ନୂଆଦିଲ୍ଲୀ,୦୧/୧୨: ଗତ କିଛି ଦିନ ହେବ 'ହାଇବ୍ରିଡ୍ ମଡେଲ୍'କୁ ନେଇ ସାରା ବିଶ୍ୱରେ ଆଲୋଚନା ହେଉଛି। କହିରଖୁଛୁ ଯେ, ୨୦୨୫ ଚାମ୍ପିଅନ୍ସ ଟ୍ରଫି ପାକିସ୍ତାନ ଆୟୋଜନ କରୁଛି। ପ୍ରାୟ ସମସ୍ତେ ଜାଣିଥିଲେ ଯେ ଏହି ଟୁର୍ନାମେଣ୍ଟ ପାଇଁ କୌଣସି ପରିସ୍ଥିତିରେ ଭାରତୀୟ କ୍ରିକେଟ୍ ଦଳ ପାକିସ୍ତାନ ଯିବ ନାହିଁ। କିନ୍ତୁ କ୍ରିକେଟ୍ ରେ ହାଇବ୍ରିଡ୍ ମଡେଲ୍ କ’ଣ ଏବଂ ଏହା କେଉଁଠାରୁ ଆସିଛି ତାହା ବିଷୟରେ ଜାଣିବା ନିହାତି ଆବଶ୍ୟକ। ସୂଚନାଥାଉକି, ହାଇବ୍ରିଡ ମଡେଲରେ ୨୦୨୫ ଚାମ୍ପିଅନ୍ସ ଟ୍ରଫି କରିବାକୁ ପାକିସ୍ତାନ ରାଜି ହୋଇଛି। ଭାରତ ପାକିସ୍ତାନ ଯିବାକୁ ମନା କରିବା ପରେ ଏହି ଟୁର୍ନାମେଣ୍ଟ କେବଳ ଏହି ଫର୍ମୁଲାରେ କରାଯିବାର ଥିଲା। ତେବେ କ୍ରିକେଟ୍ରେ ପ୍ରଥମ ଥର ପାଇଁ ହାଇବ୍ରିଡ୍ ମଡେଲ୍ ବ୍ୟବହାର ହେଉ ନାହିଁ। ବରଂ ପୂର୍ବରୁ ମଧ୍ୟ ଏପରି ଅନେକ ଥର ସମାନ ପରିସ୍ଥିତି ଘଟିଛି, ଫଳରେ ପରେ ଏହି ଫର୍ମୁଲା ଆପଣାଯାଇଥିଲା। ତେବେ ଆଇସିସି ଟୁର୍ନାମେଣ୍ଟରେ ଏହା ପ୍ରଥମ ଥର ପାଇଁ ଘଟୁଛି।
ହାଇବ୍ରିଡ ମଡେଲ କ'ଣ?
କ୍ରିକେଟ୍ରେ ହାଇବ୍ରିଡ୍ ମଡେଲ୍ ତାକୁ କୁହାଯାଏ, ଯେତେବେଳେ କୌଣସି କ୍ରିକେଟ ଟୁର୍ଣ୍ଣାମେଣ୍ଟ ଗୋଟିଏ ଦେଶ ପରିବର୍ତ୍ତେ ଦୁଇଟି ଦେଶରେ ଖେଳାଯାଏ, କିନ୍ତୁ ଏହା କେବଳ ଗୋଟିଏ ଦେଶ ଦ୍ୱାରା ଆୟୋଜିତ ହୋଇଥାଏ। ୨୦୨୫ ଚାମ୍ପିଅନ୍ସ ଟ୍ରଫିରେ ଟିମ୍ ଇଣ୍ଡିଆ ଦୁବାଇ (ସମ୍ଭାବ୍ୟ ଦେଶ) କିମ୍ବା ଅନ୍ୟ କୌଣସି ଦେଶରେ ଖେଳିବ, କିନ୍ତୁ ଟୁର୍ନାମେଣ୍ଟର ଆୟୋଜନ ସମ୍ପୂର୍ଣ୍ଣ ପାକିସ୍ତାନ ପାଖରେ ରହିବ। କ୍ରିକେଟ୍ରେ ସମାନ ମଡେଲକୁ ହାଇବ୍ରିଡ୍ ମଡେଲ୍ କୁହାଯାଏ।
୨୦୨୩ରୁ ହାଇବ୍ରିଡ ମଡେଲକୁ ନେଇ ବେଶ୍ ଚର୍ଚ୍ଚା:
ହାଇବ୍ରିଡ୍ ମଡେଲ୍ ପ୍ରଥମେ ୨୦୨୩ ରେ ଚର୍ଚ୍ଚାକୁ ଆସିଥିଲା। କହିରଖୁଛୁ ଯେ, ପାକିସ୍ତାନ ମଧ୍ୟ ୨୦୨୩ ଏସିଆ କପ୍ ଆୟୋଜନ କରିଥିଲା। ଏହି ଏସୀୟ ଟୁର୍ନାମେଣ୍ଟ ପାଇଁ ଭାରତ ପାକିସ୍ତାନ ଯିବାକୁ ମନା କରିଦେଇଥିଲା। ଏଭଳି ପରିସ୍ଥିତିରେ ଏହି ଟୁର୍ନାମେଣ୍ଟ ପୁନର୍ବାର ହାଇବ୍ରିଡ ମଡେଲରେ ଖେଳାଯାଇଥିଲା। ତା’ପରେ ଭାରତ ଶ୍ରୀଲଙ୍କାରେ ମ୍ୟାଚ୍ ଖେଳିଥିଲା। ତେବେ ହୋଷ୍ଟିଂ ସଂପୂର୍ଣ୍ଣ ଭାବେ ପାକିସ୍ତାନ ସହିତ ରହିଥିଲା। ଭାରତ ଏବଂ ପାକିସ୍ତାନ ମଧ୍ୟରେ ମ୍ୟାଚ୍ ମଧ୍ୟ ଶ୍ରୀଲଙ୍କାରେ ଖେଳାଯାଇଥିଲା। ଏହି ଫର୍ମୁଲାକୁ ତତ୍କାଳୀନ ପିସିବି ମୁଖ୍ୟ ନଜାମ ସେଠୀ ଆୟୋଜନ କରିଥିଲେ।
