ବଡବିଲ, ୧୬।୧୧ ବଡ଼ବିଲ ଥାନା ଅଧୀନ ଏନ୍ ଏଚ ୫୨୦ ଟଣ୍ଟୋ ଏୟାର୍ ଷ୍ଟ୍ରିପ ନିକଟରେ ବାଇକକୁ ଏକ ଟ୍ରକ୍ ଧକ୍କା ଦେବାରୁ ଘଟଣାସ୍ଥଳରେ ୨ ବାଇକ ଆରୋହୀଙ୍କ ମୃତ୍ୟୁ ଘଟିଛି। ମୃତକଙ୍କ ପରିଚୟ ମିଳି ନାହିଁ। ଟ୍ରକଟି ଦୁର୍ଘଟଣା ଘଟାଇ ସେଠାରୁ ଫେରାର ହୋଇଯାଇଛି ।
ଗୁରୁବାର ଅପରାହ୍ନ ସମୟରେ ଏକ ହିରୋ ପାସନ ବାଇକ୍ ( ନଂ ଓଡି ୦୯ ଏ ୨୫୬୪) ଯୋଗେ ଦୁଇଜଣ ଯୁବକ ରୁଗୁଡ଼ି ପଟୁ ଭାଦ୍ରାସାହି ପଟକୁ ଆସୁଥିଲେ । ତେବେ ଦ୍ରୁତ ଗତିରେ ଏକ ଟ୍ରକ୍ ତାଙ୍କୁ ପଛରୁ ଧକ୍କାଦେଇ ଚାଲିଯାଇଥିଲା। ଫଳରେ ଘଟଣା ସ୍ଥଳରେ ହିଁ ଉଭୟଙ୍କର ଶୋଚନୀୟ ମୃତ୍ୟୁ ଘଟିଥିଲା । ଦୁର୍ଘଟଣାଗ୍ରସ୍ତ ବାଇକଟି ସଞ୍ଜୟ ସାହୁ ନାମକ ବ୍ୟକ୍ତିଙ୍କ ନାଁ ରେ ରହିଥିଲା ବେଳେ, ମୃତକଙ୍କ ସଠିକ୍ ପରିଚୟ ମିଳପାରିନାହିଁ । ବଡବିଲ ପୋଲିସ୍ ମୃତକଙ୍କ ପରିଚୟ ଜାଣିବାକୁ ଚେଷ୍ଟା ଚଳାଇବା ସହିତ ଦୁର୍ଘଟଣା ଘଟାଇଥିବା ଟ୍ରକକୁ ଧରିବା ପାଇଁ ଉଦ୍ୟମ ଜାରୀ ରଖିଛି।