ଧଉଳି, ୧୭।୮: ସରଦେଇପୁର-ନିମାପଡା ମୁଖ୍ୟ ରାସ୍ତା ବାଳକାଟି ଭାର୍ଗବୀ ସେତୁ ଉପରେ ଏକ କାର ୨ ସ୍କୁଟିକୁ ଧକ୍କାଦେବାରୁ ଜଣେ ଟ୍ରାଫିକ ପୁଲିସ କର୍ମଚାରୀ ଓ ଅନ୍ୟ ଜଣେ ଅବସରପ୍ରାପ୍ତ ସେନାବାହିନୀ କର୍ମଚାରୀ ଗୁରୁତର ଆହତ ହୋଇଛନ୍ତି l ଆହତ ପୁଲିସ କର୍ମଚାରୀ ହେଲେ ବାଳକାଟି ମୁଦୁଲିସାହିର ହାପି ଓରଫ ଲୋକନାଥ ମୁଦୁଲି ଏବଂ ସେନା କର୍ମଚାରୀ ହେଲେ ଧଉଳି ଥାନା ସରଦେଇପୁର ଗ୍ରାମର ପ୍ରତାପ ଚନ୍ଦ୍ର ସ୍ୱାଇଁ l ଉଭୟଙ୍କୁ ଉଦ୍ଧାର କରି ଚିକିତ୍ସା ନିମନ୍ତେ ପ୍ରଥମେ ବାଳକାଟି ଗୋଷ୍ଠୀସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ l ସେଠାରେ ଅବସ୍ଥା ସଂକଟାପର୍ଣ୍ଣ ହେବାରୁ ଘରୋଇ ସ୍ୱାସ୍ଥ୍ୟକେନ୍ଦ୍ରକୁ ସ୍ଥାନାନ୍ତର କରାଯାଇଛି l 

ପ୍ରାପ୍ତ ସୂଚନା ଅନୁଯାୟୀ ଏକ ଓଲା ସ୍କୁଟିରେ  ହାପି ନିଜ କର୍ମସ୍ଥଳକୁ ଯାଉଥିବା ବେଳେ ପ୍ରତାପ ବାଳକାଟି ବଜାରରୁ ଘରକୁ ଯାଉଥିଲେ l ଏହି ସମୟରେ ସମାନ ଦିଗରୁ ଆସୁଥିବା ଏକ ଦ୍ରୁତଗାମୀ କାର ଭାର୍ଗବୀ ସେତୁ ଉପରେ ଉଭୟଙ୍କୁ ଧକ୍କା ଦେଇଥିଲା l ଫଳରେ ସେମାନେ ରାସ୍ତାରେ ଛିଟିକି ପଡ଼ିଥିଲେ l ଖବରପାଇ ସ୍ଥାନୀୟ ଲୋକେ ଦୁର୍ଘଟଣା ସ୍ଥଳରେ ପହଞ୍ଚି ଉଭୟ ଆହତଙ୍କୁ ସ୍ଥାନୀୟ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିବା ବେଳେ କାରକୁ ଅଟକାଇଥିଲେ l ମାତ୍ର କାର ଚାଳକ ଫେରାର ହୋଇଯାଇଥିଲେ l ଏହି ଦୁର୍ଘଟଣାକୁ ନେଇ ସେଠାରେ ଟ୍ରାଫିକ ସମସ୍ୟା ଉପୁଜିଥିଲା l ଖବରପାଇ ଫାଣ୍ଡି ପୁଲିସ ଦୁର୍ଘଟଣା ସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହ କାରକୁ ଫାଣ୍ଡିକୁ ନେଇଥିଲେ l