ଠାକୁରମୁଣ୍ଡା,୨୬/୧ :  ଯୁବକମାନେ ଭୋଜି ପାଇଁ ଆସିଥିଲେ l ମାତ୍ର ଖାଇବା ପୁର୍ବରୁ ଘଟିଲା ଅଘଟଣ l ଚାହୁଁ ଚାହୁଁ ଚାଲିଗଲା ଏକ ମୂଲ୍ୟବାନ ଜୀବନ l ଏଭଳି ଅଭାବନୀୟ ଘଟଣା ଘଟିଛି ଠାକୁରମୁଣ୍ଡା ଥାନା ଭୀମକୁଣ୍ଡ ପର୍ଯ୍ୟଟନ ସ୍ଥଳୀରେ l ଠାକୁରମୁଣ୍ଡା ବ୍ଲକ ଭୀମକୁଣ୍ଡ ପର୍ଯ୍ୟଟନସ୍ଥଳୀକୁ ପିକନିକ ପାଇଁ ଆସି ଜଣେ ଯୁବକ ନିଖୋଜ ହୋଇଯାଇଥିବା ଠାକୁରମୁଣ୍ଡା ଥାନାରେ ଅଭିଯୋଗ ହୋଇଛି l ବୈତରଣୀ ନଦୀର ଭୀମକୁଣ୍ଡ ନିକଟ ସାନକୁଣ୍ଡ ନିକଟରେ ଗାଧୋଉଥିବା ବିଶ୍ୱଜିତ ଦାସ (୧୯) ନାମକ ଯୁବକ ପାଣି ସ୍ରୋତରେ ଭାସି ଯାଇ ନିଖୋଜ ହୋଇଯାଇଥିଲେ l ଠାକୁରମୁଣ୍ଡା ଥାନାରେ ଅଭିଯୋଗ ପରେ ଅଗ୍ନିଶମ ବାହିନୀ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଥିଲେ ମଧ୍ୟ କୌଣସି ସନ୍ଧାନ ପାଇନାହାନ୍ତି l 

ପ୍ରକାଶ ଯେ, ଜ୍ୟୋତି ମୋଟର୍ସ ଭୁବନେଶ୍ୱରରେ କାମ କରୁଥିବା କର୍ମଚାରୀ ରବିବାର ଭୋଜି ପାଇଁ ଭୀମକୁଣ୍ଡ ଆସିଥିଲେ l ଦିନ ୧୧ଟା ୩୦ରେ ପହଞ୍ଚିବା ପରେ ୪/୫ ଜଣ ଯୁବକ ଗାଧୋଇବାକୁ ବୈତରଣୀରେ ପଶିଥିଲେ l ପ୍ରାୟ ଦିନ ୧.୩୦ ସମୟରେ ବିଶ୍ୱଜିତର ଗୋଡ଼ ଖସି ଯାଇଥିଲା l ଫଳରେ ତାର ସନ୍ଧାନ ମିଳିନଥିଲା l ବିଶ୍ୱଜିତ ଦାସଙ୍କ ଘର ଜଗତସିଂହପୁର ବାଲିକୁଦା l ବାପାଙ୍କ ନାମ ନିତ୍ୟାନନ୍ଦ ଦାସ l ବିଶ୍ୱଜିତ ଡିପ୍ଲୋମା ଛାତ୍ର ଏବଂ ବାପା ମା’ଙ୍କ ଏକମାତ୍ର ପୁଅ ବୋଲି ଜଣାପଡିଛି l l ସେ ଅସ୍ଥାୟୀ ଭାବେ ଜ୍ୟୋତି ମୋଟର୍ସରେ କାମ କରୁଥିଲେ l ରବିବାର ପୁଣି ସାଧାରଣତନ୍ତ୍ର ଦିବସ ପାଇଁ ଭୋଜି କରିବାକୁ ଆସିଥିଲେ ଭୀମକୁଣ୍ଡ l ସନ୍ଧ୍ୟା ପର୍ଯ୍ୟନ୍ତ ଦମକଳ ବାହିନୀ ଠାବ କରିବାରେ ବିଫଳ ହେବା ପରେ ସୋମବାର ଓଡ୍ରାଫ ଟିମ ଆସିବ ବୋଲି ସୂଚନା ମିଳିଛି l