ମାଲକାନଗିରି,୩/୬ : ମାଲକାନଗିରି ଜିଲ୍ଲା ମାଥିଲି ଥାନାସ୍ଥ ଟେମୁରପାଲି ପଞ୍ଚାୟତର ମାଓଗଡ଼ ଭାବେ ପରିଚିତ ତୁଳସୀପାହାଡ଼ ଉପରେ ଥିବା ଦୁର୍ଗମ ତୁଳସୀ ଆଦିବାସୀ ଗ୍ରାମକୁ ଜିଲ୍ଲାପାଳ ଆଶିଷ ଈଶ୍ୱର ପାଟିଲ, ଏସପି ବିନୋଦ ପାଟିଲ ଆଜି ଗସ୍ତ କରିଛନ୍ତି। ମାଥ୍ଲି ବ୍ଲକର ଦୁର୍ଗମ ତୁଳସୀ ପାହାଡ଼ ଗ୍ରାମ ଗସ୍ତ କରି ସେଠାରେ ଚାଲିଥିବା ସରକାରଙ୍କ ବିଭିନ୍ନ ଉନ୍ନୟନମୂଳକ କାର୍ଯ୍ୟର ସମୀକ୍ଷା କରିଥିଲେ । ସେଠାରେ ଚାଲିଥିବା ରାସ୍ତା, ବ୍ରିଜ କାମ ବର୍ଷା ପୂର୍ବରୁ ନିର୍ଦ୍ଧାରିତ ସମୟରେ ସାରିବା ପାଇଁ ଗ୍ରାମ୍ୟ ଉନ୍ନୟନ ବିଭାଗର ଅଧକାରୀଙ୍କୁ ନିର୍ଦ୍ଦେଶ ଦେଇଥିଲେ ଜିଲ୍ଲାପାଳ ।
ସେହିଭଳି ତୁଳସୀ ପାହାଡ଼ରେ ଥିବା ଗ୍ରାମବାସୀଙ୍କ ପାଖରେ ସରକାରଙ୍କ ସମସ୍ତ ସୁବିଧା କିଭଳି ପହଂଚି ପାରିବ ସେନେଇ ମାଥୁଲି ଗୋଷ୍ଠୀ ଉନ୍ନୟନ ଅଧିକାରୀ ପ୍ରମୋଦ ବେହେରାଙ୍କୁ ନିର୍ଦ୍ଦେଶ ଦେଇଥିଲେ । ମାଓପ୍ରବଣ ଦୁର୍ଗମ ଅପହଞ୍ଚ ତୁଳସୀ ଗ୍ରାମରେ ଜିଲ୍ଲାପାଳ ଓ ଏସପି ଏବଂ ଅନ୍ୟାନ୍ୟ ପ୍ରଶାସନିକ ଅଧିକାରୀଙ୍କୁ ଦେଖି ଗ୍ରାମବାସୀମାନେ ଖୁସିରେ ସେମାନଙ୍କୁ ଗ୍ରାମ ଭିତରକୁ ପାଛୋଟି ନେଇଥିଲେ, ଜିଲ୍ଲାପାଳ, ଏସପି ଗ୍ରାମବାସୀଙ୍କୁ ସେମାନଙ୍କ ସୁବିଧା ଓ ଅସୁବିଧା କଥା ପଚାରି ବୁଝିଥିଲେ।
