ନୂଆଦିଲ୍ଲୀ: ଅପରେସନ୍ ସିନ୍ଦୂରକୁ ନେଇ ଚର୍ଚ୍ଚା ଲାଗିରହିଛି । ପିଓକେ ଏବଂ ପାକିସ୍ତାନରେ ରହି ଭାରତ ବିରୋଧରେ ଷଡ଼ଯନ୍ତ୍ର ରଚୁଥିବା ଆତଙ୍କବାଦୀଙ୍କୁ ଜବାବ ଦେବାକୁ ଅପରେସନ୍ ସିନ୍ଦୂର ଆରମ୍ଭ କରିଥିଲା ଭାରତ । ଭାରତୀୟ ସେନାର ଆତଙ୍କ ବିରୋଧୀ ଏହି ଅପରେସନକୁ ବିଶ୍ବ ମଧ୍ୟ ପ୍ରଶଂସା କରିଥିଲା । ଆଉ ଏବେ ଅପରେସନ୍ ସିନ୍ଦୂରକୁ ନେଇ ସିଡିଏସ୍ ଜେନେରାଲ ଅନୀଲ ଚୌହାନ ବଡ଼ ମନ୍ତବ୍ୟ ଦେଇଛନ୍ତି । ସିଡିଏସ୍ ଜେନେରାଲ ଅନୀଲ ଚୌହାନ କହିଛନ୍ତି ଯେ 'ଅପରେସନ୍ ସିନ୍ଦୂର' ଏବେ ବି ଚାଲିଛି ଏବଂ ସେନାକୁ ସବୁବେଳେ ସତର୍କ ରହିବାକୁ ପଡିବ ।
ସେ କହିଛନ୍ତି ଯେ, ଯୁଦ୍ଧ ପାଇଁ ଶସ୍ତ୍ର (ଅସ୍ତ୍ର) ଏବଂ ଶାସ୍ତ୍ର ଉଭୟ ଆବଶ୍ୟକ। ସେନା ସମସ୍ତ ପରିସ୍ଥିତିରେ ୩୬୫ ଦିନ ପ୍ରସ୍ତୁତ ରହିବା ଉଚିତ । ଯୁଦ୍ଧ କେବଳ ଅସ୍ତ୍ରଶସ୍ତ୍ର ସହିତ ନୁହେଁ, ବରଂ ଶାସ୍ତ୍ର ଅର୍ଥାତ୍ ଜ୍ଞାନ ସହିତ ମଧ୍ୟ ଲଢ଼ାଯାଏ । ଆଜିର ଯୁଦ୍ଧ ପାରମ୍ପରିକ ଏବଂ ଆଧୁନିକ ପଦ୍ଧତିର ମିଶ୍ରଣ, ଯେଉଁଥିରେ ଗତିଜ (ଅସ୍ତ୍ର-ଆଧାରିତ) ଏବଂ ଅଣ-ଗତିଜ (ସୂଚନା-ଆଧାରିତ) ରଣନୀତି ଉଭୟ ଅନ୍ତର୍ଭୁକ୍ତ । ଏହା ପ୍ରଥମ, ଦ୍ୱିତୀୟ ଏବଂ ତୃତୀୟ ପିଢ଼ିର ଯୁଦ୍ଧ କୌଶଳର ସମନ୍ୱୟ ।
ଏହା ପୂର୍ବରୁ କେନ୍ଦ୍ର ସରକାର ଗୁରୁବାର ସଂସଦରେ କହିଥିଲେ ଯେ, ଅପରେସନ ସିନ୍ଦୂର ମେ’୭ରେ ଆରମ୍ଭ ହୋଇଥିଲା । ଏହି ଅପରେସନ୍ ଏପ୍ରିଲ ୨୨ ରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଭାରତର ପ୍ରତିଶୋଧମୂଳକ କାର୍ଯ୍ୟାନୁଷ୍ଠାନ ଥିଲା। ବୈଦେଶିକ ବ୍ୟାପାର ରାଷ୍ଟ୍ରମନ୍ତ୍ରୀ କୀର୍ତ୍ତି ବର୍ଦ୍ଧନ ସିଂହ ରାଜ୍ୟସଭାରେ କହିଥିଲେ, ଏହି ଅପରେସନ ଆତଙ୍କୀ ଭିତ୍ତିଭୂମିକୁ ନଷ୍ଟ କରିବା ଏବଂ ଆତଙ୍କବାଦୀଙ୍କୁ ନିପାତ କରିବା ପାଇଁ ହୋଇଥିଲା ।
ଅନ୍ତର୍ଜାତୀୟ ଚାପରେ ଅପରେସନ ସିନ୍ଦୂର ଆରମ୍ଭ କରାଯାଇଥିଲା କି ପ୍ରଶ୍ନରେ ବୈଦେଶିକ ମନ୍ତ୍ରଣାଳୟ କରିଥିଲା ଯେ, ଏହା ଭାରତର ନିଜସ୍ବ ଏବଂ ଦୃଢ଼ ପ୍ରତିକ୍ରିୟା ଥିଲା। ପାକିସ୍ତାନ ଭାରତୀୟ ନାଗରିକ ଏବଂ ସାମରିକ ଠିକଣା ଉପରେ ଆକ୍ରମଣ କରିବାକୁ ଚେଷ୍ଟା କରିଥିଲା, କିନ୍ତୁ ଭାରତର ସେନା ସମସ୍ତ ବଡ଼ ଆକ୍ରମଣକୁ ପଣ୍ଡ କରିଦେଇଥିଲା । ଅପରେସନ ସିନ୍ଦୁର ଅଧୀନରେ, ଭାରତ ପାକିସ୍ତାନ ଏବଂ ପିଓକେରେ ଅବସ୍ଥିତ ଜୈଶ-ଏ-ମହମ୍ମଦ, ହିଜବୁଲ ମୁଜାହିଦ୍ଦିନ ଏବଂ ଲସ୍କର-ଏ ତୋଇବା ଭଳି ଆତଙ୍କବାଦୀ ସଂଗଠନର ୯ଟି ଆତଙ୍କବାଦୀ ଶିବିରକୁ ଧ୍ୱଂସ କରିଥିଲା ଏବଂ ୧୦୦ ରୁ ଅଧିକ ଆତଙ୍କବାଦୀଙ୍କୁ ନିପାତ କରିଥିଲା ।
