ନୂଆଦିଲ୍ଲୀ,୩୧/୦୭: ସେପ୍ଟେମ୍ବରରେ ଭାରତର ୧୯ ବର୍ଷରୁ କମ୍ ଦଳ ଅଷ୍ଟ୍ରେଲିଆ ଗସ୍ତ କରିବାକୁ ଯାଉଛି, ଏଥିପାଇଁ ଆୟୁଷ ମହାତ୍ରେଙ୍କୁ ଟିମ୍ ଇଣ୍ଡିଆର ଅଧିନାୟକ ଭାବରେ ମନୋନୀତ କରାଯାଇଛି। ପୂର୍ବରୁ ଇଂଲଣ୍ଡ ଗସ୍ତରେ, ଆୟୁଷଙ୍କ ଅଧିନାୟକତ୍ୱରେ ଟିମ୍ ଇଣ୍ଡିଆ ଯୁବ ଦିନିକିଆ ସିରିଜରେ ଇଂଲଣ୍ଡକୁ ୩-୨ରେ ପରାସ୍ତ କରିଥିଲା। ତାଙ୍କ ଅଧିନାୟକତ୍ୱରେ, ଭାରତୀୟ ଦଳ ଇଂଲଣ୍ଡ ବିପକ୍ଷ ଯୁବ ଟେଷ୍ଟ ସିରିଜ ମଧ୍ୟ ଡ୍ର କରିଥିଲା। ସେପ୍ଟେମ୍ବର ମାସରେ, ଭାରତ ଏବଂ ଅଷ୍ଟ୍ରେଲିଆର ୧୯ ବର୍ଷରୁ କମ୍ ଦଳ ମଧ୍ୟରେ ୩ଟି ଦିନିକିଆ ଏବଂ ଦୁଇଟି ରେଡ୍-ବଲ୍ ମ୍ୟାଚ୍ ଖେଳାଯିବାର ଅଛି।
କହିରଖୁଛୁ ଯେ, ଇଂଲଣ୍ଡ ଗସ୍ତରେ ୱିକେଟକିପର ବ୍ୟାଟର ଅଭିଜ୍ଞାନ କୁଣ୍ଡୁଙ୍କୁ ୧୯ ବର୍ଷରୁ କମ ଦଳର ଉପ-ଅଧିନାୟକ ନିଯୁକ୍ତ କରାଯାଇଥିଲା। କୁଣ୍ଡୁଙ୍କୁ ମଧ୍ୟ ଅଷ୍ଟ୍ରେଲିଆ ଗସ୍ତ ପାଇଁ ଦଳରେ ସାମିଲ କରାଯାଇଛି, କିନ୍ତୁ ତାଙ୍କଠାରୁ ଉପ-ଅଧିନାୟକ ପଦ ଛଡ଼ାଇ ନିଆଯାଇ ବିହାନ ମାଲହୋତ୍ରାଙ୍କୁ ଦିଆଯାଇଛି। ବୈଭବ ସୂର୍ଯ୍ୟବଂଶୀ ମଧ୍ୟ ତାଙ୍କ ସ୍ଥାନ ବଜାୟ ରଖିଛନ୍ତି, ଯିଏକି ଟେଷ୍ଟ ସିରିଜରେ ଅଧିକ ରନ କରିନଥିଲେ କିନ୍ତୁ ଦିନିକିଆ ସିରିଜରେ ସର୍ବାଧିକ ରନ ସ୍କୋରର ଥିଲେ। ଇଂଲଣ୍ଡ ବିପକ୍ଷ ଯୁବ ଦିନିକିଆ ସିରିଜରେ ବୈଭବ ୫ ଇନିଂସରେ ୭୧ ର ପ୍ରଭାବଶାଳୀ ହାରରେ ୩୫୫ ରନ କରିଥିଲେ। ତାଙ୍କ ବ୍ୟତୀତ ରାହୁଲ କୁମାର, ହରବଂଶ ସିଂହ, ଆରେସ୍ ଆମ୍ବ୍ରିସ୍, କନିଷ୍କ ଚୌହାନ ଏବଂ ହେନିଲ୍ ପଟେଲ ମଧ୍ୟ ନିଜ ସ୍ଥାନ ବଜାୟ ରଖିଛନ୍ତି।
ଭାରତୀୟ ଦଳରେ ସାମିଲ ହୋଇଥିବା କିଛି ନୂଆ ଖେଳାଳି ହେଲେ କିଷନ କୁମାର, ଉଦ୍ଧବ ମୋହନ, ଅମନ ଚୌହାନ ଏବଂ ଖିଲନ ପଟେଲ। ଡାହାଣ ଗୋଡ଼ ମାଂସପେଶୀରେ ଆଘାତ ଯୋଗୁଁ ପଟେଲ ଇଂଲଣ୍ଡ ଗସ୍ତରେ ଯାଇପାରିଲେ ନାହିଁ। ଭାରତର ୧୮ ଜଣିଆ ଦଳରେ ଅଭିଜ୍ଞାନ କୁଣ୍ଡୁ ଏବଂ ହରବଂଶ ସିଂହଙ୍କ ରୂପରେ ଦୁଇଜଣ ୱିକେଟକିପର-ବ୍ୟାଟର ରହିବେ। ଯୁଦ୍ଧଜିତ ଗୁହା, ଲକ୍ଷ୍ମଣ ବିକେ କିଶୋର, ଅଳଂକୃତ ରାପୋଲ ଏବଂ ଅର୍ଣ୍ଣବ ବାଗାଙ୍କୁ ଷ୍ଟାଣ୍ଡ ବାଇ/ରିଜର୍ଭ ଖେଳାଳି ଭାବରେ ଦଳରେ ସାମିଲ କରାଯାଇଛି।
ଅଷ୍ଟ୍ରେଲିଆ ଟୁର୍ ପାଇଁ ଭାରତୀୟ ଅଣ୍ଡର ୧୯ ସ୍କ୍ବାର୍ଡ:
ଆୟୁଷ ମାଥ୍ରେ (ଅଧିନାୟକ), ଭିହାନ୍ ମଲହୋତ୍ରା (ଉପ ଅଧିନାୟକ), ବୈବଭ ସୁର୍ଯ୍ୟବନ୍ସି, ବେଦାନ୍ତ ତ୍ରିବେଦୀ, ରାହୁଲ କୁମାର, ଅଭିଜ୍ଞାନ କୁଣ୍ଡୁ (ୱିକେଟ୍ କିପର), ହରବଂଶ ସିଂ (ୱିକେଟ୍ କିପର), ଆର.ଏସ୍ ଅମ୍ବରିସ୍, କନିଷ୍କ ଚୌହାନ, ନମନ ପୁଷ୍ପକ, ହେନିଲ ପଟେଲ, ଡି ଡିପେଶ, କିଶାନ କୁମାର, ଅନମୋଲଜିତ ସିଂହ, ଖିଲାନ ପଟେଲ, ଉଦ୍ଧବ ମୋହନ, ଅମନ ଚୌହାନ
