ଭୁବନେଶ୍ୱର, ୨୭।୯: ଅମୁକବ୍ରାଣ୍ଡର ପ୍ରସାଧାନ ସାମଗ୍ରୀ କିଣ । ମାଗଣାରେ ମାଲେସିଆରେ ବୁଲିବ । ବିଦେଶୀ ବିଉଟିସିଆନ୍ଙ୍କଠୁ ଗୋଟିଏ ଦିନ ଟ୍ରେନିଂ ନେବ । ଏଭଳି ଲୋଭନୀୟ ଅଫର୍ରେ ୩୬ଜଣ ଓଡ଼ିଆ ବିଉଟିସିଆନ୍ ଫସିଛନ୍ତି । ଜଣଙ୍କ ପିଛା ୬୦ରୁ ୭୦ ହଜାର ଟଙ୍କା ଠକାମିର ଶିକାର ହୋଇଛନ୍ତି । ବଡ଼ କଥା ହେଲା, ଏମାନେ ୨ ଦିନ ଧରି କମିଶନରେଟ ପୁଲିସର ୩ ଥାନା ବୁଲି ସାରିଲେଣି । ହେଲେ କେଉଁଠି ନ୍ୟାୟ ମିଳିନି । ଶେଷରେ ପୀଡ଼ିତାମାନେ ପୁଲିସ କମିଶନରଙ୍କ ଦ୍ୱାରସ୍ଥ ହୋଇଛନ୍ତି ।
ସୂଚନା ମୁତାବକ, ଭୁବନେଶ୍ୱର, ବାଲେଶ୍ୱର ଓ ରାଉରକେଲା ସମେତ ଅନ୍ୟ ସହରରେ ଥିବା ବିଭିନ୍ନ ପାର୍ଲରର ମାଲିକ ତଥା ବ୍ୟୁଟିସିଆନମାନେ ଏହି ଠକାମିର ଶିକାର ହୋଇଛନ୍ତି । ବୈଶାଳୀ ମହାପାତ୍ରଙ୍କ କହିବା ମୁତାବକ, ବାଲେଶ୍ୱର ସହରରେ ଥିବା ନୋଭେଡଲ ସଂସ୍ଥା ପକ୍ଷରୁ ଏଭଳି ଲୋଭନୀୟ ଅଫର୍ ବିଉଟିପାର୍ଲର ସଂଘର ଏକ ହ୍ୱାଟସ୍ଆପ୍ ଗ୍ରୁପ୍ରେ ଆସିଥିଲା । ଉକ୍ତ ସଂସ୍ଥାର ସୀତାକାନ୍ତ ମହାପାତ୍ର ସେମାନଙ୍କ ସହ ଫୋନ୍ରେ କଥା ହୋଇ ପ୍ରଥମେ ସଂସ୍ଥାରୁ ପ୍ରସାଧାନ ସମଗ୍ରୀ କିଣିବାକୁ କହିଥିଲେ । ଏବାବଦକୁ ଜଣଙ୍କ ପିଛା ୬୩ ହଜାରରୁ ୮୨ ହଜାର ଯାଏଁ ଟଙ୍କା ଆଦାୟ କରିଥିଲେ । ସେ ସମସ୍ତଙ୍କୁ ପ୍ରତିଶ୍ରୁତି ଦେଇଥିଲେ, ଗତକାଲି ସମସ୍ତେ ମାଲେସିଆ ଯିବେ । ସମସ୍ତଙ୍କ ନାଁରେ ବିମାନ ଟିକଟ କଟା ସରିଛି ।
ସେଠାରେ ପଞ୍ଚ ତାରକା ହୋଟେଲରେ ରହଣି ବ୍ୟବସ୍ଥା ହୋଇଛି । ବୁଲାବୁଲି ସହ ଟ୍ରେନିଂର ଖର୍ଚ୍ଚ ମଧ୍ୟ ସଂସ୍ଥା ବହନ କରିବ । ମାଲେସିଆ ଯିବା ଆଶାରେ ୩୩ଜଣ ବିଉଟିସିଆନ୍ ବିଭିନ୍ନ ସହରରୁ ପୁରୁଣା ଭୁବନେଶ୍ୱର ନାଗେଶ୍ୱରଟାଙ୍ଗୀ ଅଞ୍ଚଳରେ ଥିବା ଜଣେ ମହିଳାଙ୍କ ଘରେ ପହଞ୍ଚିଥିଲେ । ସମ୍ପୃକ୍ତ ମହିଳା ସୀତାକାନ୍ତଙ୍କ ପାଇଁ ସମସ୍ତ ବିଉଟିସିଆନଙ୍କଠୁ ଟଙ୍କା ଆଦାୟ କରିଥିଲେ । ଗତକାଲି ସକାଳେ ସେଠାରୁ ସମସ୍ତେ ମାଲେସିଆ ଯିବା ପାଇଁ ବିମାନବନ୍ଦର ଅଭିମୁଖେ ବାହାରିଥାନ୍ତେ । ହେଲେ ସୀତାକାନ୍ତ ଓ ସମ୍ପୃକ୍ତ ମହିଳା ଆଉ ଧରାଛୁଆଁ ଦେଲେନି । ଓଲଟି ସେମାନଙ୍କୁ କହିଲେ, ବିମାନ ବାତିଲ ହୋଇଯାଇଛି । ଆଉ କିଛି ଦିନ ଅପେକ୍ଷା କର । ଏହାପରେ ଉଭୟେ ଫୋନ୍ ସୁଇଚ୍ ଅଫ୍ କରିବାରୁ ପୀଡ଼ିତାମାନଙ୍କ ସନ୍ଦେହ ଉପୁଜିଥିଲା । ସେମାନେ ବିମାନବନ୍ଦର କର୍ତ୍ତୃପକ୍ଷଙ୍କ ସହ ଯୋଗାଯୋଗ କରିବାରୁ କୌଣସି ବିମାନ ବାତିଲ ହୋଇନଥିବା ଜାଣିବାକୁ ପାଇଥିଲେ ।
ଗତକାଲି ସନ୍ଧ୍ୟାରେ ପୀଡ଼ିତାମାନେ ପ୍ରଥମେ ଶ୍ରୀଲିଙ୍ଗରାଜ ଥାନାକୁ ଯାଇଥିଲେ । ଉକ୍ତ ଅଞ୍ଚଳରେ ଠକେଇ ହୋଇନାହିଁ ବୋଲି ଦର୍ଶାଇ ପୁଲିସ ସେମାନଙ୍କୁ ଫେରାଇ ଦେଇଥିଲା । ଆଜି ସକାଳେ ପୀଡ଼ିତାମାନେ ଏୟାରପୋର୍ଟ ଥାନା ଓ ତା’ ପରେ ଖାରବେଳନଗର ଥାନାକୁ ଯାଇ ନିରାଶ ହୋଇ ଫେରିଛନ୍ତି । ହେଲେ ସବୁଠି ପୁଲିସ ସେମାନଙ୍କୁ ବିଭିନ୍ନ ଆଳ ଦେଖାଇ ଅଭିଯୋଗ ରଖିଲେନି । ଆଜି ଅପରାହ୍ନରେ ପୀଡ଼ିତାମାନେ ପୁଲିସ କମିଶନରଙ୍କ କାର୍ଯାଳୟରେ ପହଞ୍ଚିଛନ୍ତି । ସୀତାକାନ୍ତ ଓ ସମ୍ପୃକ୍ତ ମହିଳାଙ୍କ ବିରୋଧରେ ଅଭିଯୋଗ କରିଛନ୍ତି । ୩୬ ଜଣଙ୍କଠାରୁ ପ୍ରାୟ ୨୫ ଲକ୍ଷ ଟଙ୍କା ଠକି ନେଇଛନ୍ତି । ଅଭିଯୁକ୍ତଦ୍ୱୟ ପୁର୍ବରୁ ଏହିପରି ଢଙ୍ଗରେ କୋଟିଏରୁ ଅଧିକ ଟଙ୍କା ଠକିଥିବା ସୁରାକ୍ ମିଳିଛି । ହେଲେ ଥାନା ସୀମା ପରିଧିରେ ଅପରାଧ ଘଟିନଥିବା ଆଳ ଦେଖାଇ କମିଶନରେଟ୍ ପୁଲିସର ଗୋଟିଏ ବି ଥାନା ଏମାନଙ୍କ ପାଖ ମାଡ଼ୁନି । ଏମିତିକି ଜିରୋ ଏଫ୍ଆଇଆର୍ ଆଧାରରେ ମଧ୍ୟ ସେମାନଙ୍କ ଅଭିଯୋଗ ରଖୁନି । ସେପଟେ କମିଶନରେଟ୍ ପୁଲିସ ମୁଖ୍ୟାଳୟରେ ଥିବା ସ୍ପେଶାଲ କ୍ରାଇମ୍ ୟୁନିଟ୍ର ଆଣ୍ଟିଫ୍ରଡ ସେଲ୍ ବି ଏତେ ବଡ଼ ଠକେଇର ତଦନ୍ତ କରୁନି ।