ନୂଆଦିଲ୍ଲୀ,୨୬/୦୧: ଭାରତ ୭୬ତମ ସାଧାରଣତନ୍ତ୍ର ଦିବସ ପାଳନ କରୁଛି । ଚଳିତ ବର୍ଷ ମୁଖ୍ୟ ଅତିଥି ଭାବେ ଯୋଗ ଦେଇଛନ୍ତି ଇଣ୍ଡୋନେସିଆ ରାଷ୍ଟ୍ରପତି ପ୍ରୋବୋୱ ସୁବିଆଣ୍ଟୋ । ପ୍ରତିବର୍ଷ ଗଣତନ୍ତ୍ର ଦିବସରେ ଭାରତ ଜଣଙ୍କୁ ମୁଖ୍ୟ ଅତିଥି ଭାବେ ଆମନ୍ତ୍ରିତ କରିଥାଏ । ଏହି ପରମ୍ପରା ୧୯୫୦ରୁ ଆରମ୍ଭ ହୋଇଛି ଯାହା ଏବେ ବି ଚାଲିଛି । ତେବେ ଆପଣ ଜାଣିଛନ୍ତି କି ଭାରତ ଦୁଇ ଥର ପାକିସ୍ତାନକୁ ଗଣତନ୍ତ୍ର ଦିବସରେ ମୁଖ୍ୟ ଅତିଥି ଭାବେ ନିମନ୍ତ୍ରଣ କରିଥିଲା । ତେବେ ଆସନ୍ତୁ ଜାଣିବା ଏହି ରିପୋର୍ଟରେ ।
୨ଥର ମୁଖ୍ୟ ଅତିଥି ହୋଇଛି ପାକିସ୍ତାନ- ଭାରତ ଓ ପାକିସ୍ତାନ ମଧ୍ୟରେ ସମ୍ପର୍କ ସର୍ବଦା ଜଟିଳ ରହି ଆସିଛି । ଦୁଇ ଦେଶ ମଧ୍ୟରେ ତିକ୍ତତା ରହିଛି । ଭାରତର ପାରମ୍ପରିକ ପ୍ରତିନ୍ଦ୍ବନ୍ଦୀ ରହିଛି ପାକିସ୍ତାନ । ଏହାପରେ ବି ଭାରତର ଗଣତନ୍ତ୍ର ଦିବସରେ ପାକିସ୍ତାନ ମୁଖ୍ୟ ଅତିଥି ଭାବେ ନିମନ୍ତ୍ରିତ ହୋଇଛି । ୧୯୫୫ ଏବଂ ୧୯୬୫ ସାଧାରଣତନ୍ତ୍ର ଦିବସରେ ପାକିସ୍ତାନ ମୁଖ୍ୟ ଅତିଥି ହୋଇଥିଲା । ୧୯୫୫ରେ ପାକିସ୍ତାନ ଗଭର୍ଣ୍ଣର ଜେନେରାଲା ମଲିକ ଗୁଲାମ ମହମ୍ମଦ ଓ ୧୯୬୫ରେ ପାକିସ୍ତାନ କୃଷିମନ୍ତ୍ରୀ ରାନା ଅବଦୁଲ୍ଲ ହାମିଦ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ।
୬ ମାସ ପରେ ହୋଇଥିଲା ଯୁଦ୍ଧ- ଜାନୁଆରୀରେ ମୁଖ୍ୟ ଅତିଥି ଭାବେ ଯୋଗ ଦେଇଥିଲା ପଡୋଶୀ ଦେଶ ପାକିସ୍ତାନ । ଏହାର ୬ ମାସ ପରେ ଭାରତ-ପାକିସ୍ତାନ ମଧ୍ୟରେ ଯୁଦ୍ଧ ଆରମ୍ଭ ହୋଇଥିଲା । ୧୯୬୫ ଅଗଷ୍ଟ ୫ରୁ ୨୩ ସେପ୍ଟେମ୍ବର ଯାଏ ଯୁଦ୍ଧ ଚାଲିଥିଲା ।
ଏବେ ସୁଦ୍ଧା ଗଣତନ୍ତ୍ର ଦିବସରେ ମୁଖ୍ୟ ଅତିଥି ଭାବରେ ସବୁଠୁ ଅଧିକ ଥର ଫ୍ରାନ୍ସ ନେତାଙ୍କୁ ନିମନ୍ତ୍ରଣ ମିଳିଛି । ୧୯୭୬, ୧୯୮୦, ୨୦୦୮, ୨୦୧୬ ଓ ୨୦୨୪ ଗଣତନ୍ତ୍ର ଦିବସରେ ଫ୍ରାନ୍ସକୁ ମୁଖ୍ୟ ଅତିଥି ଭାବେ ନିମନ୍ତ୍ରଣ କରାଯାଇଥିଲା । ଏହା ଭାରତ ଓ ଫ୍ରାନ୍ସ ମଧ୍ୟରେ ଦ୍ବିପାକ୍ଷିକ ସମ୍ପର୍କକୁ ଦର୍ଶାଇଥିଲା ଯାହା ରକ୍ଷା, ପରମାଣୁ ଉର୍ଜା, ଆତଙ୍କବାଦ ଦମନ ଓ ଟେକନିକ ସହଯୋଗ ଭଳି କ୍ଷେତ୍ରକୁ ମଜଭୁତ କରିଥିଲା ।
