ନୂଆଦିଲ୍ଲୀ: ହ୍ବାଇଟ ହାଉସ୍ରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ତିକ୍ତ ବିତର୍କ ପରେ ୟୁକ୍ରେନ୍ ରାଷ୍ଟ୍ରପତିଙ୍କ ସ୍ବର ବଦଳିଛି । ଲଣ୍ଡନରେ ୟୁକ୍ରେନୀୟ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଡୋନାଲ୍ଡ ଟ୍ରମ୍ପଙ୍କୁ ପ୍ରଶଂସା କରିଛନ୍ତି । ଡୋନାଲ୍ଡ ଟ୍ରମ୍ପଙ୍କ ସହ ଏକ କଡ଼ା ବିତର୍କର ଗୋଟିଏ ଦିନ ପରେ ଲଣ୍ଡନ ଗସ୍ତ କରିଛନ୍ତି ଜେଲେନସ୍କି । ସେଠାରେ ତାଙ୍କ ସ୍ବର ନରମ ପଡ଼ିଥିବା ଦେଖିବାକୁ ମିଳିଛି । ସେ ଆମେରିକାର ସମର୍ଥନକୁ ପ୍ରଶଂସା କରିବା ସହ ଟ୍ରମ୍ପଙ୍କୁ ଧନ୍ୟବାଦ ଦେଇଛନ୍ତି ।
ଲଣ୍ଡନରେ ଏକ କାର୍ଯ୍ୟକ୍ରମ ସମୟରେ, ଜେଲେନସ୍କି କହିଛନ୍ତି ଆମେ ଆମେରିକାରୁ ପାଇଥିବା ସମସ୍ତ ସମର୍ଥନ ପାଇଁ କୃତଜ୍ଞ । ୩ ବର୍ଷ ହେଲା ଭୟଙ୍କର ଯୁଦ୍ଧର ସମ୍ମୁଖୀନ ମଧ୍ୟରେ ଆମେରିକାର ସମର୍ଥନ ଲାଗି ମୁଁ ରାଷ୍ଟ୍ରପତି ଟ୍ରମ୍ପ, କଂଗ୍ରେସ ଏବଂ ଆମେରିକୀୟ ଲୋକଙ୍କୁ ଧନ୍ୟବାଦ ଜଣାଉଛି । ଜେଲେନସ୍କିଙ୍କ ଏହି ପରିବର୍ତ୍ତିତ ମତକୁ ଏକ କୂଟନୈତିକ ପଦକ୍ଷେପ ବୋଲି ବିବେଚନା କରାଯାଉଛି ।
ହ୍ୱାଇଟ୍ ହାଉସରେ ଟ୍ରମ୍ପଙ୍କ ସହ ଉଷ୍ମ ଯୁକ୍ତିତର୍କ ପରେ ଏହି ବିବୃତ୍ତି ଆଶ୍ଚର୍ଯ୍ୟ କରିଛି । ୟୁକ୍ରେନକୁ ଆମେରିକାର ସହାୟତାକୁ ନେଇ ଟ୍ରମ୍ପ ଏବଂ ଜେଲେନସ୍କିଙ୍କ ମଧ୍ୟରେ ଟୁକ୍ତିତର୍କ ହୋଇଥିଲା । କିନ୍ତୁ ଏବେ ୟୁକ୍ରେନୀୟ ରାଷ୍ଟ୍ରପତି ଟ୍ରମ୍ପଙ୍କୁ ଧନ୍ୟବାଦ ଦେଉଛନ୍ତି । ଏକ୍ସ ପୋଷ୍ଟରେ ସେ ଆହୁରି ଲେଖିଛନ୍ତି ଯେ, ଆମେରିକୀୟ ରାଷ୍ଟ୍ରପତିଙ୍କ ସହ ଆମର ସମ୍ପର୍କ କେବଳ ଦୁଇ ନେତାଙ୍କ ମଧ୍ୟରେ ନୁହେଁ ବରଂ ଏହା ଦୁଇ ଦେଶ ମଧ୍ୟରେ ଏକ ଐତିହାସିକ ଏବଂ ଦୃଢ଼ ସମ୍ପର୍କ । ସେଥିପାଇଁ ମୁଁ ସବୁବେଳେ ଆମେରିକୀୟ ଲୋକଙ୍କ ପ୍ରତି ମୋର କୃତଜ୍ଞତା ପ୍ରକାଶ କରେ ।
ଏହା ସହିତ ମାନବାଧିକାର ଏବଂ ସହଯୋଗ ଉପରେ ଗୁରୁତ୍ୱାରୋପ କରି ସେ କହିଛନ୍ତି ଯେ, ୟୁକ୍ରେନ କେବଳ ଆମେରିକା ସହିତ ଦୃଢ଼ ସମ୍ପର୍କ ଚାହୁଁଛି ଏବଂ ଭବିଷ୍ୟତରେ ଏହି ସମ୍ପର୍କ ଆହୁରି ଉନ୍ନତ ହେବ ବୋଲି ଆଶା କରିଛନ୍ତି ଜେଲେନସ୍କି ।
