ନୂଆଦିଲ୍ଲୀ,୩୧।୩: ଭାରତରେ ଅପ୍ରେଲରୁ ଜୁନ୍ ପର୍ଯ୍ୟନ୍ତ ତାପମାତ୍ରା ସ୍ୱାଭାବିକଠାରୁ ଅଧିକ ରହିବାର ସମ୍ଭାବନା ଅଛି।  ମଧ୍ୟ ଏବଂ ପୂର୍ବ ଭାରତ ସହିତ ଉତ୍ତର-ପଶ୍ଚିମ ସମତଳ ଅଞ୍ଚଳରେ ଅଧିକ ଦିନ ପାଇଁ ଲୁ’ର ପ୍ରକୋପ ଦେଖାଦେଇପାରେ। ସୋମବାର ଭାରତୀୟ ପାଣିପାଗ ବିଭାଗ (IMD) ଏହା କହିଛି। ଆଇଏମଡି ମୁଖ୍ୟ ମୃତ୍ୟୁଞ୍ଜୟ ମହାପାତ୍ର କହିଛନ୍ତି, ପଶ୍ଚିମ ଏବଂ ପୂର୍ବ ଭାରତର କିଛି ଅଞ୍ଚଳ ବ୍ୟତୀତ ଦେଶର ଅଧିକାଂଶ ସ୍ଥାନରେ ସର୍ବାଧିକ ତାପମାତ୍ରା ସ୍ୱାଭାବିକଠାରୁ ଅଧିକ ରହିବ। ଏହି ଉଭୟ ଅଞ୍ଚଳରେ ତାପମାତ୍ରା ସ୍ୱାଭାବିକ ରହିବାର ସମ୍ଭାବନା ଅଛି। ସେ କହିଛନ୍ତି, ଏପ୍ରିଲରୁ ଜୁନ୍ ପର୍ଯ୍ୟନ୍ତ, ଉତ୍ତର ଏବଂ ପୂର୍ବ ଭାରତ, ମଧ୍ୟ ଭାରତ ଏବଂ ଉତ୍ତର-ପଶ୍ଚିମ ଭାରତର ସମତଳ ଅଞ୍ଚଳଗୁଡ଼ିକର ଅଧିକାଂଶ ଅଞ୍ଚଳରେ ସ୍ୱାଭାବିକ ଅପେକ୍ଷା ଦୁଇରୁ ଚାରି ଦିନ ଅଧିକ ଗ୍ରୀଷ୍ମପ୍ରବାହ ଅନୁଭୂତ ହେବାର ସମ୍ଭାବନା ଅଛି।’ ସାଧାରଣତଃ, ଭାରତରେ ଅପ୍ରେଲରୁ ଜୁନ୍ ପର୍ଯ୍ୟନ୍ତ ଚାରି ରୁ ସାତ ଦିନ ପାଇଁ ଲୁ’ ପବନ ଚାଲିଥାଏ। ଅଧିକାଂଶ ଅଞ୍ଚଳରେ ସର୍ବନିମ୍ନ ତାପମାତ୍ରା ସ୍ୱାଭାବିକଠାରୁ ଅଧିକ ରହିବାର ସମ୍ଭାବନା ମଧ୍ୟ ଅଛି। 

ଏହି ସବୁ ରାଜ୍ୟରେ ଚାଲିବ ଲୁ’ ପବନ

IMD ର ଜଣେ ଅଧିକାରୀ ପୂର୍ବରୁ କହିଥିଲେ ଯେ ଉତ୍ତର-ପଶ୍ଚିମ ଭାରତରେ ଗ୍ରୀଷ୍ମ ଋତୁରେ ହିଟ୍ଓ୍ବେଭ ଦିନ ସଂଖ୍ୟା ଦ୍ୱିଗୁଣିତ ହୋଇପାରେ। ଗ୍ରୀଷ୍ମ ଋତୁରେ ଏହି ଅଞ୍ଚଳରେ ସାଧାରଣତଃ ପାଞ୍ଚରୁ ଛଅ ଦିନ ପାଇଁ ଲୁ’ ଚାଲିଥାଏ। ଯେଉଁ ରାଜ୍ୟଗୁଡ଼ିକରେ ସାଧାରଣ ଦିନଠାରୁ ଅଧିକ ସମୟ ପାଇଁ ଗ୍ରୀଷ୍ମ ପ୍ରବାହ ଜାରି ରହିବାର ସମ୍ଭାବନା ରହିଛି ସେଗୁଡ଼ିକ ହେଲା ରାଜସ୍ଥାନ, ଗୁଜରାଟ, ହରିୟାଣା, ପଞ୍ଜାବ, ମଧ୍ୟ ପ୍ରଦେଶ, ମହାରାଷ୍ଟ୍ର, ଉତ୍ତର ପ୍ରଦେଶ, ବିହାର, ଝାଡ଼ଖଣ୍ଡ, ପଶ୍ଚିମବଙ୍ଗ, ଓଡ଼ିଶା, ଛତିଶଗଡ଼, ତେଲେଙ୍ଗାନା, ଆନ୍ଧ୍ର ପ୍ରଦେଶ ଏବଂ କର୍ଣ୍ଣାଟକର ଉତ୍ତର ଅଂଶ ଏବଂ ତାମିଲନାଡୁ।

ଏପ୍ରିଲରେ ଭାରତର ଅଧିକାଂଶ ସ୍ଥାନରେ ସର୍ବାଧିକ ତାପମାତ୍ରା ସ୍ୱାଭାବିକଠାରୁ ଅଧିକ ରହିବ ବୋଲି ଆଶା କରାଯାଉଛି। ତଥାପି,ଦକ୍ଷିଣ ଏବଂ ଉତ୍ତର-ପଶ୍ଚିମ ଅଞ୍ଚଳର କିଛି ଅଞ୍ଚଳରେ ତାପମାତ୍ରା ସ୍ୱାଭାବିକ ରହିପାରେ। ଦେଶର ଅଧିକାଂଶ ସ୍ଥାନରେ ସର୍ବନିମ୍ନ ତାପମାତ୍ରା ସ୍ୱାଭାବିକଠାରୁ ଅଧିକ ରହିବ, ଉତ୍ତର-ପଶ୍ଚିମ ଏବଂ ଉତ୍ତର-ପୂର୍ବର କିଛି ସ୍ଥାନ ବ୍ୟତୀତ, ଯେଉଁଠାରେ ତାପମାତ୍ରା ସ୍ୱାଭାବିକ କିମ୍ବା ସ୍ୱାଭାବିକ ଠାରୁ ଟିକିଏ କମ୍ ରହିପାରେ। 

ବଢିବ ବିଜୁଳି ବ୍ୟବହାର

ବିଶେଷଜ୍ଞଙ୍କ ମତରେ, ଭାରତ ଏହି ଗ୍ରୀଷ୍ମ ଋତୁରେ ବିଦ୍ୟୁତ ଚାହିଦାରେ ୯ ରୁ ୧୦ ପ୍ରତିଶତ ବୃଦ୍ଧି ପାଇଁ ପ୍ରସ୍ତୁତ ରହିବା ଉଚିତ। ଗତ ବର୍ଷ, ମେ ୩୦ ତାରିଖରେ ସାରା ଦେଶରେ ସର୍ବାଧିକ ବିଦ୍ୟୁତ ଚାହିଦା ୨୫୦ ଗିଗାବାଇଟ୍ ଅତିକ୍ରମ କରିଥିଲା, ଯାହା ପୂର୍ବ ଆକଳନ ଅପେକ୍ଷା ୬.୩ ପ୍ରତିଶତ ଅଧିକ ଥିଲା। ବିଦ୍ୟୁତ ଚାହିଦା ବୃଦ୍ଧିର ପ୍ରମୁଖ କାରଣ ହେଉଛି ଜଳବାୟୁ ପରିବର୍ତ୍ତନ।