ଦିନାଙ୍କ ଥିଲା ଗତ ଫେବ୍ରୁଆରୀ ମାସ ୨୮ ତାରିଖ । ୟୁକ୍ରେନ ରାଷ୍ଟ୍ରପତି ଜେଲେନସ୍କି ପହଞ୍ଚିଥିଲେ ହ୍ୱାଇଟ୍ ହାଉସ୍ରେ ଆମେରିକା ରାଷ୍ଟ୍ରପତି ଟ୍ରମ୍ପଙ୍କ ସହିତ ଆଲୋଚନା କରିବାକୁ- ରୁଷିଆ ସହିତ ଯୁଦ୍ଧରେ ଆମେରିକାର ସମର୍ଥନକୁ ଆଗ ଭଳି ଆଗେଇ ନେବାକୁ ଏବଂ ଏହି ଆଲୋଚନାର ଶେଷରେ ମିନେରାଲ ଡିଲ୍ରେ ସ୍ୱାକ୍ଷର କରିବାର ଥିଲା । ମାତ୍ର ଏହି ଆଲୋଚନା ଯୁକ୍ତିତର୍କ ଭିତରକୁ ଠେଲି ହୋଇଗଲା । ଜେଲେନସ୍କି ରୁଷିଆ ବିରୁଦ୍ଧରେ ବିଷ ଉଦ୍ଗାର କରିଚାଲିଲେ ।
ଏବେ ଟ୍ରମ୍ପ ନେଇଥିବା ଶାନ୍ତି ସ୍ଥାପନ ଓ ଯୁଦ୍ଧ ବନ୍ଦଜନିତ ପଦକ୍ଷେପକୁ ସମାଲୋଚନା କରି କହିଚାଲିଲେ– ଏଇଟା କି ପ୍ରକାର କୂଟନୀତି ଆପଣ ଦେଖାଇବାକୁ ଚାହୁଁଛନ୍ତି! ଏଥିରେ ହସ୍ତକ୍ଷେପ କରି ଉପସ୍ଥିତ ଥିବା ଉପରାଷ୍ଟ୍ରପତି ଜେ.ଡି. ଭାନ୍ସ କହିଥିଲେ- ଏଇଟା ସେଇ ପ୍ରକାରର କୂଟନୀତି ଯାହା ଆପଣଙ୍କ ରାଷ୍ଟ୍ରର ମୃତ୍ୟୁ ଓ ଧ୍ୱଂସର ତାଣ୍ଡବକୁ ବନ୍ଦ କରିବା ପାଇଁ ଉଦ୍ଦିଷ୍ଟ ଓ ଏହା ହଜାର ହଜାର ଲୋକଙ୍କ ଜୀବନ ରକ୍ଷା କରିବାର କୂଟନୀତି । ତେଣୁ ଆପଣ ରାଷ୍ଟ୍ରପତିଙ୍କୁ ଧନ୍ୟବାଦ ଜଣାଇବା ଉଚିତ, ତାଙ୍କ ପଦକ୍ଷେପ ଉପରେ ପ୍ରଶ୍ନ ନଉଠାଇ, କାରଣ ସେ ଆପଣଙ୍କ ରାଷ୍ଟ୍ରକୁ ରକ୍ଷା କରିବାକୁ ଚାହାଁନ୍ତି । ଏ କଥାକୁ ଖାତିର ନକରି ଜେଲେନସ୍କି କହିଚାଲିଲେ ଯୁଦ୍ଧ ଆରମ୍ଭରେ ଓ ମଝିରେ ସମସ୍ତଙ୍କର ସମସ୍ୟା ଥାଏ, ଆପଣଙ୍କର ବି, ଆପଣଙ୍କର ଅନେକ ସୋର୍ସ ଅଛି, ଆପଣ ଅନୁଭବ କରିପାରୁନାହାନ୍ତି, କିନ୍ତୁ ଭବିଷ୍ୟତରେ ଅନୁଭବ କରିବେ।
ଏଥିରେ କ୍ଷୁବ୍ଧ ହୋଇ ଟ୍ରମ୍ପ କହିଲେ- ଆପଣଙ୍କୁ କହିବା ଦରକାର ନାହିଁ କ’ଣ ଆମେ ଅନୁଭବ କରିବୁ । ଆପଣ କାହାକୁ ନିର୍ଦ୍ଦେଶ ଦବା ପୋଜିସନରେ ନାହାନ୍ତି । ଆମେ ଭଲ ଅନୁଭବ କରୁଛୁ, ଶକ୍ତିଶାଳୀ ଅନୁଭବ କରୁଛୁ । ଆପଣ ଲକ୍ଷ ଲକ୍ଷ ମଣିଷଙ୍କ ଜୀବନ ସହିତ ଖେଳ ଖେଳୁଛନ୍ତି, ଆପଣ ତୃତୀୟ ବିଶ୍ୱଯୁଦ୍ଧର ପରିସ୍ଥିତି ସହିତ ଖେଳ ଖେଳୁଛନ୍ତି । ଏହା ଆମ ରାଷ୍ଟ୍ର ପ୍ରତି ଅପମାନ । ଆପଣଙ୍କ ରାଷ୍ଟ୍ର ସଙ୍କଟରେ ଅଛି । ଜଣେ ନେତୃତ୍ୱଙ୍କୁ ସମାଲୋଚନା କରିବା ଗୋଟେ କଥା, ତାଙ୍କ ପଦକ୍ଷେପ ଉପରେ ପ୍ରଶ୍ନ ଉଠାଇବା ଏକଦମ୍ ଅପମାନଜନକ କଥା । ପୁଣି ତାଙ୍କରି ରାଷ୍ଟ୍ରର ଓଭାଲ ଅଫିସ୍ରେ, ଅନେକ ପତ୍ରକାର ଓ ଉଚ୍ଚ ପଦବିସଂପନ୍ନ ଲୋକଙ୍କ ସମ୍ମୁଖରେ । ଜେଲେନସ୍କି ଯାଇଥିଲେ କ’ଣ ପାଇଁ? ଗୋଟେ ଖରାପ ପରିସ୍ଥିତିକୁ ଆହୁରି ଖରାପ କରିଦେଲେ ସେ । ନିଜର ଭାବପ୍ରବଣତା ମାଧ୍ୟମରେ ସେ ଦେଖାଇବାକୁ ଚାହିଁଲେ କେତେ ସ୍ୱଦେଶପ୍ରେମୀ ସିଏ । ତାଙ୍କର ଅହଂକାର ତାଙ୍କ ଉପରେ ସବାର ହୋଇଗଲା ନିଜ ରାଷ୍ଟ୍ରର ସ୍ୱାର୍ଥକୁ ବଳି ଦେଇ । ତାଙ୍କର କ’ଣ କରିବାର ଥିଲା! ମିନେରାଲ ଡିଲ୍ରେ ସ୍ୱାକ୍ଷର କରିଥାନ୍ତେ । କ୍ୟାମେରା ସମ୍ମୁଖରେ ବସି ଫଟୋ ଉଠାଇଥାନ୍ତେ । ଟ୍ରମ୍ପଙ୍କୁ ପ୍ରଶଂସା କରିଥାନ୍ତେ ସମସ୍ତଙ୍କ ସମ୍ମୁଖରେ । ନିଜର ଯୁଦ୍ଧ ପାଇଁ ଯାହା ଯାହା ଆବଶ୍ୟକ ଟ୍ରମ୍ପଙ୍କ ସହିତ ପ୍ରାଇଭେଟରେ ବ୍ୟକ୍ତିଗତ ଭାବେ କହିଥାନ୍ତେ ଓ ତାପରେ ଲଣ୍ଡନ ଚାଲିଯାଇଥାନ୍ତେ । ଏହା ଥିଲା ତାଙ୍କର କର୍ତ୍ତବ୍ୟ । ଏହା ହେଲାନାହିଁ । ଏହି ମିଟିଂ ବିଶୃଙ୍ଖଳା ଆଡ଼କୁ ଗତି କଲା ।
ଟ୍ରମ୍ପ ପରେ ପରେ ପ୍ରତିକ୍ରିୟା ରଖି କହିଲେ- ଏ ଲୋକ ଶାନ୍ତି ଚାହେଁନାହିଁ । ଜେଲେନସ୍କି ଭାବିପାରିଲେ ନାହିଁ ୟୁକ୍ରେନ ଟ୍ରମ୍ପଙ୍କ ଏଜେଣ୍ଡାର ଏକ କ୍ଷୁଦ୍ର ଅଂଶ ମାତ୍ର । ଲଣ୍ଡନ ତ ଚାଲିଗଲେ । ସେଠାରେ ବ୍ରିଟିଶ ପ୍ରଧାନମନ୍ତ୍ରୀ ଷ୍ଟାର୍ମର ଏକ ସମ୍ମିଳନୀ ଆହୂତ କରିଥିଲେ ଅନେକ ୟୁରୋପୀୟ ରାଷ୍ଟ୍ର ମୁଖ୍ୟଙ୍କୁ ନେଇ । ସେଠାରେ ନିଜର ସ୍ଥିତି ସଂପର୍କରେ ଯେବେ ଜେଲେନସ୍କି ରିଆଲିଟି ଚେକ୍ କଲେ ଜାଣିଲେ ସେ କି ଭୁଲ୍ କରିଛନ୍ତି । କାରଣ ଟ୍ରମ୍ପ ତାଙ୍କ ସମର୍ଥନ ପ୍ରତ୍ୟାହାର କରିନେଲେ ସବୁ ୟୁରୋପୀୟାନ ରାଷ୍ଟ୍ର ମିଳିତ ଭାବରେ ରୁଷିଆକୁ ଯୁଦ୍ଧ କ୍ଷେତ୍ରରେ ସମ୍ମୁଖୀନ ହୋଇପାରିବେ ନାହିଁ । ୟୁକ୍ରେନ ପାଇଁ ଆମେରିକାର ସମର୍ଥନ ଓ ସାହାଯ୍ୟ ଏକାନ୍ତ ଆବଶ୍ୟକ । ଆମେରିକା ପାଇଁ ୟୁକ୍ରେନର ନୁହେଁ । ଜେଲେନସ୍କି ୟୁରୋପରେ ସମ୍ମାନ ପାଇପାରନ୍ତି, କିନ୍ତୁ ସୁରକ୍ଷା ଗ୍ୟାରେଣ୍ଟି ନୁହେଁ । ଖାଲି କଥାରେ ପାଇପାରନ୍ତି । ଶବ୍ଦବାଣ ବୁଲେଟକୁ ପ୍ରତିହତ କରିପାରିବ ନାହିଁ । ଏଠାରେ ଉଲ୍ଲେଖନୀୟ, ୟୁକ୍ରେନକୁ ଏଇ ୩ବର୍ଷ ଯୁଦ୍ଧ ମଧ୍ୟରେ ୟୁରୋପର ୨୭ରୁ ଅଧିକ ରାଷ୍ଟ୍ର ମିଶି ଅସ୍ତ୍ରଶସ୍ତ୍ର ଆଦି ସାହାଯ୍ୟ ଦେଇଛନ୍ତି ୫୧ ବିଲିଅନ ଡଲାରର, ମାତ୍ର ଆମେରିକା ଏକା ଦେଇଛି ୨୭ ବିଲିଅନ ଡଲାରର ଅସ୍ତ୍ରଶସ୍ତ୍ର । ଆମେରିକା ସହଯୋଗ ବନ୍ଦ କରିଦେଲେ ଜେଲେନସ୍କିଙ୍କ ପାଇଁ ଖେଳ ଖତମ୍ । ଏଇ ଜ୍ଞାନ ଟ୍ରମ୍ପଙ୍କର ଅଛି । ତାଙ୍କର ଅହଂକାର ହେଉ ଅବା ଦାମ୍ଭିକତା, ଏଇ ଜ୍ଞାନରୁ ହିଁ ଆସିଛି । ସେଥିପାଇଁ ସେ ଯୁକ୍ତିତର୍କର ଶେଷରେ ଗୁରୁତ୍ୱର ସହିତ କହିଲେ- ଆମେ ଅଛୁ ତୁମର ସାହସ ଅଛି, ଆମେ ନାହୁଁ ତୁମର ସାହସ ନାହିଁ । ଓଭାଲ ଅଫିସ୍ରୁ କ୍ଷୁବ୍ଧ ହେଇ ଉଠି ଆସିଥିବା ଜେଲେନସ୍କି ୟୁ-ଟର୍ଣ୍ଣ ନବାକୁ ବାଧ୍ୟହେଲେ ।
ଜାଣିଲେ ଆମେରିକା ବିନା ତାଙ୍କର ଗତ୍ୟନ୍ତର ନାହିଁ । ଏପରିକି ଆମେରିକାର ନ୍ୟୁକ୍ଲିଅର ଛତ୍ରଛାୟା ତଳେ ନିଜକୁ ସୁରକ୍ଷିତ ମଣୁଛନ୍ତି ୟୁରୋପୀୟ ରାଷ୍ଟ୍ରସମୂହ । ଯେବେ ବାଇଡେନ ରାଷ୍ଟ୍ରପତି ଥିଲେ, ଜେଲେନସ୍କିଙ୍କୁ ସମସ୍ତେ କହୁଥିଲେ ସେ ଉଇନଷ୍ଟନ ଚର୍ଚ୍ଚିଲ । ମାତ୍ର ଟ୍ରମ୍ପ ନିର୍ବାଚିତ ହେବା ପରେ ଚିତ୍ରସବୁ ବଦଳି ଯାଇଛି । ଅବଶ୍ୟ ବ୍ରିଟେନ, ଫ୍ରାନ୍ସ ପରମାଣୁ ଶକ୍ତିସଂପନ୍ନ ରାଷ୍ଟ୍ର । ସେମାନଙ୍କ ପାଖରେ ଅଛି ମାତ୍ର ୫୫୦ ନ୍ୟୁକ୍ଲିଅର ୱାରହେଡ୍ । କେବଳ ରୁଷିଆ ପାଖରେ ଅଛି ୫୫୮୦ ନ୍ୟୁକ୍ଲିଅର ୱାରହେଡ୍ । ଅର୍ଥାତ୍ ରୁଷିଆ ଆଗରେ ସେମାନଙ୍କର ଶକ୍ତି ତୁଚ୍ଛ । ପରେ ପରେ ଜେଲେନସ୍କି ସାଉଦିଆରବ ଗଲେ । ସେଠାରେ ତାଙ୍କ ଦେଶର ପ୍ରତିନିଧିଙ୍କ ସହିତ ଆମେରିକାର ପ୍ରତିନିଧିଙ୍କର ମିନେରାଲ ଡିଲ୍ ବିଷୟରେ ଆଲୋଚନା କଲେ ସ୍ୱାକ୍ଷର କରିବା ପାଇଁ । ସେ ସାଉଦିଆରବର କ୍ରାଉନ ପ୍ରିନ୍ସ ମହମ୍ମଦ ବିନ୍ ସଲମନଙ୍କୁ ସାକ୍ଷାତ କରି ଫେରି ଆସିଲେ । ଏକମାସ ପାଇଁ ଯୁଦ୍ଧବିରତି ଚୁକ୍ତିରେ ୟୁକ୍ରେନ ସ୍ୱାକ୍ଷର କଲା, ଯେବେ ଚାପ ପଡ଼ିଲା ଆମେରିକା ଦ୍ୱାରା, ଅସ୍ତ୍ରଶସ୍ତ୍ର ଯୋଗାଣ ସାମୟିକ ଭାବରେ ବନ୍ଦ କରାଗଲା ଓ ମିଲିଟାରୀ ଇଣ୍ଟେଲିଜେନ୍ସ ସହଯୋଗକୁ ହଟାଇ ନିଆଗଲା ।
ଏଠାରେ ଉଲ୍ଲେଖନୀୟ, ଜେଲେନସ୍କିଙ୍କ ପୂର୍ବରୁ ବ୍ରିଟେନ ପ୍ରଧାନମନ୍ତ୍ରୀ ଷ୍ଟାର୍ମର ମଧ୍ୟ ଟ୍ରମ୍ପଙ୍କୁ ସାକ୍ଷାତ କରିବାକୁ ଆସିଥିଲେ । ତାଙ୍କୁ ଉପରାଷ୍ଟ୍ରପତି ଭାନ୍ସ ବି ଆକ୍ରମଣ କରିଥିଲେ । କିନ୍ତୁ ସେ ଯୁକ୍ତି କରିନଥିଲେ । ସେ ସହଜ ସ୍ପଷ୍ଟୀକରଣ ଦେଇଥିଲେ ହସି ହସି । ଫ୍ରାନ୍ସର ରାଷ୍ଟ୍ରପତି ମାକ୍ରନ ବି ଆସିଥିଲେ । ସେ ଟ୍ରମ୍ପଙ୍କ ସହିତ ବନ୍ଧୁତାର ସହିତ ହସି ହସି ଆଲୋଚନା କରିଥିଲେ । କିନ୍ତୁ ଜେଲେନସ୍କି? ଟ୍ରମ୍ପଙ୍କ ସହିତ ଏକ ତିକ୍ତ ତର୍କ ଆରମ୍ଭ କରିଦେଲେ । ପରେ ପରେ ଟ୍ରମ୍ପ ତାଙ୍କ ପ୍ରତିନିଧିଙ୍କୁ ପୁଟିନଙ୍କ ପାଖକୁ ଏକମାସ ଯୁଦ୍ଧବିରତି ପ୍ରସ୍ତାବ ଦେଇ ପଠାଇଥିଲେ । ପୁଟିନ ଟ୍ରମ୍ପଙ୍କ ପ୍ରସ୍ତାବକୁ ଅଗ୍ରାହ୍ୟ କରିନାହାନ୍ତି । ଅଧିକ ସ୍ପଷ୍ଟୀକରଣ ବରଂ ଚାହିଁଛନ୍ତି । ସେ କ୍ଷଣସ୍ଥାୟୀ ବା ସ୍ୱଳ୍ପମିଆଦି ଯୁଦ୍ଧବିରତି ଚାହାନ୍ତି ନାହିଁ । ସଂପୂର୍ଣ୍ଣ ଯୁଦ୍ଧ ବନ୍ଦ ଚାହାନ୍ତି । କିନ୍ତୁ ରୁଷିଆ ଅକ୍ତିଆର କରିଥିବା ୟୁକ୍ରେନର ୨୦% ସୀମା, ତା’ ମଧ୍ୟରେ ଥିବା ଜାପୋରିଝାଝିଆର ବିଶାଳ ନ୍ୟୁକ୍ଲିୟର ପାୱାର ପ୍ଲାଣ୍ଟ ଯାହା ସମଗ୍ର ୟୁରୋପରେ ସବୁଠୁ ବିଶାଳ ତାକୁ ଏତେ ସହଜରେ ଛାଡ଼ିବାକୁ ପ୍ରସ୍ତୁତ ନୁହନ୍ତି । କିନ୍ତୁ ଟ୍ରମ୍ପ କଥା ହେବାକୁ ଚାହିଁଛନ୍ତି ପୁଟିନଙ୍କ ସହିତ । ସେଥିରେ ନିଶ୍ଚିତ ଭାବରେ ସ୍ଥାନ ପାଇଛି ୟୁକ୍ରେନର ଟେରିଟୋରିଆଲ କନସେସନ୍ ଓ ରୁଷିଆର ଜାପୋରିଝାଝିଆ ଅକ୍ତିଆର । ରୁଷିଆର କ୍ରୁସ୍କ ଅଞ୍ଚଳରୁ କିଛିକୁ ଦଖଲକୁ ନେଇଛି ୟୁକ୍ରେନ ଓ ରୁଷିଆ ସେହି ସୈନ୍ୟଙ୍କୁ ତଡ଼ିଦେବାକୁ ପାଖାପାଖି ୯୦% ସକ୍ଷମ ହୋଇଛି ।
ଟ୍ରମ୍ପଙ୍କ ଦୂତ କୂଟନୀତିଜ୍ଞ ଷ୍ଟିଭ ୱିଟକୋଫ ଅବଶ୍ୟ ସ୍ୱୀକାର କରିଛନ୍ତିବାସ୍ତବତାକୁ ଅନୁଧ୍ୟାନ କରିବାକୁ । ଏହା କ’ଣ ସମ୍ଭବ, ରୁଷିଆ ଅକ୍ତିଆର କରିଥିବା ୟୁକ୍ରେନ ଅଂଶର ପ୍ରତି ଇଞ୍ଚରୁ ରୁଷିଆ ସୈନ୍ୟଙ୍କୁ ବିତାଡ଼ିତ କରିବା । କିନ୍ତୁ ଜେଲେନସ୍କି ଜୋର ଦେଇଛନ୍ତି ସେ ନିଜ ରାଷ୍ଟ୍ରର ସାର୍ବଭୌମତ୍ୱକୁ ବଳି ଦେଇପାରିବେ ନାହିଁ । ଏହା ତାଙ୍କର ଯୁଦ୍ଧ ଆରମ୍ଭ ହେବା ପୂର୍ବରୁ ଭାବିବାର ଥିଲା । ନାଟୋରେ ସଦସ୍ୟତା ପାଇବାର ଲାଳସା ତାଙ୍କୁ ଏପରି ଅବସ୍ଥାକୁ ଟାଣିନେଇଛି । ୨୦୧୪ ମସିହାରୁ କ୍ରିମିଆକୁ ଓ ୨୦୨୨ରୁ ୟୁକ୍ରେନର ପୂର୍ବପଟରେ ଥିବା ୪ଟି ଅଞ୍ଚଳକୁ ରୁଷିଆ ଅକ୍ତିଆର କରି ନେଇସାରିଛି । ସେଥିପାଇଁ ଟ୍ରମ୍ପ ଆରମ୍ଭରୁ କହିଆସୁଛନ୍ତି ଲିମିଟେଡ୍ ସଭରେନିଟି ଅର୍ଥାତ୍ ସୀମିତ ସାର୍ବଭୌମତ୍ୱର କଥା । ଏଇ ୧୮ ତାରିଖ ରାତିରେ ପୁଟିନ ଓ ଟ୍ରମ୍ପଙ୍କ ମଧ୍ୟରେ ୯୦ ମିନିଟ ଧରି ଯୁଦ୍ଧବିରତି ଉପରେ ଆଲୋଚନା ହୋଇଛି । ପୁଟିନ ସଂପୂର୍ଣ୍ଣ ଯୁଦ୍ଧ ବନ୍ଦ ଚାହାନ୍ତି ବୋଲି କହିଛନ୍ତି । ଯୁଦ୍ଧ ହବାର ମୂଳ କାରଣର ନିବାରଣ ଚାହାନ୍ତି । ସେ ଅନେକ ସର୍ତ୍ତ ରଖିଛନ୍ତି- ତାହା ସେ ଖୋଲାଖୋଲି ଭାବେ କହିଛନ୍ତି ।
ତେବେ ୟୁକ୍ରେନର ଏନର୍ଜି ଇନଫ୍ରା ଉପରେ ଏଇ ଏକମାସ ଭିତରେ ଆକ୍ରମଣ ନକରିବାକୁ ସମ୍ମତ ହୋଇଛନ୍ତି । ସଂପୂର୍ଣ୍ଣ ସିଜ୍ଫାୟାର ପାଇଁ ଗୁରୁତ୍ୱପୂର୍ଣ୍ଣ ସର୍ତ୍ତଗୁଡ଼ିକ ମଧ୍ୟରୁ ଗୋଟିଏ ହେଲା- ଯେପରି ବିଦେଶୀ ମିଲିଟାରୀ ସାହାଯ୍ୟ ୟୁକ୍ରେନ ପାଖରେ ପହଞ୍ଚିବ ନାହିଁ । ଆଉ କୌଣସି ଇଣ୍ଟେଲିଜେନ୍ସ ଇନଫର୍ମେସନ ୟୁକ୍ରେନକୁ ଯୋଗାଯାଇ ପାରିବନାହିଁ । ହ୍ୱାଇଟ ହାଉସ୍ ତରଫରୁ କୁହାଯାଇଛି, ଶାନ୍ତି ପ୍ରତିଷ୍ଠାର ଯାତ୍ରାପଥରେ ଏହାହିଁ ପ୍ରଥମ ପଦକ୍ଷେପ । ହ୍ୱାଇଟ୍ ହାଉସ୍ ଆଶା କରିଛି କୃଷ୍ଣସାଗର ବକ୍ଷରେ ସାମୁଦ୍ରିକ ଅସ୍ତ୍ରବିରତି ଯେପରି ରୁଷିଆ ନିଶ୍ଚିତ କରେ ଓ ଯୁଦ୍ଧର ପରିସମାପ୍ତି ଘଟେ । ପୁଟିନ ଆଶଙ୍କା କରିଛନ୍ତି, ଯଦି ୟୁକ୍ରେନକୁ ବିଦେଶୀ ମିଲିଟାରୀ ସାହାଯ୍ୟ ଓ ଇଣ୍ଟେଲିଜେନ୍ସ ସହଯୋଗ ଜାରି ରହେ, ତାହେଲେ ଏକମାସ ପରେ ପୁଣି ଜେଲେନସ୍କି ଯୁଦ୍ଧ ଆରମ୍ଭ କରିଦେବେ । ତେଣୁ ତାଙ୍କର ଏପରି ସର୍ତ୍ତ । କିନ୍ତୁ ଜେଲେନସ୍କି ଏହା ବନ୍ଦ ନକରିବାକୁ ବିଦେଶୀ ରାଷ୍ଟ୍ରଙ୍କୁ ଅନୁରୋଧ କରିଛନ୍ତି । ଏପରି ଟଣାଓଟରା ଭିତରେ ଟ୍ରମ୍ପ କେତେଦୂର ଏହି ଯୁଦ୍ଧ ସମାପ୍ତି କରାଇପାରିବେ ତାହା ପ୍ରଶ୍ନବାଚୀ ସୃଷ୍ଟି କରିଛି । ପୁଣି ରୁଷିଆ ଅକ୍ତିଆର କରିନେଇଥିବା ସମସ୍ତ ଅଞ୍ଚଳକୁ କ’ଣ ସହଜରେ ଛାଡ଼ିଦବ! ଆକ୍ରମଣକାରୀ ଚୀନ କ’ଣ ଛାଡ଼ିଛି ଅକ୍ସାଇ ଚୀନକୁ ଆମ ଦେଶକୁ ନା ପାକିସ୍ତାନ ଛାଡ଼ିଛି ମାଡ଼ି ବସିଥିବା ପିଓକେ’କୁ । ସମୟ ହିଁ ଏସବୁର ସମାଧାନ କରିବ ।
