ଶ୍ରୀନଗର,୨୮/୦୩: ଜମ୍ମୁକାଶ୍ମୀର କାଠୁଆରେ ସୁରକ୍ଷାବାହିନୀ ଓ ଆତଙ୍କବାଦୀଙ୍କ ମଧ୍ୟରେ ଗତକାଲି (ଗୁରୁବାର) ଗୁଳି ବିନିମୟ ଘଟିଛି । ଏଥିରେ ୩ ଜଣ ପୋଲିସ ଶହୀଦ ହୋଇଥିବାବେଳେ ଜଣେ ଡିଏସପିଙ୍କ ସମେତ ୩ ପୋଲିସ ଓ ଯବାନ ଆହତ ହୋଇଛନ୍ତି । ଆହତ ଯବାନ ଓ ପୋଲିସଙ୍କୁ ଜମ୍ମୁ ମେଡିକାଲ କଲେଜରେ ଭର୍ତ୍ତି କରାଯାଇଛି । ଅନ୍ୟପକ୍ଷରେ ସୁରକ୍ଷାବାହିନୀଙ୍କ ଗୁଳିରେ ୩ ଜଣ ଆତଙ୍କୀ ନିପାତ ହୋଇଛନ୍ତି । ଅନ୍ୟ ଆତଙ୍କୀଙ୍କୁ ଧରିବାକୁ ଜିଲ୍ଲାର ବିଭିନ୍ନ ଅଞ୍ଚଳରେ ସର୍ଚ୍ଚ ଅପରେସନ ଜାରି ରହିଛି ।
ସୂଚନା ଅନୁସାରେ, କାଠୁଆ ଜିଲ୍ଲାର ଜୁଠାନା ଜଙ୍ଗଲରେ ୫ ଜଣ ଆତଙ୍କବାଦୀ ଲୁଚିଥିବା ନେଇ ଗୁଇନ୍ଦା ପକ୍ଷରୁ ଖବର ମିଳିଥିଲା । ଏହା ପରେ ସୁରକ୍ଷାବାହିନୀ ଓ ପୋଲିସର ମିଳିତ ଟିମ୍ ସେଠାକୁ ଯାଇ ତଲାସୀ ଆରମ୍ଭ କରିଥିଲା । ସ୍ପେଶାଲ ଅପରେସନ ଗ୍ରୁପ, ସେନା, ବିଏସଏଫ ଓ ସିଆରପିଏଫ ଯବାନଙ୍କ ମିଳିତରେ ଉକ୍ତ ସ୍ଥାନକୁ ଘେରାବନ୍ଦୀ କରି ସର୍ଚ୍ଚ ଅପରେସନ ଆରମ୍ଭ କରିଥେଲା ।ଜଖୋଲ୍ ଗାଁ ନିକଟରେ ଉଭୟ ପକ୍ଷ ମୁହାଁମୁହିଁ ହୋଇଥିଲେ । ସୁରକ୍ଷାକର୍ମୀଙ୍କୁ ଦେଖି ଆତଙ୍କୀମାନେ ପ୍ରଥମେ ଗୁଳିମାଡ଼ କରିଥିଲେ । ସୁରକ୍ଷା ବାହିନୀ ପକ୍ଷରୁ ପାଲଟା ଜବାବ ମଧ୍ୟ ଦିଆଯାଇଥିଲା । ଏହି ଏନ୍କାଉଣ୍ଟର ବେଳେ ୫ ଜଣ ପୋଲିସ ଆହତ ହୋଇଥିଲେ । ସେମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । କିନ୍ତୁ ସେଠାରେ ଚିକିତ୍ସାଧୀନ ଅବସ୍ଥାରେ ୩ ଜଣ ଆଖି ବୁଜିଥିଲେ । ସୁରକ୍ଷାବାହିନୀ ଗୁଳିରେ ୩ ଆତଙ୍କୀ ନିପାତ ହୋଇଛନ୍ତି ।
ସେହି ଜଙ୍ଗଲରେ ଆହୁରି ୩ ଜଣ ଆତଙ୍କବାଦୀ ଲୁଚି ରହିଥିବାରୁ ସର୍ଚ୍ଚ ଅପରେସନ ଜାରି ରହିଛି । ଆତଙ୍କବାଦୀଙ୍କୁ ଠାବ କରି ନିପାତ କରିବା ଲାଗି ଅଧିକ ସଂଖ୍ୟକ ସୁରକ୍ଷାକର୍ମୀଙ୍କୁ ପଠାଯାଇଛି । ତଲାସୀ ଅଭିଯାନରେ ଡ୍ରୋନ ନିୟୋଜିତ ହୋଇଛି । ଜମ୍ମୁ-କାଶ୍ମୀର ପୁଲିସ ଡିଜି ନଳୀନ ପ୍ରଭାତ ଘଟଣାସ୍ଥଳରେ ପହଞ୍ଚି ତଲାସୀ ଅଭିଯାନର ତଦାରଖ କରୁଛନ୍ତି । ଲଗାତାର ୪ ଦିନ ହେବ ଆତଙ୍କୀଙ୍କ ବିରୋଧରେ ବଡ ଅପରେସନ ଚାଲିଛି ।
