ନୂଆଦିଲ୍ଲୀ, ୨୭।୧୨: ପାକିସ୍ତାନର ଚିନ୍ତା ବଢ଼ାଇଲା ତାଲିବାନ । ଆଫଗାନିସ୍ତାନରେ ପାକିସ୍ତାନର ବିମାନ ଆକ୍ରମଣ ପରେ ତିକ୍ତ ହେଲା ପାକ୍-ଆଫ୍ଗାନ ସମ୍ପର୍କ । ପାକିସ୍ତାନକୁ ବିମାନ ଆକ୍ରମଣର କଡ଼ା ଜବାବ ମିଳିବ ବୋଲି ଘୋଷଣା କଲା ତାଲିବାନ ସରକାର । ସୀମାରେ ୧୫ ହଜାରରୁ ଅଧିକ ତାଲିବାନୀ ଲଢ଼ୁଆ ମୁତୟନ ।
ଆଫଗାନିସ୍ତାନରେ ଗତକାଲି ପାକିସ୍ତାନର ବିମାନ ଆକ୍ରମଣ ନେଇ ଏବେ ପାକ୍-ଆଫ୍ଗାନ ସମ୍ପର୍କ ଭୀଷଣ ତିକ୍ତ ହୋଇଉଠିଛି । ପାକିସ୍ତାନକୁ ବିମାନ ଆକ୍ରମଣର କଡ଼ା ଜବାବ ମିଳିବ ବୋଲି ଘୋଷଣା କରିଛି ତାଲିବାନ ସରକାର । କହିରଖୁ କି, ଦୀର୍ଘ ଦଶନ୍ଧି ଧରି ପାକିସ୍ତାନ ରଣନୈତିକ କାରଣରୁ ତାଲିବାନକୁ ପୋଷଣ କରୁଥିବା ବେଳେ ଏବେ ସ୍ଥିତି ବଦଳିଯାଇଛି । ‘ତେହରିକ-ଏ-ତାଲିବାନ ପାକିସ୍ତାନ ସଂଗଠନ ପାକିସ୍ତାନରେ ସେନା ଓ ପୁଲିସକୁ ଟାର୍ଗେଟ୍ କରି ଗୋଟିଏ ପରେ ଗୋଟିଏ ଆକ୍ରମଣ କରୁଥିବାରୁ ଏବେ ଏହି ସଙ୍ଗଠନକୁ ନିପାତ କରିବାକୁ ପାକିସ୍ତାନ ଅଫ୍ଗାନିସ୍ତାନରେ ଏୟାର ଷ୍ଟ୍ରାଇକ୍ କରୁଛି । ପାକିସ୍ତାନ ଏବେ ବଡ଼ ଧରଣର ତାଲିବାନ ଚ୍ୟାଲେଞ୍ଜର ସମ୍ମୁଖୀନ ହୋଇଥିବା ବେଳେ ଏହାକୁ ନେଇ ଆଭ୍ୟନ୍ତରୀଣ ରାଜନୀତି ମଧ୍ୟ ସରଗରମ ହୋଇଛି ।
ତାଲିବାନ ଅଧିକାରୀଙ୍କ କହିବାନୁଯାୟୀ, ଟିଟିପିକୁ ଟାର୍ଗେଟ୍ କରି ପାକିସ୍ତାନ ଗତକାଲି ବିମାନ ଆକ୍ରମଣ କରିଥିବା କହୁଥିବା ବେଳେ ପ୍ରକୃତରେ ଏହା ନିରୀହ ଆଫ୍ଗାନ ନାଗରିକଙ୍କୁ ହତ୍ୟା କରିଛି । କାବୁଲରେ ତାଲିବାନ ମୁଖପାତ୍ର କହିଛନ୍ତି ଯେ, ଆମେ ଆକ୍ରମଣର ପ୍ରତିଶୋଧ ନେବାକୁ ପ୍ରସ୍ତୁତ ରହିଛୁ । ଯେ କୌଣସି ସମୟରେ ଏହାର ଜବାବ ମିଳିବ । ଗୁରୁବାର ପ୍ରାୟ ୧୫ ହଜାର ତାଲିବାନ ଲଢ଼ୁଆ କାବୁଲ, କାନ୍ଦାହାର ଏବଂ ହେରାତରୁ ପାକିସ୍ତାନର ଖୈବର ପଖତୁନଖୱା ପ୍ରଦେଶକୁ ଲାଗିଥିବା ମୀର ଅଲ୍ଲୀ ସୀମାରେ ପହଞ୍ଚିଛନ୍ତି ।
