କାନ୍ବେରା, ୦୪/୦୫: ଅଷ୍ଟ୍ରେଲିଆ ସାଧାରଣ ନିର୍ବାଚନରେ ଲେବର ପାର୍ଟି ପୁଣି ବିଜୟୀ ହୋଇଛି । ସନ୍ଧ୍ୟା ସୁଦ୍ଧା ୫୫% ଭୋଟ ଗଣତି ହୋଇଥିବାବେଳେ ଲେବର ପାର୍ଟି ୮୯ ଆସନ ଜିତିଛି । ବିରୋଧୀ ଲିବେରାଲ-ନ୍ୟାସନାଲ ମେଣ୍ଟକୁ କେବଳ ୩୬ ଆସନ ମିଳିଛି । ବିଜୟୀ ହେବା ପାଇଁ ୭୬ ଆସନ ଆବଶ୍ୟକ ହୋଇଥାଏ । ଲେବର ପାର୍ଟି ଜିତିବା ଫଳରେ ଆନ୍ଥୋନି ଆଲ୍ବାନିଜ୍ ଦ୍ୱିତୀୟ ଥର ଲାଗି ପ୍ରଧାନମନ୍ତ୍ରୀ ହେବା ସ୍ପଷ୍ଟ ହୋଇଛି । ଅଷ୍ଟ୍ରେଲିଆରେ ୨୧ ବର୍ଷରେ କୌଣସି ନେତା ଲଗାତର ଦ୍ୱିତୀୟ ଥର ପ୍ରଧାନମନ୍ତ୍ରୀ ହେବାରେ ଆଲ୍ବାନିଜ ପ୍ରଥମ । ଏହା ପୂର୍ବରୁ ୨୦୦୪ରେ ଲିବେରାଲ ପାର୍ଟିର ଜନ୍ ହାୱାର୍ଡ ଲଗାତର ଦ୍ୱିତୀୟ ଥର ନିର୍ବାଚନ ଜିତିଥିଲେ । ବିରୋଧୀଙ୍କ ପକ୍ଷରୁ ପ୍ରଧାନମନ୍ତ୍ରୀ ପ୍ରାର୍ଥୀ ହୋଇଥିବା ପିଟର ଡଟନ ନିଜ ସିଟ୍ରୁ ହାରିଛନ୍ତି । ପ୍ରକାଶଥାଉ କି, ଭାରତ ଭଳି ଅଷ୍ଟ୍ରେଲିଆ ସଂସଦରେ ଦୁଇଟି ଗୃହ ରହିଛି । ଏହାର ୧୫୦ ଆସନ ପାଇଁ ଭୋଟିଂ ହୋଇଛି । ୨୦୨୨ରେ ଆଲ୍ବାନିଜ ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ହୋଇଥିଲେ । କ୍ଷମତାକୁ ଆସିବା ପରେ ତାଙ୍କୁ ବେଶ୍ ଲୋକପ୍ରିୟତା ମଳିଥିଲା । ସେ ପ୍ରାୟ ୩୦ ବର୍ଷ ହେଲା ସାଂସଦ ରହିଛନ୍ତି ।
ଆଲ୍ବାନିଜ କହିଛନ୍ତି, ଅଷ୍ଟ୍ରେଲିଆର ଜନତା ଅଷ୍ଟ୍ରେଲୀୟ ମୂଲ୍ୟବୋଧକୁ ଭୋଟ ଦେଇଛନ୍ତି । ସମସ୍ତଙ୍କ ପାଇଁ ନ୍ୟାୟ, ଆଶା ଆକାଂକ୍ଷା ଏବଂ ସୁଯୋଗ ଲାଗି ଏହି ଜନାଦେଶ । ଅଷ୍ଟ୍ରେଲିଆର ସେବା କରିବାକୁ ସୁଯୋଗ ଦେବା ତାଙ୍କ ପାଇଁ ବଡ଼ ସମ୍ମାନ । ଏବେର ବୈଶ୍ୱିକ ଅସ୍ଥିରତା ଭିତରେ ଅଷ୍ଟ୍ରେଲୀୟମାନେ ଆଶାବାଦ ଏବଂ ସଂକଳ୍ପକୁ ବାଛିଛନ୍ତି । ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କୁ ଶୁଭେଚ୍ଛା ଜଣାଇଛନ୍ତି । ଏକ୍ସରେ ମୋଦି ପୋଷ୍ଟ କରିଛନ୍ତି, ‘ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ଭାବେ ଦ୍ୱିତୀୟ ଥର ନିର୍ବାଚନ ହେବା ଏବଂ ବିପୁଳ ବିଜୟ ହାସଲ କରିଥିବାରୁ ଆନ୍ଥୋନି ଆଲ୍ବାନିଜ୍ଙ୍କୁ ଶୁଭେଚ୍ଛା । ଆପଣଙ୍କ ନେତୃତ୍ୱ ଦକ୍ଷତା ଉପରେ ଅଷ୍ଟ୍ରେଲିଆବାସୀଙ୍କର ପୂର୍ଣ୍ଣ ଭରସା ଥିବା ଏହି ବିଜୟ ଦର୍ଶାଉଛି । ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଗଭୀର ରଣନୈତିକ ଭାଗିଦାରୀକୁ ଆହୁରି ମଜଭୁତ କରିବା ଏବଂ ଭାରତ ପ୍ରଶାନ୍ତ ମହାସାଗରୀୟ କ୍ଷେତ୍ରରେ ଶାନ୍ତି, ସ୍ଥିରତା ଏବଂ ସମୃଦ୍ଧି ଦିଗରେ ମିଳିତ ଭାବେ କାମ କରିବା ପାଇଁ ଉତ୍ସୁକ ଅଛ
