ଚନ୍ଦ୍ରଶେଖରପୁର,୦୨।୧୦: ପିଲାଟି ବେଳୁ ସାଙ୍ଗ ହୋଇ ବଢ଼ିଥିଲେ । ଏକାଠି ଖାଉଥିଲେ ପିଉଥିଲେ । ନା ଥିଲା ଝଗଡ଼ା ନା ମାରପିଟ । ମିଳିମିଶି ରାସ୍ତାରେ ବୁଲୁଥିଲେ । ଯେଉଁଠି ପାରୁଥିଲେ ଏକାଠି ଶୋଇ ପଡୁଥିଲେ । ଆଉ ଶେଷରେ ସାଙ୍ଗ ହୋଇ ବି ଚାଲିଗଲେ । ଆମେ କହୁଛୁ ଜଗା ବଳିଆ ଷଣ୍ଢଙ୍କ କଥା । ଏକ ଦୁର୍ଘଟଣାରେ ଜଗା ଓ ବଳିଆ ଦୁହେଁ ଏକାଠି ଆଖିବୁଜି ଦେଇଛନ୍ତି । ଉଭୟଙ୍କ ଅନ୍ତିମ ସଂସ୍କାର କରିଛନ୍ତି ୨ଜଣ ମହିଳା । ଦୁଃଖ ବିଷାଦରେ ଦୁଇ ଜଣଙ୍କୁ ବିଦାୟ ଦେଇଛନ୍ତି ।
ମଙ୍ଗଳବାର ଏଭଳି ଦୃଶ୍ୟ ପଟିଆ-ଇନ୍ଫୋସିଟି ରାସ୍ତାରେ ଦେଖି ପଥଚାରୀ ବି ଭାବବିହ୍ୱଳ ହୋଇ ପଡ଼ିଥିଲେ । ପ୍ରାୟ ୨ବର୍ଷ ତଳେ ଜଗା ବଳିଆଙ୍କ ମା’ ପଲିଥିନ୍ ଖାଇ ମୃତ୍ୟୁମୁଖରେ ପଡ଼ିଥିଲେ । ଦୁହେଁ ଛୋଟ ଛୋଟ ହୋଇଥିବାରୁ ଚନ୍ଦ୍ରଶେଖରପୁର କୋଅ- ପରେଟିଭ୍ କଲୋନୀ ଅଞ୍ଚଳକୁ ଚାଲିଆସିଥିଲେ । ସ୍ଥାନୀୟ ଲୋକେ ୨ ଜଣଙ୍କ ନାମ ଦେଇଥିଲେ ଜଗା ଓ ବଳିଆ । ଖାଇପିଇ ଆଖପାଖ ଅଞ୍ଚଳରେ ବୁଲାବୁଲି କରୁଥିଲେ । ରାତି ହେଲେ ପୁଣି କଲୋନୀକୁ ଫେରି ଆସୁଥିଲେ । ଦୁହିଁଙ୍କ ମୁହଁ ଦେଖି ସକାଳୁ ଘରୁ ବାହାରିଲେ ଶୁଭ ହେଉଥିଲା ବୋଲି ଲୋକେ ବିଶ୍ୱାସ କରୁଥିଲେ । ସବୁଠୁ ବଡ଼ କଥା ହେଉଛି ଯେ ଷଣ୍ଢ ହୋଇ ବି କୌଣସି ଲୋକଙ୍କୁ ମାରିବାକୁ ଗୋଡ଼ାଉ ନଥିଲେ । ଘରର ସଦସ୍ୟ ଭଳି କଲୋନୀ ଲୋକେ ଖାଇବାକୁ ଦେଉଥିଲେ । କେହି କାହାରିକୁ ଦଣ୍ଡେ ଛାଡ଼ି ରହିପାରୁନଥିଲେ ।
ସୋମବାର ରାତିରେ ଶୋଇବାକୁ ଜଗା ବଳିଆ ଇନଫୋସିଟି ରାସ୍ତାକୁ ପଳାଇଥିଲେ । ହେଲେ ସେମାନେ ଜାଣି ନଥିଲେ ଏହି ରାତି ସେମାନଙ୍କ ପାଇଁ ଶେଷ ରାତି ହେବ । ରାତି ୩ଟା ସମୟରେ ସମୟରେ ଏକ ହାଇୱା ଧକ୍କାରେ ଉଭୟଙ୍କର ମୃତ୍ୟୁ ହୋଇଯାଇଥିଲା । ସକାଳୁ ଖବର ପାଇ କଲୋନୀ ବାସିନ୍ଦା, କ୍ଲବ୍ ଟାଉଟ୍ରେ ରହୁଥିବା ସବନମ ଦାସ, ଇବାନଞ୍ଜଲିନ୍, ସୁବାସ ଜେନା ପହଞ୍ଚିଥିଲେ । ସମସ୍ତ ଆଖିରେ ଥାଏ ଲୁହ ଆଉ କୋହ । ଜେସିବି ଡକାଇ ରୀତିନୀତି ଅନୁଯାୟୀ ପାଖ ଏକ ଜଙ୍ଗଲକୁ ନେଇ ଉଭୟଙ୍କ ଅନ୍ତିମ ସଂସ୍କାର କରିଥିଲେ । ତେବେ ପୋତିବା ସମୟରେ ଆଉ ଆଉ ଦୃଶ୍ୟ ସମସ୍ତଙ୍କୁ ଭାବବିହ୍ୱଳ କରିଥିଲା । ଜଗା ବଳିଆ ସହ ମିଶୁଥିବା ଅନ୍ୟ ଗାଈଗୋରୁମାନେ ଗର୍ଜନ କରି ଏଣେତେଣେ ବୁଲିଥିଲେ । ଯେମିତି ଲାଗୁଥିଲା ସେମାନେ ଜଗା ବଳିଆଙ୍କୁ ଖୋଜୁଛନ୍ତି । ଜଗା ବଳିଆଙ୍କ ମୃତ୍ୟୁ ପରେ ଗାଈଗୋରୁଙ୍କ ସୁରକ୍ଷା ପାଇଁ ରାତିରେ ଧୀରେ ଗାଡ଼ି ଚଳାଇବାକୁ ଲୋକେ ଦାବି କରିଛନ୍ତି ।
