ନୂଆଦିଲ୍ଲୀ,୨୬/୦୭: ଷ୍ଟ୍ରବେରୀର ନୂଆ ରୋଗ ଚିହ୍ନଟ କଲେ ବୈଜ୍ଞାନିକ। ଷ୍ଟ୍ରବେରୀ ଫଳରେ ହେଉଥିବା କ୍ରାଉନ୍ ରଟ୍ ରୋଗର ଏକ ନୂଆ ରୋଗ କାରକ ଚିହ୍ନଟ। ହରିୟାଣାର ହିସାର ସ୍ଥିତ ଚୌଧରୀ ଚରଣ ସିଂହ ହରିୟାଣା କୃଷି ବିଶ୍ୱବିଦ୍ୟାଳୟର ବୈଜ୍ଞାନିକମାନେ ଏହି କାରକ ଚିହ୍ନଟ କରିଛନ୍ତି । ଯାହା ହେଉଛି କୋଲେଟୋଟ୍ରିକମ୍ ନିମ୍ଫେଇ ।
ବୈଜ୍ଞାନିକମାନେ ଏବେ ଏହି ରୋଗର ନିୟନ୍ତ୍ରଣ ଓ ସମାଧାନ ଉପରେ କାମ କରୁଛନ୍ତି । ଖୁବ୍ଶୀଘ୍ର ଏହାର ମୁକାବିଲା ଉପାୟ ମିଳିବ ବୋଲି ସେମାନେ ଆଶାବାଦୀ । ଏହି ଅଧ୍ୟୟନକୁ ଅନ୍ତର୍ଜାତୀୟ ସ୍ତରରେ ମାନ୍ୟତା ମିଳିଛି । ବୈଜ୍ଞାନିକଙ୍କ ରିପୋର୍ଟକୁ ଡଚ୍ ଶିକ୍ଷଣ ପ୍ରକାଶନ ସଂସ୍ଥା ଏଲ୍ସେଭିୟର୍ର ପତ୍ରିକା ସାଇକୋଲୋଜିକାଲ ଆଣ୍ଡ୍ ମଲିକ୍ୟୁଲାର ପ୍ଲାଣ୍ଟ୍ ପାଥୋଲୋଜିରେ ପ୍ରଥମ ଅଧ୍ୟୟନର ପ୍ରକାଶ ନିମନ୍ତେ ସ୍ୱୀକୃତି ମିଳିଛି । ପତ୍ରିକାକୁ ଉଦ୍ଭିଦ ରୋଗ ସମ୍ପର୍କିତ ବିଶ୍ୱର ଅନ୍ୟତମ ସର୍ବପ୍ରାଚୀନ ଓ ବିଶ୍ୱସନୀୟ ବୈଜ୍ଞାନିକ ପ୍ରକାଶନ କୁହାଯାଏ । ଏହା ହରିୟାଣା ଓ ଭାରତ ପାଇଁ ଏକ ବଡ଼ ବୈଜ୍ଞାନିକ ଉପଲବ୍ଧି ।
ଅନୁସନ୍ଧାନର ନିର୍ଦ୍ଦେଶକ ଡା. ରାଜବୀର ଗର୍ଗ କହିଛନ୍ତି, ଷ୍ଟ୍ରବେରୀ ପାଇଁ ହିସାର ଉତ୍ତର ଭାରତର ବହୁତ ବଡ଼ ହବ୍ ହୋଇଛି । ଏଠାରେ ପ୍ରାୟ ୭୦୦ ଏକରରେ ଷ୍ଟ୍ରବେରୀ ଚାଷ ହେଉଛି । କିନ୍ତୁ ଏହି ରୋଗ ଯୋଗୁ ଷ୍ଟ୍ରବେରୀରେ ଗତ ବର୍ଷ ହାରାହାରି ୨୦-୨୨ ପ୍ରତିଶତ କ୍ଷତି ହୋଇଥିଲା । ହିସାରର ସ୍ୟାହଡ଼ୱା ଗାଁର ଷ୍ଟ୍ରବେରୀ ସ୍ୱାଦ ବିଦେଶରେ ଲୋକପ୍ରିୟ ହୋଇଛି । ଆଖପାଖର ୩ ଗାଁ ଏହି ଗାଁରୁ ପ୍ରେରିତ ହୋଇ ଷ୍ଟ୍ରବେରୀ ଚାଷ କରୁଛନ୍ତି । କ୍ରାଉନ୍ ରଟ୍ ରୋଗର ମୁଖ୍ୟ ଅଧ୍ୟୟନକର୍ତ୍ତା ଡା. ଆଦେଶ କୁମାର କହିଛନ୍ତି, ଗବେଷକମାନେ ଏହି ରୋଗର ପ୍ରକୋପକୁ ବୁଝିବା ଓ ଏହାର ପ୍ରଭାବକୁ କମ୍ କରିବାର ଉପାୟ ବିକାଶରେ ଲାଗିପଡ଼ିଛନ୍ତି ।
