ଭୁବନେଶ୍ୱର,୧୩/୧୧ : ଏକାମ୍ର କ୍ଷେତ୍ରର ଏକ ଗୁରୁତ୍ୱ ଶୈବ ପୀଠ ଭାବେ କପିଳେଶ୍ୱର ଜିଉଙ୍କ ସୁଖ୍ୟାତି ରହିଛି । ଏଠାକୁ ଦୈନିକ ଓ ପର୍ବପର୍ବାଣୀରେ ବହୁ ସଂଖ୍ୟାରେ ଶ୍ରଦ୍ଧାଳୁଙ୍କ ସମାଗମ ହେଉଛି । ଏହି ପୀଠର ଗୁରୁତ୍ୱ କେଉଁକାଳରୁ ରହିଛି। ହେଲେ ଏହାର ସୁରକ୍ଷା ପ୍ରତି ନା ମନ୍ଦିର ପ୍ରଶାସନ କିମ୍ବା ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥାନ (ଏଏସଆଇ) ଦୃଷ୍ଟିଦେଉନାହିଁ । ଫଳରେ ଏବେ ଲଗାତର ଏଠାରେ ଛୋଟମୋଟ ଚୋରି, ଛିନତାଇ ଭଳି ଅଘଟଣ ଶୁଣିବାକୁ ମିଳୁଛି । ଯାହାକୁ ନେଇ ସବୁ ମହଲରେ ଅସନ୍ତୋଷ ।  

ସୂଚନା ଅନୁଯାୟୀ, ଗତ ମାସ ୨୮ ତାରିଖର ଏଠାରେ ଭିଡ ଭିତରେ ଜଣେ ମହିଳାଙ୍କ ଓଜନିଆ ସୁନା ଚେନ ହଜିଥିଲା। ଯାହା ଅନେକ ଖୋଜାଖୋଜି ପରେ ଏବଂ ପୋଲିସ ହସ୍ତକ୍ଷେପ କରିବାରୁ ତାଙ୍କୁ ବହୁ କଷ୍ଟରେ ମିଳିଥିଲା । ଏହା ବ୍ୟତିତ କିଛି ଅସାମାଜିକ ସାଇକେଲ ରିମ ସ୍ପୋକରେ(ଖାଡି)ଅଠା ଲଗାଇ ଦାନ ବାକ୍ସରୁ ଟଙ୍କା ବାହାର କରି ନେଇ ଯାଉଥିବା ସେବାୟତ ମାନେ ଲଗାତାର ଅଭିଯୋଗ କରୁଛନ୍ତି । ସେମାନେ କହିଛନ୍ତି ଯେ, ଏବେ ଠାକୁରଙ୍କ ନୀତି କରିବାକୁ ଟଙ୍କା ନଅଣ୍ଟ । ଏଣେ ଚୋର ଚୋରି କରି ଟଙ୍କା ନେଇ ଯାଉଛନ୍ତି । ସେହିପରି ଅନେକ ଯାନିଯାତରାରେ ଏହି ପୀଠର ଅଧିଷ୍ଠାତ୍ରୀ ମା’ଦକ୍ଷିଣକାଳୀଙ୍କୁ ସୁନା ମୁକୁଟ ଓ ଅନ୍ୟାନ୍ୟ ଅଳଙ୍କାରରେ ଆଭୂଷିତ କରିବାର ବିଧି ବ୍ୟବସ୍ଥା ରହିଛି । କିନ୍ତୁ ସୁରକ୍ଷା ଦୃଷ୍ଟିରୁ ଏହି ସବୁ ଅଳଙ୍କାର ଦେବସେବାରେ ବ୍ୟବହାର ହୋଇ ପାରୁନି। ଫଳରେ ଆମ ଇଷ୍ଟ ଠାକୁରାଣୀଙ୍କ ଗଳା ଏବଂ ମସ୍ତକ ଖାଲି ରହୁଛି । ବାଧ୍ୟ ହୋଇ ସେସବୁ ମୂଲ୍ୟବାନ ଅଳଙ୍କାର ଅନ୍ୟ ସ୍ଥାନରେ ରଖାଯାଉଛି । ଏ ସମସ୍ତ ଦିଗକୁ ବିଚାରକୁ ନେଲେ ଏଠାରେ ଆବଶ୍ୟକ ସଂଖ୍ୟକ ସିସି କ୍ୟାମେରା ବ୍ୟବସ୍ଥା କରାଯିବା ଲାଗି ରାମଚନ୍ଦ୍ର ମଲିଆ,ରୋହିତ ପଣ୍ଡା,ନୀଳମଣି ମଲିଆ,ଅଚ୍ୟୁତାନନ୍ଦ ମଲିଆଙ୍କ ସମେତ ଅନେକ ସେବାୟତ ଦାବି କରିଛନ୍ତି । 

ଏହି ସେବାୟତମାନଙ୍କ ସମେତ ଶ୍ରଦ୍ଧାଳୁ ଓ ସ୍ଥାନୀୟ ଜନସାଧାରଣ ମଧ୍ୟ ସମାନ ଦାବି କରିଛନ୍ତି । ଏ ବାବଦରେ ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥାନ(ଏଏସଆଇ)ଭୁବନେଶ୍ୱର ଚାପଟର ସୁପରିଟେଣ୍ଡେଣ୍ଟ ନନ୍ଦ କିଶୋର ସ୍ୱାଇଁ କହିଛନ୍ତି ଯେ, ଆମେ ଅଳ୍ପ ଦିନ ପୂର୍ବେ ଏହି ମନ୍ଦିରର ସମସ୍ତ ଆବଶ୍ୟକ ଥିବା କାର୍ଯ୍ୟ ଗୁଡିକୁ ଅନୁଧ୍ୟାନ କରି ମୂଖ୍ୟାଳୟକୁ ଅବଗତ କରିଛୁ । ଏବେ କିନ୍ତୁ ଏହି ଦିଗଟି ଅନ୍ତର୍ଭୁକ୍ତ କରାଯାଇ ନାହିଁ । ଅନ୍ୟପଟେ ମନ୍ଦିର କାର୍ଯ୍ୟ ନିର୍ବାହୀ ଅଧିକାରୀ ତଥା ଭୁବନେଶ୍ୱର ଉପଜିଲ୍ଲାପାଳ ମନୋରଞ୍ଜନ ସାହୁ କହିଛନ୍ତି ଯେ ଆମେ ପ୍ରତିଟି ଆବଶ୍ୟକତାକୁ ଗୁରୁତର ସହ ବିଚାର କରୁଛୁ । ଯଥା ସମ୍ଭବ ଚେଷ୍ଟା କରିବୁ ।