ବରଗଡ଼, ୦୨/୧୧: ସ୍ତ୍ରୀକୁ ଛୁରି ଭୁସି ହତ୍ୟା କରି ସ୍ୱାମୀର ଆତ୍ମହତ୍ୟା । ଏଭଳି ଅଭାବନୀୟ ଘଟଣା ଘଟିଛି ବରଗଡ଼ ଜିଲ୍ଲା ଭଟଲି ବ୍ଲକ୍ କୁସନପୁରୀ ବିଜୟା ଛକରେ । ମୃତକ ହେଲେ କିଶୋର ଭୁଏ (୩୮) ଓ ସ୍ତ୍ରୀ ସୁନୀତା ଭୁଏ (୩୨) । ପୁଲିସ୍ ମୃତଦେହ ଜବତ କରି ତନାଘନା ଆରମ୍ଭ କରିଛି ।
ପୁଲିସ୍ ସୂଚନା ଅନୁଯାୟୀ, ଅମ୍ବାଭୋନା ଥାନା ଅନ୍ତର୍ଗତ ଦ୍ୱାରୀ ଗାଁର ମୂଳ ବାସିନ୍ଦା କିଶୋର ଓ ସୁନୀତା ୧୪ ବର୍ଷ ତଳେ ପ୍ରେମ ବିବାହ କରିଥିଲେ । କୌଣସି କାରଣରୁ ପ୍ରାୟ ୪ବର୍ଷ ହେଲା ଦମ୍ପତି ଭଟଲିରେ ଭଡ଼ାରେ ରହୁଥିଲେ । ଉଭୟଙ୍କ ଦୁଇ ପୁଅ ଅଛନ୍ତି । ପେସାରେ କିଶୋର ଦିନ ମଜୁରିଆ । ସୁନୀତା ବିଭିନ୍ନ ଘରେ କାମ କରୁଥିଲେ । ଦମ୍ପତି କଠିନ ପରିଶ୍ରମ କରି ପରିବାର ଚଳାଉଥିଲେ । ହେଲେ କୌଣସି କାରଣରୁ ଦାମ୍ପତ୍ୟ ଜୀବନରେ ଝଡ଼ ସୃଷ୍ଟି ହୋଇଥିଲା । ଗୁରୁବାର ରାତିରେ ଉଭୟଙ୍କ ମଧ୍ୟରେ କଳହ ହୋଇଥିଲା । ଏଥିରେ ଉତ୍ତ୍ୟକ୍ତ ହୋଇ କିଶୋର ଛୁରି ଭୁସି ସ୍ତ୍ରୀଙ୍କୁ ହତ୍ୟା କରି ଆତ୍ମହତ୍ୟା କରିଥିବା ଅନୁମାନ କରାଯାଉଛି । ଘର ମାଲିକଙ୍କଠାରୁ ସୂଚନା ପାଇ ଥାନାଧିକାରୀ ବିଭୂତି ଭୂଷଣ ଦଳେଇ ସଦଳବଳ ଘଟଣାସ୍ଥଳରେ ପହଞ୍ଚି ସାଇଣ୍ଟିଫିକ୍ ଟିମ୍ ସହାୟତାରେ ତଦନ୍ତ କରିଛନ୍ତି । ବରଗଡ ଏଏସ୍ପି, ଏସଡିପିଓଙ୍କ ସମେତ ଉଚ୍ଚପଦାଧିକାରୀ ମଧ୍ୟ ତନାଘନା କରିଛନ୍ତି ।
ପ୍ରାଥମିକ ତଦନ୍ତରୁ ମହିଳାଙ୍କ ପେଟରେ ଛୁଟି ଭୁସା ଯାଇଥିବା ସ୍ପଷ୍ଟ ହୋଇଛି । କିଶୋରଙ୍କ ମୃତଦେହ ଓଢ଼ଣିରେ ଝୁଲୁଥିଲା । ତେବେ କିଶୋରଙ୍କ ମରଶରୀରର ଆଣ୍ଠୁରୁ ତଳକୁ ଚଟାଣରେ ଲାଗିଥିଲା । ତେଣୁ ତାଙ୍କର ଆତ୍ମହତ୍ୟା ତଦନ୍ତ ସାପେକ୍ଷ ହୋଇଛି । ଅନ୍ୟପଟେ ସଉନ୍ତାମାଲ ଗ୍ରାମରେ ରହୁଥିବା ମୃତ ସୁନୀତାଙ୍କ ମା’ ଫୁଲତୁଲି ଭଏସାର୍ ସୂଚନା ପାଇ କୁସନପୁରୀରେ ପହଞ୍ଚିଥିଲେ । ଝିଅକୁ ହତ୍ୟା କରାଯାଇଥିବା ନେଇ ସେ ଭଟଲି ଥାନାରେ ଲିଖିତ ଅଭିଯୋଗ କରିଛନ୍ତି । ମୃତ ଦମ୍ପତିଙ୍କ ଦୁଇ ପୁଅ ଘଟଣା ବିଷୟରେ କିଛି କହିପାରୁନାହାନ୍ତି । ହେଲେ ଦାମ୍ପତ୍ୟ କଳହ ପଛର କାରଣ ପରକୀୟା ପ୍ରୀତି ହୋଇଥାଇପାରେ ବୋଲି ଚର୍ଚ୍ଚା ହେଉଛି । ଏହି ଘଟଣାର ରହସ୍ୟ ଉନ୍ମୋଚନ କରିବା ପୁଲିସ୍ ପାଇଁ ଆହ୍ୱାନ ପାଲଟିଛି ।
