ପଟ୍ଟାମୁଣ୍ଡାଇ, ୦୭/୦୮ : କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇରେ ଯୁବତୀ ଆତ୍ମାହୁତି ଘଟଣା। ବଢିଲା ସସପେନ୍ସ। ଚାଞ୍ଚଲ୍ୟକର ବୟାନ ଦେଲେ ପୀଡ଼ିତାଙ୍କ ବାପା। ସେ କହିଛନ୍ତି, 'ଝିଅ ବନ୍ଧା ହୋଇ ପୋଡ଼ି ମରିଛି। ଇଲେକ୍ଟ୍ରି ତାର ବନ୍ଧା ଯାଇଥିବା ଅନୁମାନ କରୁଛି। ଏହି ବୟାନ ପରେ ପୀଡ଼ିତା ନିଜେ ପୋଡ଼ି ହୋଇ ମରିଛନ୍ତି ନା ତାଙ୍କୁ କେହି ହତ୍ୟା କରିଛି ? ତାହାକୁ ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି। ପୀଡ଼ିତାଙ୍କ ବାପା ଆହୁରି କହିଛନ୍ତି ଯେ, ସେ ପୁଅ ବାରମ୍ଵାର ନିର୍ଯାତନା ଦେଉଥିଲା। ମୋତେ ଏବଂ ମୋ ପୁଅକୁ ସେ ଅଶ୍ଳୀଳ ଫଟୋ ପଠାଏ। ଦୁଇଥର ଥାନାକୁ ଯାଇଥିଲି। ସରପଞ୍ଚଙ୍କୁ ନେଇ ବି ଥାନାକୁ ଯାଇଥିଲି। ଅଶ୍ଳୀଳ ଫଟୋ ଛାଡ଼ିବା, ହାରାସ୍ମେଣ୍ଟ କରିବା ଓ ଗାଳି ଗୁଲଜ କରିବା ନେଇ ଅଭିଯୋଗ କରିଥିଲି। ଏତଲାରେ ସେ ପିଲାର ନାଁ ଲେଖି ନାହାଁନ୍ତି । ମୋର କିଛି ମନେ ପଡ଼ୁନି। ସେ ପୁଲିସଙ୍କୁ ଟ୍ରାନ୍ସଫର୍ ନୁହେଁ ସସପେଣ୍ଡ୍ କରିବା କଥା।'
ସେପଟେ ଯୁବତୀଙ୍କ ଶବ ବ୍ୟବଚ୍ଛେଦ ପାଇଁ କଟକ ବଡ଼ ମେଡିକାଲକୁ ପଠାଯାଇଛି । ଅଧିକ ବୈଷୟିକ ସହାୟତା ତଥା ଅଭିଜ୍ଞ ଡାକ୍ତରଙ୍କ ସହଯୋଗ ମିଳିବ ବୋଲି କଟକ ସ୍ଥାନାନ୍ତର କରାଯାଇଛି। ଘଟଣାର ନିରପେକ୍ଷ ତଦନ୍ତ ପାଇଁ ଗ୍ରାମାଞ୍ଚଳ ଥାନା ଏଏସ୍ଆଇ ଶୈଳେନ୍ଦ୍ର ନାରାୟଣ ପଲେଇଙ୍କୁ ଜିଲ୍ଲା ପୁଲିସ ମୁଖ୍ୟାଳୟକୁ ବଦଳି କରାଯାଇଛି।
ସୂଚନା ଅନୁଯାୟୀ, ଯୁବତୀଙ୍କ ତଥାକଥିତ ପ୍ରେମିକ ତାଙ୍କୁ ବ୍ରେକ୍ଅପ୍ ପରେ ବ୍ଲାକ୍ମେଲ୍ କରୁଥିଲେ, ଫଟୋ ଭାଇରାଲ୍ କରୁଥିଲେ, ହଇରାଣ ହରକତ ସହ ମାନସିକ ନିର୍ଯାତନା ଦେଉଥିଲେ ବୋଲି ୬ରୁ ୮ ମାସ ପୂର୍ବରୁ ପରିବାର ଲୋକଙ୍କ ସହ ଯାଇ ସ୍ଥାନୀୟ ଥାନାରେ ଅଭିଯୋଗ କରିଥିଲେ । ଥାନାରେ ଗୁହାରି ଜଣାଇବାକୁ ତାଙ୍କୁ ଘଣ୍ଟା ଘଣ୍ଟା ଧରି ଅପେକ୍ଷା କରିବାକୁ ପଡ଼ିଥିଲା। ହେଲେ ପୁଲିସ ଏଏସ୍ଆଇ ଶୈଳେନ୍ଦ୍ର ମୋହନ ପଲେଇ ଏତଲା ରଖିନଥିଲେ । ଦାୟିତ୍ୱ ଖସାଇବାକୁ ଯାଇ ବ୍ଲାକମେଲ କରୁଥିବା ଯୁବତୀଙ୍କ ତଥାକଥିତ ପ୍ରେମିକ ଯୁବକର ଫୋନ୍ ନମ୍ବର ବ୍ଲକ୍ କରିବାକୁ କହିଥିଲେ । ବ୍ଲାକ୍ଲିଷ୍ଟରେ ପକାଇବାକୁ କହିଥିଲେ। ମାମଲା ହୋଇପାରିବ ନାହିଁ ବୋଲି ପୀଡ଼ିତାଙ୍କ ପରିବାରକୁ ମନା କରିଦେଇଥିଲେ ବୋଲି ମୃତା ଛାତ୍ରୀଙ୍କ ବାପା ଅଭିଯୋଗ କରିଛନ୍ତି । ଏହା ପରେ ଫୋନ୍ରେ ମୌଖିକ ଭାବେ ଏ ବିଷୟରେ ପୁଲିସକୁ ଜଣାଇଥିଲେ ହେଁ ପୁଲିସ ପକ୍ଷରୁ କୌଣସି ସହଯୋଗ ମିଳିନଥିଲା । ପୁଲିସ ଏତଲା ରଖିବା ପାଇଁ ମନା କରିଦେବା ପରେ ଛାତ୍ରୀ ସମ୍ପୂର୍ଣ୍ଣ ଭାଙ୍ଗିପଡ଼ିଥିଲେ । ପ୍ରେମିକର ନିର୍ଯାତନା ଦିନକୁ ଦିନ ଅସହ୍ୟ ହୋଇ ଚାଲିଥିଲା । ଯାହା ସହିବା ତାଙ୍କ ପକ୍ଷେ ଆଉ ସମ୍ଭବ ହୋଇ ପାରିନଥିଲା । ଆଉ ଆତ୍ମଦାହ କରିବାକୁ ନିଷ୍ପତ୍ତି ନେଇଥିଲେ ବୋଲି ଚର୍ଚ୍ଚା ହେଉଛି । ଏ ଘଟଣା ପୁଣି ଥରେ ପୁଲିସ ଉପରକୁ ଅଙ୍ଗୁଳି ଉଠାଇଛି । ଏହି ଘଟଣା ପରେ ଗ୍ରାମାଞ୍ଚଳ ଥାନା ଏଏସ୍ଆଇ ଶୈଳେନ୍ଦ୍ର ନାରାୟଣ ପଲେଇଙ୍କୁ ବଦଳିି କରାଯାଇଛି।
