ନୂଆଦିଲ୍ଲୀ,୨୭/୦୧: ଚଳିତବର୍ଷ ଗଣତନ୍ତ୍ର ଦିବସ ସମାରୋହରେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ଇଣ୍ଡୋନେସିଆ ରାଷ୍ଟ୍ରପତି ପ୍ରୋବୋୱ ସୁବିଆଣ୍ଟୋ । ଏହାପରେ ଗତକାଲି (ରବିବାର) ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଦ୍ବାରା ଆୟୋଜିତ ରାତ୍ରୀ ଭୋଜନରେ ସାମିଲ ହୋଇଥିଲେ । କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଉପରାଷ୍ଟ୍ରପତି ଜଗଦୀପ ଧନଖଡ, କେନ୍ଦ୍ରମନ୍ତ୍ରୀ ପିୟୂଷ ଗୋଏଲ ପ୍ରମୁଖ ଉପସ୍ଥିତ ଥିଲେ । ଏହି ସମୟରେ ଭାରତ ସହ ତାଙ୍କ ସମ୍ପର୍କକୁ ନେଇ ସୁବିଆଣ୍ଟୋ କହିଥିଲେ, ମୋର ଡ଼ିଏନଏ ଭାରତୀୟ । ମୋର ପୂର୍ବପୁରୁଷମାନେ ଭାରତୀୟ ଥିଲେ । ଏହା କହିବା ପରେ ସେଠାରେ ସମସ୍ତେ ଜୋରରେ ହସିବାକୁ ଲାଗିଥିଲେ ।
ଆୟୋଜିତ ଡିନରରେ ଇଣ୍ଡୋନେସିଆ ରାଷ୍ଟ୍ରପତି ପ୍ରୋବୋୱ ସୁବିଆଣ୍ଟୋ ଭାରତ ସହ ତାଙ୍କ ସମ୍ପର୍କକୁ ନେଇ କହିଥିଲେ ଯେ, ମୋ ପୂର୍ବପୁରୁଷମାନେ ଭାରତୀୟ । ନିକଟରେ ହୋଇଥିବା ଡିଏନଏ ପରୀକ୍ଷାରୁ ଏହା ଜଣାପଡିଛି । ମୋ ଡିଏନଏ ତ ଭାରତୀୟ । କିଛି ସପ୍ତାହ ତଳେ ମୋର ଜେନେଟିକ ସିକ୍ବେନ୍ସିଂ ଓ ଡିଏନଏ ଟେଷ୍ଟ ହୋଇଥିଲା । ଯେଉଁଥିରେ ମୋର ଡିଏନଏ ଭାରତୀୟ ବୋଲି ଜଣାପଡିଥିଲା । ସମସ୍ତେ ଜାଣନ୍ତି ଯେ ମୁଁ ଭାରତୀୟ ସଙ୍ଗୀତ ଶୁଣିଲେ ନାଚିବା ଆରମ୍ଭ କରିଦିଏ । ଏହା ଶୁଣି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଉପରାଷ୍ଟ୍ରପତି ଜଗଦୀପ ଧନଖଡଙ୍କ ସମେତ ସମସ୍ତ ଅତିଥି ହସିବାକୁ ଲାଗିଥିଲେ ।
ଦୁଇ ଦେଶ ମଧ୍ୟରେ ଥିବା ଐତିହ୍ୟ ଉପରେ ଆଲୋଚନା କରି ପ୍ରୋବୋୱ ସୁବିଆଣ୍ଟୋ କହିଛନ୍ତି, ଆମ ଭାଷାର ଏକ ଗୁରୁତ୍ବପୂର୍ଣ୍ଣ ଅଂଶ ସଂସ୍କୃତରୁ ଆସିଛି । ଅନେକ ଇଣ୍ଡୋନେସିଆ ନାମ ସଂସ୍କୃତ ନାମ ଅଟେ । ଆମ ଦୈନନ୍ଦିନ ଜୀବନରେ ପ୍ରାଚୀନ ଭାରତୀୟ ସଭ୍ୟତାର ପ୍ରଭାବ ରହିଛି । ଭାରତକୁ ଆସି ମୁଁ ଗର୍ବିତ । ମୁଁ ଜଣେ ବୃତ୍ତିଗତ ରାଜନେତା ନୁହେଁ ଜଣ ଭଲ କୁଟନୀତିଜ୍ଞ ନୁହେଁ ମୁଁ କେବଳ ମୋ ହୃଦୟ କଥା କହୁଛି । ପ୍ରଧାନମନ୍ତ୍ରୀ ମୋଦିଙ୍କ ନେତୃତ୍ବ ଓ ପ୍ରତିବଦ୍ଧତାରୁ ବହୁତ କିଛି ଶିଖିଛି ।
୭୬ତମ ସାଧାରଣତନ୍ତ୍ର ଦିବସରେ ଯୋଗ ଦେବାକୁ ଇଣ୍ଡୋନେସିଆକୁ ନିମନ୍ତ୍ରଣ କରିଥିଲା ଭାରତ । ଦୁଇଦେଶ ମଧ୍ୟରେ ପ୍ରତିରକ୍ଷା ଓ ବାଣିଜ୍ୟ ସମ୍ପର୍କ ବଢାଇବା ଉପରେ ଫୋକସ୍ କରାଯାଉଛି । ଦ୍ବିପାକ୍ଷିକ ସମ୍ପର୍କକୁ ଆହୁରି ସୃଦୁଢ କରିବାକୁ ସହମତି ପ୍ରକାଶ କରିଛନ୍ତି । ଦିଲ୍ଲୀର ହାଇଦ୍ରାବାଦ ହାଉସରେ ପ୍ରଧାନମନ୍ତ୍ରୀ ଓ ଇଣ୍ଡୋନେସିଆ ରାଷ୍ଟ୍ରପତିଙ୍କ ମଧ୍ୟରେ ପ୍ରତିରକ୍ଷା ଓ ଯୋଗାଣ ଶୃଙ୍ଖଳ ପ୍ରସଙ୍ଗରେ ଚର୍ଚ୍ଚା ହୋଇଥିଲା ।
