ନୂଆଦିଲ୍ଲୀ : ମହାକାଶର ଅନେକ ରହସ୍ୟ ପୃଥିବୀରେ ରହୁଥିବା ମାନବଙ୍କ ପାଇଁ ଆଜିବି ଏକ ଅବୁଝା ବିଷୟ ହୋଇ ରହିଛି। ନୋଏଡାର ସ୍କୁଲ୍ ଛାତ୍ର ଏହି କ୍ରମରେ ଏକ ରହସ୍ୟ ଉପରୁ ପରଦା ଉଠାଇ ପୃଥିବୀରୁ ଆକାଶ ଯାଏ ନିଜ ନାମ ଚମକାଇଛନ୍ତି। ଉଲ୍ଲେଖନୀୟ ଯେ , ନୋଏଡାର ଏକ ସ୍କୁଲରେ ପଢୁଥିବା ୯ଶ୍ରେଣୀର ଜଣେ ଛାତ୍ର ମହାକାଶରେ ମାର୍ସ ଓ ଜୁପିଟର ମଧ୍ୟରେ ମେନ୍ ଆଷ୍ଟରଏଡ ବେଲ୍ଟରେ ଏକ ନୂଆ ଆଷ୍ଟରଏଡ୍ ଆବିଷ୍କାର କରିଛନ୍ତି। ଏଥିଯୋଗୁଁ ବିଶ୍ୱର ବଡ଼ ମହାକାଶ ଏଜେନ୍ସି ନାସା ତାଙ୍କୁ ହିଁ ଆଷ୍ଟରଏଡ୍ର ନାମକରଣ କରିବାକୁ ଅନୁମତି ଦେଇଛି।
ଦି ପ୍ରିଣ୍ଟିର ରିପୋର୍ଟ ଅନୁସାରେ , ନ୍ୟାସନାଲ ଏୟରୋନଟିକ୍ସ ଆଣ୍ଡ ସ୍ପେସ୍ ଆଡମିନିଷ୍ଟ୍ରେସନ (ନାସା) ଦ୍ୱାରା ନୋଏଡାର ଶିବ ନାଡର ସ୍କୁଲର ୧୪ବର୍ଷିୟ ଛାତ୍ର ଦକ୍ଷ ମଲିକଙ୍କୁ ଏକ ପ୍ରୋଭିଜନାଲ ଆଷ୍ଟରଏଡ୍ର ଆବିଷ୍କାର ପାଇଁ ମାନ୍ୟତା ଦିଆଯାଇଛି। ଯେମିତି କି, ସାଧାରଣତଃ ହୋଇଥାଏ, ଏହି ଆଷ୍ଟରଏଡର ନାଁ ବର୍ତ୍ତମାନରେ ଏହାର ଆବିଷ୍କାର ବର୍ଷର ଆଧାରରେ ‘2023 OG40 ’ରଖା ଯାଇଛି,କିନ୍ତୁ ଖୁବ୍ ଶୀଘ୍ର ଦକ୍ଷ ମଲିକ୍ଙ୍କୁ ଏଥିପାଇଁ ଏକ ସ୍ଥାୟୀ ନାଁ ଚୟନ କରିବାର ସମ୍ମାନ ମିଳିବ।
ଦକ୍ଷ ମଲିକ୍ କହିଛନ୍ତି , ମୁଁ ପିଲାଦିନୁ ହିଁ ମହାକାଶ ବିଷୟରେ ଜାଣିବାକୁ ଆଗ୍ରହ ରଖି ଥିଲି। ମୁଁ ନ୍ୟାସନାଲ ଜିୟୋଗ୍ରାଫିକ୍ ଉପରେ ଗ୍ରହ ଓ ସୌର ମଣ୍ଡଳ ବିଷୟରେ ନିର୍ମିତ ସବୁ ଡକ୍ୟୁମେଣ୍ଟ୍ରିଜ୍ ଦେଖୁଥିଲି। ଏହା ଏକ ସ୍ୱପ୍ନ ସତ ହେବା ଭଳି।
ଦକ୍ଷ ମଲିକ ଓ ତାଙ୍କର ସ୍କୁଲର କିଛି ବନ୍ଧୁ ଗତ ଦେଢ ବର୍ଷରୁ ଇଣ୍ଟରନ୍ୟାସନାଲ ଆଷ୍ଟରଏଡ୍ ଡିସ୍କଭରୀ ପ୍ରୋଜେକ୍ଟ (ଆଇଏଡିପି)ର ପାର୍ଟ ଭାବେ ମହାକାଶରେ ଆଷ୍ଟରଏଡ୍ର ଆବିଷ୍କାର କରୁ ଥିଲେ। ତାଙ୍କୁ ଏହି ସୁଯୋଗ ସେତେବେଳେ ମିଳିଲା, ଯେବେ ସ୍କୁଲର ଆଷ୍ଟ୍ରୋନମି କ୍ଲବ୍ ୨୦୨୨ର ଇଣ୍ଟରନ୍ୟାସନାଲ ଆଷ୍ଟ୍ରୋନମିକାଲ ସର୍ଚ୍ଚ କୋଲାବ୍ରେସନ (ଆଇଏଏସସି) ବିଷୟରେ ଏକ ଇମେଲ ପଠାଇ ଥିଲା।
IASC ହେଉଛି ନାସା ସହ ଜଡ଼ିତ ଏକ ନାଗରିକ ବିଜ୍ଞାନ ( ସିଟିଜନ ସାଇନ୍ସ) କାର୍ଯ୍ୟକ୍ରମ ଯାହାକି, ସାରାବିଶ୍ୱର ଲୋକ ଓ ଛାତ୍ରଙ୍କୁ ନିଜର ଡାଟାସେଟ୍ ଓ ସଫ୍ଟୱେୟାରର ବ୍ୟବହାର କରି ନାସାକୁ ନୂଆ ଆଷ୍ଟରଏଡ୍ସର ଆବିଷ୍କାର କରିବାରେ ସାହାଯ୍ୟ କରିବାକୁ ନିମନ୍ତ୍ରିତ କରିଥାଏ। ଏସଟିଇଏମ ଓ ସ୍ପେସ୍ ସଙ୍ଗଠନ ଓ IASC ଦ୍ୱାରା ପରିଚାଳିତ ଆଇଏଡିପିରେ ପ୍ରତିବର୍ଷ ସାରା ବିଶ୍ୱରୁ ୬୦୦୦ରୁ ଅଧିକ ପ୍ରତିଭା ଭାଗ ନିଅନ୍ତି ଏବଂ ପ୍ରତିବର୍ଷ କିଛି ନୂଆ ଆଷ୍ଟ୍ରଏଡର ଆବିଷ୍କାର କରିବାରେ ସଫଳ ହୋଇଥାନ୍ତି। ଆଇଏଏସସିର ୱେବସାଇଟ୍ ଅନୁସାରେ , ଦକ୍ଷଙ୍କ ପୂର୍ବରୁ ଭାରତର ଆଉ ୫ ଛାତ୍ର ନାମିତ ଆଷ୍ଟ୍ରଏଡ୍ର ଆବିଷ୍କାର କରିବାରେ ସଫଳ ହୋଇଛନ୍ତି।
