କେନ୍ଦୁଝର,୦୨/୦୬: ଓଡ଼ିଶାରେ କନ୍ଧମାଳରେ ସବୁଠାରୁ ଅଧିକ ହଳଦୀ ଚାଷ ହୋଇଥାଏ । ତେବେ କେନ୍ଦୁଝରରେ ହଳଦୀ ଚାଷ ପାଇଁ ଅନୁକୂଳ ପରିବେଶ ରହିଛି । ଜଳସେଚନ ସହିତ ବିନା ଜଳସେଚିତ ଜମିରେ ମଧ୍ୟ ହଳଦୀ ଉତ୍ପାଦନ ହୋଇଥାଏ । ପାହାଡିଆ ଅଞ୍ଚଳରେ ଜୈବିକ ପଦ୍ଧତିରେ ହଳଦୀ ଚାଷ ହେଉଥିବା ବେଳେ ଏଥର କୃଷି ବିଭାଗ କେନ୍ଦୁଝରକୁ ଅଣଦେଖା କରିଛନ୍ତି । ଫଳରେ ୫ଶହ ହେକ୍ଟର ଜମିରେ ହଳଦୀ ଚାଷ ହେଉଥିବା ବେଳେ ଚଳିତବର୍ଷ ମାତ୍ର ୧୩୦ ହେକ୍ଟର ଜମିରେ ହଳଦୀ ଚାଷ ହୋଇଥିବା ଉଦ୍ୟାନ କୃଷି ବିଭାଗ ପକ୍ଷରୁ ସୂଚନା ମିଳିଛି ।
ହଳଦୀ ଚାଷ ମେ’ ମାସରୁ ଜୁନ୍ ମାସ ମଧ୍ୟରେ ହୋଇଥାଏ । କେନ୍ଦୁଝର ଜିଲ୍ଲାରେ ୧୩ଟି ବ୍ଲକ୍ରେ ହଦଳୀ ଚାଷ କରାଯାଉଛି । ସରକାରଙ୍କ ପକ୍ଷରୁ ଯୋଗାଇ ଦିଆଯାଇଥିବା ଉନ୍ନତମାନର ବିହନ ରୋମା ଓ ସୁରମା କିସମର ବିହନ କେନ୍ଦୁଝରରେ ପହଞ୍ଚିଛି । ୧୩୦ ହେକ୍ଟର ପାଇଁ ୧୯୫୦ କୁଇଣ୍ଟାଲ ବିହନ ସରକାର ଯୋଗାଇ ଦେଇଛନ୍ତି । ଚାଷୀମାନଙ୍କୁ ସରକାର ହେକ୍ଟର ପତି ୧୪ ହଜାର ୭୩୨ ଟଙ୍କା ରିହାତି ପ୍ରଦାନ କରୁଛନ୍ତି । ଜଣେ ଚାଷୀକୁ ଅତିକମ୍ରେ ୨୫ ଡିସିମିଲ୍ ଓ ସର୍ବାଧିକ ୫୦ ଡିସିମିଲ ଜମିରେ ହଳଦୀ ଚାଷ ପାଇଁ ରିହାତି ବ୍ୟବସ୍ଥା ରହିଛି । କିଲୋଗ୍ରାମ ପ୍ରତି ବିହନର ମୂଲ୍ୟ ୭୮ ଟଙ୍କା ରହିଥିବା ବେଳେ ୨୫ ଡିସିମିଲ ଜମି ପାଇଁ ୧୧୭୦୦ ଟଙ୍କାର ବିହନ ଆବଶ୍ୟକ ପଡିଥାଏ । ଜଳସେଚିତ ଜମି ହେଲେ ହେକ୍ଟରରେ ୨୦ରୁ ୨୫ ଟନ୍ ହଳଦୀ ଉତ୍ପାଦନ ହେଉଥିବା ବେଳେ ଅଣଜଳସେଚିତ ଜମିରେ ୯ ଟନ୍ ପର୍ଯ୍ୟନ୍ତ ହଳଦୀ ଆମଦାନୀ ହୋଇଥାଏ ।
ଚଳିତବର୍ଷ କେନ୍ଦୁଝରରେ ୧ ଲକ୍ଷ ୩୬ ହଜାର ୫୦୦ କୁଇ୍ଣ୍ଟାଲ ହଳଦୀ ଉତ୍ପାଦନ ଲକ୍ଷ୍ୟ ରଖାଯାଇଛି । କେନ୍ଦୁଝର ଉପଖଣ୍ଡରେ ସର୍ବାଧିକ ୮୦ ହେକ୍ଟର ଜମିରେ ହଳଦୀ ଚାଷ କରାଯାଉଥିବା ବେଳେ ଆନନ୍ଦପୁରରେ ୩୦ ହେକ୍ଟର ଓ ଚମ୍ପୁଆ ଉପଖଣ୍ଡରେ ମାତ୍ର ୨୦ ହେକ୍ଟର ଜମିରେ ହଳଦୀ ଚାଷ କରାଯାଉଛି । ତେଲକୋଇ ଓ ବାଂଶପାଳ ବ୍ଲକ୍ରେ ୧୫ ହେକ୍ଟର ଲେଖାଁଏ ଚାଷ କରାଯାଉଥିବା ସମୟରେ କେନ୍ଦୁଝର ସଦର, ପାଟଣା, ସାହାରପଡା, ଘଟଗାଁ ଓ ହରିଚନ୍ଦନପୁର ବ୍ଲକ୍ ପାଇଁ ୧୦ ହେକ୍ଟର ଟାର୍ଗେଟ୍ ରହିଛି । ସେହିପରି ଆନନ୍ଦପୁର, ହାଟଡିହି ଓ ଘସିପୁରା ବ୍ଲକରେ ୧୦ ହେକ୍ଟର ଲେଖାଁଏ ଚାଷ କରାଯିବାକୁ ଥିବା ବେଳେ ଚମ୍ପୁଆ ଉପଖଣ୍ଡର ଚମ୍ପୁଆ ବ୍ଲକରେ ୧୪୦ ହେକ୍ଟର ଝୁମ୍ପୁରା ବ୍ଲକରେ ୮ ହେକ୍ଟର ଓ ଯୋଡା ବ୍ଲକରେ ମାତ୍ର ୨ ହେକ୍ଟର ଜମିରେ ହଳଦୀ ଚାଷ ପାଇଁ ଟାର୍ଗେଟ୍ ରହିଛି । ସେହିପରି ୧ ହେକ୍ଟର ଜମିରେ ୭୦ କୁଇଣ୍ଟାଲ ପର୍ଯ୍ୟନ୍ତ ଉତ୍ପାଦନ ହେବ ବୋଲି ଉଦ୍ୟାନ କୃଷି ଉପ ନିର୍ଦ୍ଦେଶକ ସୌମେନ୍ଦ୍ର ପାଣିଗ୍ରାହୀ କହିଛନ୍ତି ।
ଉଦ୍ୟାନ୍ କୃଷି ବିଭାଗ ପକ୍ଷରୁ କୁହାଯାଇଛି ଯେ, କେନ୍ଦୁଝରରେ ପାହାଡିଆ ଅଞ୍ଚଳ ଯୋଗୁ ଅଧିକ ହଳଦୀ ଉତ୍ପାଦନ ହୋଇଥାଏ । ହଳଦୀ ଚାଷ ପାଇଁ ରକ୍ଷଣାବେକ୍ଷଣ ଦାୟିତ୍ୱ କମ୍ ରହୁଥିବାରୁ ଚାଷୀମାନେ ଚାଷ କରିବାକୁ ଆଗ୍ରହ ଦେଖାଇଥାନ୍ତି । ଗତବର୍ଷ ୫ଶହ ହେକ୍ଟରରେ ହଳଦୀ ଚାଷ ହୋଇଥିବା ବେଳେ ଏଥର ସରକାର ଟାର୍ଗେଟ୍ କମ୍ ଦେଇଛନ୍ତି । ତଥାପି ବୈଜ୍ଞାନିକ ପଦ୍ଧତି ଓ ଉନ୍ନତ କିସମର ବିହନ ଦ୍ୱାରା ଅଧିକ ଉତ୍ପାଦନ ଲକ୍ଷ୍ୟ ରଖାଯାଇଛି ବୋଲି ଶ୍ରୀ ପାଣିଗ୍ରାହୀ କହିଛନ୍ତି । ଚାଷୀମାନେ ଚାଷ କରିବା ପୂର୍ବରୁ ଆବେଦନ କଲେ ବିହନ ମାଗଣାରେ ଯୋଗାଇ ଦିଆଯାଉଛି । ଏହାସହିତ ଚାଷ ସମ୍ପର୍କିତ ପରାମର୍ଶ ମଧ୍ୟ ବିଭାଗ ପକ୍ଷରୁ ଦିଆଯାଉଛି ବୋଲି ସେ କହିଛନ୍ତି ।
