ପ୍ରତିବର୍ଷ ପରି ଏବର୍ଷ ୨ ଏପ୍ରିଲ ୨୦୨୫କୁ ବିଶ୍ୱ ଅଟିଜିମ୍ ସଚେତନତା ଦିବସ ରୂପେ ପାଳନ କରାଯାଉଛି । ଏହାର ଉଦ୍ଦେଶ୍ୟ ହେଉଛି, ଅଟିଜିମ୍ ସ୍ପେକ୍ଟମ୍ ବିକାର ବା ସ୍ୱପରାୟଣତା ବିକାର ସମ୍ପର୍କରେ ସମାଜରେ ସଚେତନତା ବୃଦ୍ଧି କରିବା ଏବଂ ଏମାନଙ୍କୁ ସମାନ ଅଧିକାର ଓ ପରିଚୟ ଦେବା । ଏ ବର୍ଷର ବିଷୟବସ୍ତୁ ହେଉଛି ଅଟିଜିମ୍ର ସଞ୍ଜୀବନୀ ହେଉଛି ସ୍ନେହ, କରୁଣା, ଧୈର୍ଯ୍ୟ ଓ ସହନଶୀଳତା ଦ୍ୱାରା ସେମାନଙ୍କ ଜୀବନରେ ଏକ ଆଲୋକ ସୃଷ୍ଟି କରିବା । ଅଟିଜିମ୍ ବିକାର ହେଉଛି ଏକ ଜଟିଳ ସ୍ନାୟୁତନ୍ତ୍ର ବିକାଶଜନିତ ଅବସ୍ଥା, ଯାହା ବ୍ୟକ୍ତିମାନଙ୍କ ସାମାଜିକ ଆଚରଣ, ଯୋଗାଯୋଗ ଏବଂ ବ୍ୟବହାରରେ ପ୍ରଭାବ ପକାଇଥାଏ । ଏହି ବିକାର ସାଧାରଣତଃ ଶିଶୁର ଜନ୍ମ ହେବା ପ୍ରଥମ ୨-୩ ବର୍ଷରେ ଏହି ଲକ୍ଷଣ ଦେଖାଯାଏ ଏବଂ ସାରାଜୀବନ ରହିଥାଏ । ଏହାର ଲକ୍ଷଣଗୁଡ଼ିକୁ ଚିହ୍ନଟ କରିବା ଆବଶ୍ୟକ ଅଟେ ।
କାରଣ ଏହି ଲକ୍ଷଣଗୁଡ଼ିକ ସାଧାରଣତଃ ଯୋଗାଯୋଗରେ ଅସୁବିଧା, ଆଚରଣ ଏବଂ ସାମାଜିକ ଅନ୍ତକ୍ରିୟାକୁ ପ୍ରଭାବିତ କରିଥାଏ । ଏହି ଅବସ୍ଥା ଥିବା ଶିଶୁ ବା ବ୍ୟକ୍ତିମାନେ ଆଖିରେ ଆଖି ମିଳାଇବାରେ ଅସୁବିଧା ଅନୁଭବ କରନ୍ତି ଏବଂ ସମାଜରେ ସମ୍ପର୍କ ଗଠନ କରିବାରେ କଠିନ ଅନୁଭବ କରନ୍ତି । ସେମାନେ ପୁନରାବୃତ୍ତି ଆଚରଣ ବା ଗୋଟିଏ କାମକୁ ବାରମ୍ବାର କରିବାରେ ଲିପ୍ତ ରୁହନ୍ତି । ନିର୍ଦ୍ଦିଷ୍ଟ ବିଷୟରେ ଅତ୍ୟଧିକ ଜାଣିବାରେ ଆସକ୍ତି, ନିତିଦିନିଆ କାର୍ଯ୍ୟରେ ଯଦି ପରିବର୍ତ୍ତନ କରାଯାଏ ତେବେ ସେମାନେ ଅସ୍ଥିରତା ଅନୁଭବ କରନ୍ତି । ଇନ୍ଦ୍ରିୟଗତ ସମସ୍ୟା ମଧ୍ୟ ସେମାନଙ୍କ ଠାରେ ଦେଖାଯାଏ, ଯେପରିକି ଶବ୍ଦ, ଆଲୋକ କିମ୍ବା ସ୍ପର୍ଶ ପ୍ରତି ଅସାଧାରଣ ପ୍ରତିକ୍ରିୟା ରହିଥାଏ । ଅଟିଜିମ୍ ବ୍ୟକ୍ତିମାନଙ୍କର ଭାଷାର ବିକାଶରେ ବିଳମ୍ବ ହୋଇଥାଏ ଏବଂ ଅସାମାନ୍ୟ ଧ୍ୱନି ବା ସ୍ୱରଶୈଳୀ ବ୍ୟବହାର କରନ୍ତି । ନିଜର ଭାବନାକୁ ନିୟନ୍ତ୍ରଣ ସମସ୍ୟା ଏବଂ ବ୍ୟାବହାରିକ ସମସ୍ୟା ଦେଖାଯାଏ । ଅଟିଜିମ୍ର ସଠିକ୍ କାରଣ ସମ୍ପୂର୍ଣ୍ଣ ଭାବରେ ସ୍ପଷ୍ଟ ନୁହେଁ, କିନ୍ତୁ କେତେକ ଗବେଷଣାରୁ ଜଣାପଡ଼ିଛି ଯେ, ଏହା ହେଉଛି ଜନ୍ମଗତ, ବଂଶଗତ ଏବଂ ପରିବେଶୀୟ କାରଣର ଏକ ସଂଯୋଗଫଳ ସ୍ୱରୂପ ।
ଜନ୍ମଗତ ରୂପାନ୍ତରଣ କିମ୍ବା ବଂଶଗତ ବିଭିନ୍ନତା ମସ୍ତିଷ୍କର ବିକାଶକୁ ପ୍ରଭାବିତ କରି ଅଟିଜିମ୍ ହେବାର ସମ୍ଭାବନା ବଢ଼ାଇଥାଏ । ପ୍ରସବ ସମୟରେ ହୋଇଥିବା ଅସୁବିଧା, ଜନ୍ମହେବା ପୂର୍ବରୁ ଶିଶୁଟିଏ ଜନ୍ମହେବା, ଗର୍ଭାବସ୍ଥାରେ କିଛି ରାସାୟନିକ ବା ଭିଟାମିନ ଅଭାବ, ମାତୃର ମାନସିକ ସ୍ୱାସ୍ଥ୍ୟରେ ବିଷାଦ ଭାବ ଏବଂ ଦୂଷିତ ପରିବେଶ ପ୍ରଭୃତି କେତେକ ପରିବେଶଗତ ଉପାଦାନ ମଧ୍ୟରେ ଅଟିଜିମ୍ଜନିତ ବିକାରର ଭୂମିକା ଗ୍ରହଣ କରାଯାଇଛି । କିନ୍ତୁ କୌଣସି ନିର୍ଦ୍ଦିଷ୍ଟ ହେତୁ ଏପର୍ଯ୍ୟନ୍ତ ଚିହ୍ନଟ କରାଯାଇନାହିଁ ଯେ, ଏହାଦ୍ୱାରା ଅଟିଜିମ୍ଜନିତ ବିକାର ହେଉଛି । ଅଟିଜିମ୍ ସମ୍ଭବତଃ ବହୁ ଉପାଦାନର ମିଶ୍ରିତ ପ୍ରଭାବ ଫଳରେ ମସ୍ତିଷ୍କର ପ୍ରାରମ୍ଭିକ ବିକାଶକୁ ପ୍ରଭାବ ପକାଏ । ଯେପରିକି କେତେକ ଅଧ୍ୟୟନରୁ ଦେଖାଯାଇଛି ଯେ, ଗର୍ଭାବସ୍ଥା ସମୟରେ ରୁବେଲା ଏବଂ ସାଇଟୋ ମେଗାଲୋଭାଇରସ୍ ଭଳି ସଂକ୍ରମଣ ଘଟିଲେ ଶିଶୁମାନଙ୍କୁ ଅଟିଜିମ୍ଜନିତ ବିକାର ହେବାର ସମ୍ଭାବନା ଥାଏ । ସହରାଞ୍ଚଳ ଏବଂ ଗ୍ରାମାଞ୍ଚଳରେ ଅଟିଜିମ୍ ସଚେତନତାର ବାର୍ତ୍ତା ଦେବା ଆବଶ୍ୟକ ଅଟେ, କାରଣ ସବୁ ଶିଶୁ ଅଟିଜିମ୍ଜନିତ ବିକାରରେ ନଥାନ୍ତି, ଯେମିତିକି ୧୦୦ ଜଣଙ୍କ ମଧ୍ୟରୁ ୧ ଜଣଙ୍କୁ ହୋଇଥାଏ ଅଟିଜିମ୍ ।
ସହରାଞ୍ଚଳରେ ଯେତେବେଳେ ପିତାମାତା ଜାଣୁଛନ୍ତି ଯେ, ଏହି ପ୍ରକାର ବିକାର ଅଛି ସେମାନେ ଏହାକୁ ଚିକିତ୍ସା କରୁଛନ୍ତି । କିନ୍ତୁ ଗ୍ରାମାଞ୍ଚଳରେ ଅଟିଜିମ୍ କ’ଣ ଲୋକମାନେ ଜାଣିନାହାନ୍ତି, ସେମାନେ ଏହାକୁ ଗୁପ୍ତ ରଖନ୍ତି । ଗ୍ରାମାଞ୍ଚଳରେ କୌଣସି ଚିକିତ୍ସା କିମ୍ବା ସେମାନଙ୍କୁ ଶିକ୍ଷା ଦେବାର ସୁବିଧା ନଥାଏ । ଧନୀ ଶ୍ରେଣୀର ଲୋକମାନଙ୍କ ଠାରୁ ଗରିବ ଶ୍ରେଣୀର ଲୋକମାନେ ବେଶୀ ପ୍ରଭାବିତ ହୋଇଥାନ୍ତି । ୨୦୨୧ ମସିହାରେ ଏକ ଅନୁସନ୍ଧାନ ଅନୁଯାୟୀ ଭାରତରେ ପ୍ରତ୍ୟେକ ୬୮ ଜଣ ଶିଶୁଙ୍କ ମଧ୍ୟରୁ ୧ ଜଣକୁ ଅଟିଜିମ୍ ପ୍ରଭାବିତ କରିଥାଏ । ଏଥିରେ ପୁରୁଷ ଶିଶୁମାନେ ମହିଳା ଶିଶୁମାନଙ୍କ ତୁଳନାରେ ଅଧିକ ପ୍ରଭାବିତ ହେଉଛନ୍ତି । ପୁରୁଷ ଏବଂ ମହିଳା ମଧ୍ୟରେ ଏହାର ଅନୁପାତ ପ୍ରାୟ ୩:୧ ଅଟେ । ୨୦୨୪ ମସିହାରେ ଏକ ନୂତନ ଅଧ୍ୟୟନ କରାଯାଇଛି ଯେଉଁଥିରେ ୩୬ ଜଣ ଶିଶୁଙ୍କ ମଧ୍ୟରୁ ୧ ଜଣକୁ ଅଟିଜିମ୍ ପ୍ରଭାବିତ କରିଛି । ଉଦାହରଣ ସ୍ୱରୂପ, ଉତ୍ତର ଗୋଆ ୦.୪%, ହରିୟାନା ଏବଂ ପାଲୱାରେ ୧.୮% ଅଟିଜିମ୍ ବିକାର ପ୍ରଭାବିତ କରିଛି ।
ଓଡ଼ିଶାରେ ଏକ ଗଣନାରୁ ଜଣାପଡ଼ିଛି ଯେ, ୧୦୦୦ ଜଣ ଶିଶୁ ମଧ୍ୟରୁ ୪ ଜଣଙ୍କୁ ଅଟିଜିମ୍ ବିକାର ପ୍ରଭାବିତ କରିଛି । ଅଟିଜିମ୍ ବିକାର ଥିବା ଶିଶୁଙ୍କ ପାଇଁ ଅନୁକୂଳ ପରିବେଶ, ସହଯୋଗ ଓ ନିୟମିତ ଚିକିତ୍ସା ଅତ୍ୟନ୍ତ ଜରୁରି । ଏହି ଶିଶୁମାନେ ଅନ୍ୟମାନଙ୍କ ଠାରୁ ଅଲଗା ଏବଂ ଏମାନେ ଜଗତକୁ ଅଲଗା ଭାବରେ ଅନୁଭବ କରନ୍ତି । ଏହି ବିକାରରେ ଥିବା ଶିଶୁ, ବ୍ୟକ୍ତିମାନଙ୍କୁ ସାମାଜିକ, ଭାଷାଗତ ଏବଂ ଦୈନନ୍ଦିନ କାର୍ଯ୍ୟକଳାପରେ ଉନ୍ନତି ଆଣିବା ପାଇଁ ଯଥାଶୀଘ୍ର ଧ୍ୟାନ ଦେବାର ଆବଶ୍ୟକତା ରହିଛି । କେତେଗୁଡ଼ିଏ ଚିକିତ୍ସା ରହିଛି, ଯାହା ଚିକିତ୍ସା କେନ୍ଦ୍ରକୁ ଯାଇ ଚିକିତ୍ସା କରାଯାଇପାରିବ ।
ଏହି ଚିକିତ୍ସାଗୁଡ଼ିକ ହେଉଛି ବ୍ୟାବହାରିକ ଚିକିତ୍ସା, ବାକ୍ ଏବଂ ଭାଷାଗତ ଚିକିତ୍ସା ଏବଂ ଅକ୍ୟୁପେସନାଲ ଚିକିତ୍ସା ଅଟେ । ଏହି ଚିକିତ୍ସା ଦ୍ୱାରା ଶିଶୁଟି ସମାଜରେ କିପରି ବ୍ୟବହାର, ଆଚରଣ, କଥା କହିବା, ଭାଷା ପ୍ରୟୋଗ, ଚାଲିବା, ବସିବା, ବୁଲିବା ଏବଂ ସାମାଜିକ ସମ୍ପର୍କ ଗଠନ କରିବାରେ ସାହାଯ୍ୟ କରିଥାଏ । ଅଟିଜିମ୍ଜନିତ ବିକାର ଥିବା ବ୍ୟକ୍ତି ବା ଶିଶୁମାନଙ୍କୁ ଅନେକ ପ୍ରକାରର ଚିକିତ୍ସା ମାଧ୍ୟମରେ ସାହାଯ୍ୟ କରାଯାଇପାରେ । ପ୍ରତ୍ୟେକ ପିଲା ଅଲଗା ଅଲଗା ଅଭିଜ୍ଞତା ରଖନ୍ତି । ତେଣୁ ଉପଯୁକ୍ତ ଚିକିତ୍ସା ସହ ସେମାନଙ୍କୁ ସ୍ନେହ, କରୁଣା, ଧୈର୍ଯ୍ୟ ଓ ସହନଶୀଳତା ପିତାମାତା ଓ ଶିକ୍ଷକମାନେ ଦେବା ଆବଶ୍ୟକ ଅଟେ । ଅଟିଜିମ୍ ବିକାର ଥିବା ଶିଶୁମାନଙ୍କୁ ସ୍ନେହ, କରୁଣାର ରଜ୍ଜୁରେ ବାନ୍ଧିରଖିବା ଦ୍ୱାରା ସେମାନେ ଯଥେଷ୍ଟ ସମ୍ମାନ ଓ ସହଯୋଗ ଲାଭ କରିପାରନ୍ତି । ଏହାଦ୍ୱାରା ସେମାନେ ମଧ୍ୟ ଏକ ସୁନ୍ଦର ଭବିଷ୍ୟତ ଗଠନ କରିପାରିବେ ।
