ଅଳତୀ,୨/୬(ଆପ୍ର): ରାମଚନ୍ଦ୍ରପୁର ଥାନା ଅନ୍ତର୍ଗତ ପୁରୁଣାବାନ୍ଧଗୋଡା ପଞ୍ଚାୟତର ତିଗିରିଆ ଗ୍ରାମର ସାବିତ୍ରୀ ଜେନା (୫୫) ବାଇକ୍ ଦୁର୍ଘଟଣାରେ ମୃତ୍ୟୁବରଣ କରିଛନ୍ତି। ମିଳିଥିବା ଖବର ଅନୁସାରେ ସାବିତ୍ରୀ ତରୁଆଁ ପଞ୍ଚାୟତର ଲୁଣହାର ଗ୍ରାମରେ ବିବାହ କରିଥିବା ବେଳେ ବାପଘର ତିଗିରିଆକୁ ଜରୁରୀ କାମ ପାଇଁ ଆସିଥିଲେ। ଆଜି ସନ୍ଧ୍ୟାରେ ପୁତୁରା ବରୁଣ କୁମାର ମଲ୍ଲିକଙ୍କ ବାଇକରେ ଶାଶୁଘର ଲୁଣହାର ଯାଉଥିବା ବେଳେ ଜନାର୍ଦ୍ଦନପୁର ପାଟଣା ଶନି ମନ୍ଦିରଠାରେ ହଠାତ୍ ଏକ ଷଣ୍ଢ ଆସିଯିବାରୁ ବାଇକ୍ ଭାରସାମ୍ୟ ହରାଇ ଦୁର୍ଘଟଣା ଘଟିବା ସହ ସାବିତ୍ରୀ ଗୁରୁତର ଆହତ ହୋଇଥିଲେ।
ଦୁର୍ଘଟଣା ସ୍ଥଳରେ ଉପସ୍ଥିତ ଥିବା ଲୋକମାନେ ସଙ୍ଗେ ସଙ୍ଗେ ବରୁଣ ଓ ସାବିତ୍ରୀଙ୍କୁ ସାଇଁକୁଳ ମେଡିକାଲ ନେଇଥିବା ବେଳେ ଡ଼ାକ୍ତର ସାବିତ୍ରୀଙ୍କୁ ମୃତ ଘୋଷଣା କରିଥିଲେ। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ସୁଚନା ଅନୁସାରେ ଅଳତୀରୁ ଜନାର୍ଦ୍ଦନପୁର ପାଟଣା ରାସ୍ତା ନିଛାଟିଆ ସହ ଅନ୍ଧାର ଯୋଗୁଁ ଦୁର୍ଘଟଣା ସମସ୍ୟା ସୃଷ୍ଟି ହୋଉଥିବା ବେଳେ ବହୁ ଲୋକ ମୃତ୍ୟୁବରଣ କରିବା ସହ ଆହତ ହେଉଛନ୍ତି। ତେବେ ଉକ୍ତ ସ୍ଥାନରେ ଲାଇଟ୍ ଲଗାଇବାକୁ ଅଞ୍ଚଳବାସୀ ଦାବୀ କରିଛନ୍ତି।
