦଶ ଏକର ଜମିରେ ଧାନ ଚାଷ କରିଥିଲେ ଏବଂ ଅମଳ କରିବା ପରେ ଖଳାରେ ରଖିଥିଲେ ନିର ମେହେର । ସେ ଏକାକି ବୃଦ୍ଧ ମଣିଷ ଧାର କରଜ କରି ବହୁ ପରିଶ୍ରମରେ ଚାଷ କରିଥିଲେ । ହେଲେ ବୁଧବାର ବିଳମ୍ୱିତ ରାତିରେ ସେ ଘରେ ନଥିବା ବେଳେ ଉକ୍ତ ଧାନ ଗଦାରେ ନିଆଁ ଲାଗି ସବୁ ପାଉଁଶ ହୋଇ ଯାଇଥିଲା । ନିଆଁ ଲାଗି ସମସ୍ତ ଫସଲ ନଷ୍ଟ ହୋଇଥିଲା । ଏହା ଦେଖି ସ୍ଥାନୀୟଲୋକେ ତୁରନ୍ତ ଅଗ୍ନିଶମ ବାହିନୀକୁ ଖବର ଦେଇଥିଲେ । ଖବର ପାଇ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିବା ପାଇଁ ଚେଷ୍ଟା କରିଥିଲା । ହେଲେ ନିଆଁ ଚାରିଆଡେ ମାଡ଼ି ଯାଇଥିବାରୁ ତାହା ସମ୍ଭବ ହୋଇ ପାରି ନଥିଲା ।
