ପୁଣେ, ୨୭/୦୧ : ମହାରାଷ୍ଟ୍ରରେ ଗୁଲେନ ବେରି ସିଣ୍ଡ୍ରୋମ୍ (GBS) ଆତଙ୍କ। ଜୀବନ ନେଲା GBS ରୋଗ। ପୁଣେରେ GBS ରୋଗ ବ୍ୟାପୁଛି। ଏପର୍ଯ୍ୟନ୍ତ ଏହି ରୋଗ ୧୦୧ ଜଣଙ୍କୁ ଆକ୍ରାନ୍ତ କରିଥିବା ବେଳେ ଜଣଙ୍କର ମୃତ୍ୟୁ ହୋଇଛି। ଆକ୍ରାନ୍ତଙ୍କ ମଧ୍ୟରୁ ୧୬ ଜଣ ଭେଣ୍ଟିଲେଟରରେ ଅଛନ୍ତି। GBS ରୋଗରେ ଆକ୍ରାନ୍ତ ହୋଇ ଷୋଲାପୁରରେ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଛି। ମହାରାଷ୍ଟ୍ର ସ୍ଵାସ୍ଥ୍ୟ ବିଭାଗ ଏନେଇ ସୂଚନା ଦେଇଛି। ତେବେ ଆକ୍ରାନ୍ତ ଜଣଙ୍କ ପୁଣେରେ ଜିବିଏସ୍‌ ରୋଗରେ ଆକ୍ରାନ୍ତ ହୋଇ ଷୋଲାପୁର ଆସିଥିଲେ। ସେଠାରେ ତାଙ୍କର ମୃତ୍ୟୁ ଘଟିଛି।

ଗୁଲେନ ବେରି ସିଣ୍ଡ୍ରୋମ୍ ଏକ ନ୍ୟୁରୋଲଜିକାଲ୍ ଡିସ୍‌ଅର୍ଡର। ଏହି ରୋଗ ହେବା ଦ୍ଵାରା ମଣିଷ ଶରୀରର ରୋଗ ପ୍ରତିରୋଧକ ଶକ୍ତି ପେରିଫେରାଲ୍ ନର୍ଭ ସିଷ୍ଟମ ଉପରେ ଆଟାକ୍ କରେ। ଏହାଦ୍ଵାରା ଉଠିବା ବସିବା ଏବଂ ଚାଲିବାରେ ସମସ୍ୟା ହୁଏ। ଏପରିକି ନିଶ୍ଵାସ ନେବାରେ ମଧ୍ୟ ଅସୁବିଧା ହୁଏ। ଏହା ଏକ ବିରଳ ରୋଗ। କାରଣ ପ୍ରତି ବର୍ଷ ଏକ ଲକ୍ଷ ଲୋକଙ୍କ ମଧ୍ୟରୁ ଜଣେ କିମ୍ଵା ୨ ଜଣ ଏହି ରୋଗରେ ପ୍ରଭାବିତ ହୁଅନ୍ତି। ଏହି ରୋଗ ବିଶ୍ଵ ସ୍ତରରେ ବ୍ୟାପିଲେ ୭.୫ ପ୍ରତିଶତ ଲୋକଙ୍କ ମୃତ୍ୟୁ ହେବାର ସମ୍ଭାବନା ରହିଛି। ଜିବିଏସ୍ ରୋଗରେ ଆମେରିକା ପୂର୍ବତନ ରାଷ୍ଟ୍ରପତି ଫ୍ରାଙ୍କଲିନ୍ ଡି ରୁଜବେଲ୍ଟଙ୍କର ମୃତ୍ୟୁ ହୋଇଛି। ରିପୋର୍ଟ ଅନୁସାରେ ୨୦୨୩ରେ ପେରୁରେ ଗୁଲେନ ବେରି ସିଣ୍ଡ୍ରୋମ ବ୍ୟାପିଥିଲା। ଏହାର ମୁକାବିଲା ପାଇଁ ସରକାର ୯୦ ଦିନର ହେଲ୍‌ଥ ଏମରଜେନ୍ସି ଘୋଷଣା କରିଥିଲେ। 

ଜିବିଏସ୍ ସଂକ୍ରମଣ ହେଲେ ପ୍ରାଥମିକ ସ୍ତରରେ ହାତ ଗୋଡ଼ ଝିମ୍ ଝିମ୍ ହୁଏ। ଦୁର୍ବଳ ଲାଗେ। ପରେ ପରେ ଏହାର ଲକ୍ଷଣ ତୀବ୍ର ଗତିରେ ଦେଖିବାକୁ ମିଳେ। ଚାଲିବା ଏବଂ ସିଢି ଚଢିବା ବେଳେ ଅସୁବିଧା ହୁଏ। କଥା କହିବା, ଚୋବାଇବା ଏବଂ ଗିଳିବା ବେଳେ ଅସୁବିଧା ହୁଏ। ମାଂଶପେଶୀ ଦରଜ ହୁଏ। ପରିସ୍ରା ଏବଂ ମଳତ୍ୟାଗରେ ସମସ୍ୟା ହୁଏ। ନିଶ୍ଵାସ ନେବାରେ ଅସୁବିଧା ହୁଏ। ଏହାଦ୍ଵାରା ପାରାଲିସିସ୍ ସମସ୍ୟା ହୁଏ। ଏହି ରୋଗ ସପ୍ତାହକ ମଧ୍ୟରେ ଚରମ ସ୍ତରରେ ପହଞ୍ଚିଯାଏ। 

ଏହି ଖବରଟିକୁ ପଢନ୍ତୁ-ଇଣ୍ଡିଆ ସହ ସମ୍ପର୍କକୁ ନେଇ ଇଣ୍ଡୋନେସିଆ ରାଷ୍ଟ୍ରପତିଙ୍କ ବଡ ବୟାନ; କହିଲେ ମୋ ଡିଏନଏ ଭାରତୀୟ

ଜିବିଏସ୍ ରୋଗର ଚିକିତ୍ସା ପାଇଁ ଗୋଟିଏ ଇଞ୍ଜେକ୍ସନର ଦାମ୍ ୨୦ ହଜାର। ଏହାର ଚିକିତ୍ସା ମହଙ୍ଗା ହୋଇଥିବାରୁ ମହାରାଷ୍ଟ୍ର ସରକାର ମାଗଣା ଚିକିତ୍ସା ପାଇଁ ଘୋଷଣା କରିଛନ୍ତି। ଜିବିଏସ୍ ଆକ୍ରାନ୍ତ ରୋଗୀ ପୁଣେର କମଳା ନେହେରୁ ହସ୍ପିଟାଲରେ ମାଗଣାରେ ଚିକିତ୍ସା କରାଇପାରିବେ।